Read Thado Chin Minbu 22 Bible Online

Minbu 22 - Thado Chin bible

Minbu 22

¹Chuin Israel chaten malam anouvin, Jericho kom Jordan gal Moab phaichama chun gebuh akison taovin ahi.

²Chuin Zipper chapa Balak chun Israel ten Amor miho chunga anabol jouse chu amusoh keijin ahi.

³Chuin Moab chun miho chu atamjeh-un akicha lheh jengtan: chule Moab miho chu Israel chate jeh-in alungu athoilheh jengtan ahi.

⁴Chuin Moab'in Midian upaho henga chun, Tu-a hi bongchalin loujaova hampa aneh jouhel banga, hiche mihonpi hin iveluva umjouse hi aneh jouhel dingu ahi, ati. Chule chuphat laija chu Zippor chapa Balak hi Moab mite lengpa hija ahi.

⁵ Hijeh chun aman ama miho chate gam, vapi panga um Pethor kho-a Boer chapa Balaam koudin sotol ho asolin, ahenga, Vetan Egypt gama kon hungpot doh mihon khat aume: ven, amahon leiset chung alodimun, chule amaho keimatoh kimaito tah-in aumuve;

⁶Hijeh chun tun, katao ahi, keiman amahohi kajo-a, katha gamuva, hiche gama kona kadelmang thei nadingun, hungin lang hiche mihohi hung gaosapmin; ajehchu amahohi keima dingin ahatbeh seh-un ahi: ijeh inem itile nangman phatthei naboh mi chu phatthei achangin, koihile nagaosap mi chu gaosap achange ti kahei.

⁷Chuin Moab upaho le Midian upaho chun aisan kipa manding hochu achoijun, akipat doh-un, Balaam henga ahungun, Balak thusei chu ajah-a asei taovin ahi.

⁸Chuin aman amaho koma, Tujan hikoma hin geh-un lang, Pakaiyin keima koma aseibang bangin keiman nangho koma thu hinpokit nange ati. Hitichun Moab puiho chu Balaam toh agehkhom taovin ahi.

⁹Chuin Pathen chu Balaam henga ahungin, ajah-a, Naum khompi miho khu koi hiuvem? ati.

¹⁰Chuin Balaam'in Pathen henga, Moab lengpa Zippor chapa Balak-in kahenga ahinsola,

¹¹Ven, Egypt gama kona hungpot doh-a leiset chung lodima mihon khat aumuve: Tun hungin lang amahohi eihung gaosap peh-in, keiman amaho kajo-a, kadeldoh jou thei khat le gatin tia ahinsol ahi, ati.

¹²Chuin Pakaiyin Balaam jah-a, Nangma amaho hitoh nakilhon louding; chule nangman hiche mihohi nagaosap louding ahi; ajehchu amaho phattheiboh chang ahiuve, ati.

¹³Chuin jingkah-in Balaam athoudoh-in, Balak pipuiho jah-a, Nagam lamuva kilekit taovin; ajehchu nangho toh lhonkhoma chedingin Pakaiyin eija nompoi, tin aseitan ahi.

¹⁴Chuin Moab pipuiho chu akipat doh-un, Balak henglama acheuvin, Balaam keihotoh hungding anompoi, agatiuve.

¹⁵Chuin Balak in pipuiho amaho sanga ja-umtah cheh asolkit nalaijin ahi.

¹⁶Chuin amaho Balaam henga ahungun, ahengah, Zippor chapa Balak'in hitin aseije, Katao ahi, kahenga nahung nadingin imacha kidal tansah hih-in;

¹⁷Ajehchu keiman nangma jana lentah kapeh-a kachoi sang ding, chule nangman kahenga nasei chan chu kabolding ahi: hijeh chun hungin lang hiche mitehi neihung gaosap peh-in, atie atiuve.

¹⁸Chuin Balaam'in Balak sohte henga chun adonbutnin ajah uva, Balak'in a-in dimset sana dangka eipeh ding hijongle, keima Pakai ka Pathen thu kalvalin tamtah bolding hihen, lhomcha bolding hijongle che ponge;

¹⁹Hijeh chun tun, naheng uva katao ahi, Pakaiyin kahenga ipi aseibe-am kahet theina dingin, tujan jong hi-ah geh kitnun, ati.

²⁰Chuin jan-in Pathen chu Balaam henga ahungin, ajah-a, Miho chu nangma kou-a hung ahiule kipat in lang amahotoh kilhonin, amavang keiman nahenga kasei thubou chu nabol ding ahi, ati.

