Read Thado Chin Minbu 23 Bible Online

Minbu 23 - Thado Chin bible

Minbu 23

¹Chuin Balaam'in Balak henga, Hikomahin keima dingin maicham sagi seminlang, chule bongchal sagi le kelngoichal sagi neigot peh-in, ati.

²Chuin Balaam'in aseibang chun Balak'in aboltan: Balak le Balaam chun maicham chung tinna chun bongchal khat le kelngoichal khat atohdoh lhontan ahi.

³Chuin Balaam'in Balak henga, Nagovam thilpeh koma hin ding jingin, keima kimupi dinga Pakai ahung khattoule, keima gacheng ting, chule aman eimusah tapou chu seipeh nange, ati. Chuin ama munsang khatna achetan ahi.

⁴Chuin Pathen'in Balaam akimupin ahi. Chuin aman ahenga, Keiman maicham sagi kagongin, maicham jouse chunga chun bongchal khatle kelngoichal khat cheh katoh-in ahi, ati.

⁵Chuin Pakaiyin Balaam kamsunga thu akoipeh-in, ajah-a, Balak henga kilekit ninlang, gaseipeh in, ati.

⁶Chuin ama ahenga akile kitnin ahile, veuvin ama le Moab pipuiho jouse chu govam ganlhaina koma chun anadingun ahi.

⁷Chuin aman athulemin thu aseipaijin, hitin ati, Moab lengpa Balak'in Aram gam solamsang molsang ho-a konin eihin puijin, kajah-a, Hungin lang Jacob neihung gaosappeh-in, hungin lang Israel hung chouvin, ati.

⁸Pathen'in agaosap louho chu ken iti kagaosap dingham? ahiloule Pakaiyin achoulou chu ken iti kachou ding ham?

⁹Ajehchu keiman songpiho chungvuma konin ama kamun, chule lhang ho-a konin ama chu kaven ahi: veuvin, mipichu achanguva chengdio, namtin lah-a kisim thei louding ahiuve.

¹⁰Koiham Jacob leivui simjou ding le Israelte hoplia hopkhat simjou dinga? michonpha thin neithisah inlang, kahinkho bei danjong ama-a tobang hihen, ati.

¹¹Chuin Balak'in Balaam jah-a, Kachunga hi ipi nabol hitam? Keiman kamelmate gaosap dinga kapui nahin, ahin, vetan, nangman amaho phatthei naboh jotan ahi, ati.

¹²Chuin aman adonbutnin, Pakaiyin kakama eikhumpeh hohi kaseidoh nadinga kachihthei ngailou dingham? ati.

¹³Chuin Balak'in ajah-a, Katao ahi, hungin, chukoma kona chu amaho namuthei nadin, keimatoh munchom khatna che hite; chua kona chu nangman apamnung pen hobou namu ding, abonchauva namulou ding ahin, amaho chu keima-a dingin neigaosap peh-in, ati.

¹⁴Chuin aman ama chu Sophim loulai, Pisgah molsang vuma chun apuijin; chule maicham sagi asemin, chule bongchal khat le kelngoichal khatcheh maicham takip chunga atoh-in ahi.

¹⁵Chuin aman Balak henga, Keima Pakai to gallanga kakimuto laisen, nangma govam thilto phunga ding jingin, ati.

¹⁶Chuin Pakaiyin Balaam akimupin, akama thu akhumpeh-in, ajah-a, Balak henga chekitnin lang, hitin seijin ati.

¹⁷Chuin ama ahenga ahunga ahile, veuvin, ama thilto phunga chun Moab pipui hotoh anadingun ahi. Chuin Balak'in ahenga, Pakaiyin ipi aseijem? ati.

¹⁸Chuin aman thulem aseipanin, hitin ati, Kipatdoh-in Balak, ngaijin; nangma Zippor chapa, kathusei hi ngaijin:

¹⁹Pathen chu jou seiji-a mihem ahipon; chule lungheiji-a mihem chapa jong ahipoi; Aman aseisa chu abolda dingham? ahiloule aseidohsa chu abolphat lou dingham?

²⁰Vetan, keiman phatthei bohna ding thupeh kamutan' chule aman phatthei aboh ahitan, keiman lehei thei ponge.

²¹Aman Jacob khangitlouna, chule Israel'a jong chonvalna amupoi: Pakai a-Pathen chun aumpin, chule lengpa khosap awgin chu alah uva aumin ahi.

²²Pathen'in amaho chu Egypt'a kona ahin puidoh ahin; aman sakol kinei thahat tobang aneijin ahi.

²³Jacob douna ding themthu aumpon, chule Israel douna dingin aisan theina jong aumpoi: Tu-a hi Jacob le Israel thudola Pathen'in ipi abol hitam! kiti ding ahi.

²⁴Vetan, hiche mite hi keipi bahkai lentah banga thoudoh dingu, keipi bahkai khangdong banga dingdoh ding ahi: aman a-anchah aneh masangse le asatha thisan adon masangse-a kol louding ahi, ati.

²⁵Chuin Balak'in Balaam henga, Amaho hi gaosap jong gaosap hih-in, phatthei jong phatthei boh hih-in, ati.

²⁶Ahivangin Balaam'in Balak adonbutnin, Pakaiyin asei jouse chu kaboltei ding ahi, tia kaseipeh nahilou ham? ati.

²⁷Chuin Balak'in Balaam henga, Hungin, katao ahi, munchom khatna napui jing kate; chua konchun amaho neigaosap peh lechun Pathen lunglhai maithei ding ahi, ati.

²⁸Chuin Balak'in Balaam chu Jeshimon lam kimuna Peor molsang vuma apuijin ahi.

²⁹Chuin Balaam'in Balak henga, Hikoma hin maicham sagi neigon peh-in lang, kelngoichal sagi gotsan neikoi peh-in, ati.

³⁰Chuin Balak'in Balaam seibang chun abolin, maicham takip chunga chun bongchal khat cheh le kelngoichal khat cheh atohtan ahi.