Read Thado Chin Minbu 21 Bible Online

Minbu 21 - Thado Chin bible

Minbu 21

¹ Chuin lhanglama cheng Canaan mi Arad lengpa chun gam velhi lampia ahunguve tia kisei ajah phatnin; Israel chu akisatpin, amaho lah-a phabep jong gal hingin ahinkaijin ahi.

²Chuin Israel chu Pakai henga kihahsel in, Tahbeh-a nangman hiche mihohi kakhutna neipeh doh-a ahile, keiman akhopihou kasuhmang hel ding ahi, ati.

³Chuin Pakaiyin Israel aw chu angaipeh-in, Canaan miho chu akhutna apedoh tan; chuin amahon amaho le akhopi hou chu asumang hel taovin ahi. Chule aman hiche munchu Hormah tin asahtai.

⁴ Chuin amaho Hor molsanga konin Edom gam velkolna dingin twipisan jotna lampi lamchu ajonkit taovin; chule mipi ho chu lampi jeh-in alungu alha lheh jengtan ahi.

⁵ Chuin mipi ho chun Pathen le Mosi dounan thu aseitaovin, Ipi dinga nangnin Egypt gama kon hiche gamthipma thiding gunsetna neipuidoh uham? Ajehchu changlhah jong aumpon, chule twi jongla aumhih-in, kahinna-un hiche changlhah jangthet thut hi akidah tan ahi, atiuve.

⁶Chuin Pakaiyin mipi lah-a chun gulgu khohtah ahin lansahtan ahileh, hicheho chun mipi ho achu-in: Israel mi tamtah athitan ahi.

⁷Hijeh chun mipi ho chu Mosi henga ahungun, Keihon Pakai le nangma dounan thu kaseijun kachonse taovin ahi; Aman gul hohi keiho lah-a kona alahmang nadingin Pakai henga taovin, atiuve. Chuin Mosi mipi dingin ataotan ahi.

⁸Chuin Pakaiyin Mosi jah-a, Gulse khohtah khat lim seminlang, hichu mol lhon leh-a tahdoh-in, chule hitiding ahi, gul'in achuh tapou chun sum-eng gul chu avetna ahile hingding ahi, ati.

⁹ Chuin Mosi'n sum-eng in gullim khat asemin, hichu mol lhon leh-a atah-in, chuin ahitin ahi, gul chun khat tou achuh-a, achuhpa chun sum-eng gullim chu avetteng ahingjin ahi.

¹⁰Chuin Israel chate chu akitollun, Oboth munna pon-in akison taovin ahi.

¹¹Amaho Oboth'a konin akitolun, Moab toh kigalsai nisolam Ije-abarim gamthipma pon-in akisonun ahi.

¹²Hichea konchun amaho akichonun, Zared phaichama pon-in akisonun ahi.

¹³Hichea konchun amaho akichonun, gamthipma um, Amor mite gamsunga kona hungdoh Arnon gal langkhat lama chun pon-in akisonun ahi. Ajeh chu Arnon hi Moab le Amor kikah-a um Moab gamgi ahi.

¹⁴Hijeh chun Pakai galsatnaho lekhabu sunga, Aman twipisan le Arnon vachaho-a athilbol,

¹⁵Chule Moab gamgia um Ar chenna mun'a lunglha vachaho-a athilbol, tin akisunin ahi.

¹⁶Chuin hichea konchun amaho Beer'a achetouvun ahi: hichemun chu Pakaiyin Mosi jah-a, Miho chu khom khomin, chule keiman amaho chu twi kapeh ding ahi, tia aseina twikhuh chu ahi.

¹⁷Chuphatnin Israel ten hiche la hi asaovin; Vo twikul, twiput sah-in, nanghon ahenga la saovin:

¹⁸Danthu pepa thupeh dungjuijin, atenggolun pipuihon twikhuh alaijun, miloupi hon twikhuh alaijun ahi. Chuin amaho gamthipma konin Mattahan'a achetauve ahi.

¹⁹Chuin Mattanah'a konin Nahaliel: chule Nahaliel'a konin Bamoth:

²⁰Chule Moab gamsunga phaichama um Bamoth'a konin Jeshimon kimu phahna Pisgah molvum alhungun ahi.

²¹Chuin Israel ten Amor mite lengpa Sihon koma thupo ho asolun, ajah-a,

²²Nagamsung neijot galkai sah-un; keiho loulai le lengpilei laija kakiheilut loudiu; twikhuh-a twiho jong kadon loudiu: gamgi kakhelto kahseuva lengpa lamlen bou kajot dingu ahi, atiuvin ahi.

²³Chule Sihon'in Israelte chu gamsung agalkai diu chu aphaltapon; ahin Sihon'in amite jouse akhom khomin, gamthipma Israel sat dingin akontan ahi. Chuin ama Jahaz'a ahungin, Israelte toh akisattai.

²⁴Chuin Israel ten amachu chemjamin athat uvin; agam chu Arnon'a pat Jabbok gei, Ammon chate gam geijin alotaovin ahi. Ajeh chu Ammon chate gamgi chu hat tah ahi.

²⁵Chuin Israel ten hiche khopi ho chu alauvin; chule Israelte chu Amor miho khopi jouse, chule Heshbon le akhoneo jouseuva acheng taovin ahi.

²⁶Heshbon hi Moab leng masapa galla anasatna, agam jouse Arnon geija akhutna kona analahpeh-a Amor mite lengpa Sihon khopi ahi.

²⁷Hijeh chun amahon thuchih-in aseijun, Heshbon'a hungun, Sihon khopi kigong henlang kisahen:

²⁸ Ajehchu Heshbon'a konin mei ahungkan, Sihon khopi-a konin meikou ahung kongdoh-in; hichun Moab gama um Ar, chule Arnon munsanga pakaiho chu akavamtan ahi.

²⁹Moab, nangma ada nahi! Vo Chemosh mite amangthah nahitaove: aman asohcha achapateho le achanute chu Amor mite lengpa Sihon henga gal hinga kaidin apetan ahi.

³⁰Keihon amaho kakapmun; Heshbon chu Dibon geijin amangthah tan, chule keihon Medeba lhunna Nophah geijin kamhellin kalha taove, tin aseijun ahi.

³¹Hitichun Israelte chu Amor miho gama acheng taovin ahi.

³²Chuin Mosi'n Jaazer velhiding mi asoldoh-in, chule amahon hiche khoho chu alauvin, chua cheng Amor miho chu anodoh taovin ahi.

³³Chuin amaho ahung kile kitnun Bashan jotna lampia akaltouvun ahi. Chuin Bashan lengpa Og chu amaho satdin, amale amite jousetoh Edrei galmuna galsatdin ahung kondoh taovin ahi.

³⁴Chuin Pakaiyin Mosi jah-a, Amakhu kicha hih-in: ajehchu keiman amale amite jouse, chule agam khu nakhutna kapeh doh ahitai; nangman amakhu Heshbon'a um Amor mite lengpa Sihon nabolna bang banga nabolding ahi, ati.

³⁵Hijeh chun amahon amale achapate chule amiteho jouse chu khatcha jong ahing doh abeihel kahsen athatgamun ahi: chuin amahon agam chu alotaovin ahi.