²¹Chuin Balaam jingkah-in athoudoh in, asangan pho asepdoh in, Moab pipuiho chutoh alhontai.

²²Chuin ama ache jehchun Pathen lungsat asoujahtan: Pakai Vantil chu ama douna-a kimaitopi din lampia chun anadingtan ahi. Hichepet nahi ama sangan chunga touva, asoh minin akilhonpi ahi.

²³Chuin sangan chun Pakai Vantil khatnin akhutna chemjam achoija lampia adin amutan ahi; chuin sangan chu lamsih lama akiheidoh-in, loulai langa achetan ahi. Chuin Balaam'in sangan chu lampia heilutna din avon ahi.

²⁴Ahin Pakai Vantil chu alang teni-a bang umgel lengpilei lampia chun ana dingin ahi.

²⁵Chuin sangan nin Pakai Vantil chu amuphatnin bang suhnan akineijin, Balaam kengchu bang toh atat cheptan ahile, aman avokitnin ahi.

²⁶Chuin Pakai Vantil chu ache gamla jepmin, jetle vei akiheina ding lampi umlou munneo laitah khatna anading tan ahi.

²⁷Chuin sangan chun Pakai Vantil chu amuphatnin, Balaam noija a-optan ahi. Chuin Balaam lungsat chu akoujah tan, aman sangan chu tenggolin avon ahi.

²⁸Chuin Pakaiyin sangan chu ahin paosah-in, aman Balaam jah-a, Keiman nangma chunga ipi kabola hitia hi thumveijen neivoh ham? ati.

²⁹Chuin Balaam'in sangan jah-achun, Nangin neidai chatvai jeh ahi, kakhutna chemjam umlebon kathading nahi, ati.

³⁰Chuin sangan chun Balaam henga, Keima nasangan kahilou hija, nanga kahia patna tuni chan geija kachunga nahung tou jing hilouham? hitobanga hi masanga nachunga kanabol khah-em? ati. Chuin aman, Nabolkhapoi, ati.

³¹Chuin Pakaiyin Balaam mit ahadohsah-in ahile, aman Pakai Vantil lampia adina akhutna chemjam adopchu amutan ahi. Chuin ama akunin, tolla aboh khupmin chibai aboh tan ahi.

³²Chuin Pakai Vantil chun ajah-a, Ipi dinga nangman sangan chu thumvei jen navoh ham? Ven, nalampi hi kamitmu-a akaleh lam ahi jeh-a, nangma lamtin dinga hungkon doh-a kahi;

³³Ahin sangan chun keima eimu-a, keija kona thumveijen kihei doh ahin, ama kiheidoh lou hile tu-a hi thonlouva nangma katha-a ama kahinghoi ding ahi, ati.

³⁴Chuin Balaam'in Pakai Vantil hengah, Keima kachonse tai: ajehchu keiman douna-a lampia nadinna nei lamtin chu kahetlou ahi. Hijeh chun tun, hiche nangma lunglhai louna ahile, keima kilekit tange, ati.

³⁵Chuin Pakai Vantil chun Balaam henga, Miho khutoh lhonin, amavang keiman kaseipeh ding thubou chu nasei ding ahi, ati. Hitichun Balaam chu Balak pipuiho chutoh alhontan ahi.

³⁶Chuin Balak in Balaam hungchu ajah phatnin, Arnon gamgi mong lhapeh-a um Moab khopi khatna ana kimutopi dingin ahungdoh-in ahi.

³⁷Chuin Balak'in Balaam henga, Keiman nangma kou dinga lungnem tah-a mi kahinsol hilouham? Ipi dinga kahenga hunglou nahim? Keiman nangmahi ja-um tah-a katunmo-a nabol ham? ati.

³⁸Chuin Balaam'in Balak henga, Ven, keima nahenga kahungtai; keiman tu-a hi ipi hijongle seina ding tha kaneibeh-em? Pathen'in kakama akhum thu bou chu kaseiding ahi, ati.

³⁹Chuin Balaam chu Balak toh akilhonin, Kirjath-huzoth'a ahunglhon tan ahi.

⁴⁰Chuin Balak'in bongchal ho le kelngoi ho atohdoh-in, Balaam le aumpi pipuiho henga chun athot tan ahi.

⁴¹Chuin ajingin ahitin ahi, Balak'in Balaam chu apuijin, mipi ho jouse amutheina dingin, Baal munsang ho-a chun apuitou tan ahi.