Read Thado Chin Minbu 24 Bible Online

Minbu 24 - Thado Chin bible

Minbu 24

¹Chuin Balaam'in Israel chapate phatthei abohding chu Pakai lungdei ahi, ti ahet phatnin, phatdang bangin themthu holin achedoh tapon, gamthip lam johchu amaingat tan ahi.

²Chuin Balaam akhodah-in ahile, Israel chu aphung dungjui cheh-a agebuh uva aumu amun ahi, chuin Pathen lhagao chu achunga ahung chutan ahi.

³Chuin aman athulem aseipanin, hitin ati, Boer chapa Balaam thuseidoh; amit kihadoh sahpa thuseidoh:

⁴Pathen thuho ja-a, hat chungnungpa gaothilmu-a mupa, kipal lhu-a ahivanga amit hahjingpa thuseidoh ho:

⁵Vo Jacob, naponbuh ho iti hoi hitam! Chule vo Israel, nahoubuh ho iti hoi hitam!

⁶Phaicham bangin akiphajal deh-in, vadung panga honleiho abangin; Pakai phudoh Aloes thingphung hole, twipanga Cedar thingphung ho toh abangin ahi.

⁷Aman atwibel ho-a konin twi hinbung lhantin, achilhahte chu twi tampi lah-a umdiu; alengpa jong Agag sanga sangjo ding, chule alenggam chu kichoisang ding ahi.

⁸Pathen'in ama Egypt gama kona ahin puidoh ahin, aman sakol kinei thahat tobang aneijin ahi: akidoupi namtin vaipiho anehjou ding, aguhou ahe ngema, athalchanga athilpai dingu ahi.

⁹ Ama aboh-in, keipi bahkai bangin, chule keipi bahkai lentah bangin akole: kon ama asuhthou ngam ding ham? Nangman phatthei naboh chan phatthei changhen lang, nagaosap chan chu gaosap changhen, ati.

¹⁰Chuin Balaam chunga chun Balak lungsat akoujahtan, akhut teni abengton ahi: chuin Balak'in Balaam jah-a, Kamelmate gaosap dinga kakou nahin; ahin, vetan, nangman amaho thumvei jen hi phatthei nabohtan ahi.

¹¹Hijeh chun tun naumna lama jamtan: keiman jana lentah chang dinga tundoh kagot nahin; ahivangin, vetan Pakaiyin nangma jabola naumna dinga konin natingtan tan ahi, ati.

¹²Chuin Balaam'in Balak henga, Kahenga nahinsol miho henga jong kaseisa hitalou ham?

¹³Balak'in keima sana dangka a-in dimsetna eipeh ding hijongle, Pakai thupeh kalvala kachama aphabolna hihen, asebolna ding hijongle kabollou ding ahi; amavang Pakaiyin aseiho bouchu kaseiding ahi, kati hilou ham?

¹⁴Chule tun, vetan keima kamite henga kache ding ahitai; hijeh chun hungin, hiche miho hin ni nunung nile namite henga ahin thilbol dinghou chu seipeh-inge, ati.

¹⁵Chuin aman athulem aseipanin, hitin ati, Beor chapa Balaam thusei ho, chule amit kihadoh sahpan thusei ho:

¹⁶Pathen thupeh ho japa le chungnung pen hetna thudol hepa, hat chungnung pen gaothilmu-a mupa, kipal lhu-a ahivanga hahjingpa thuseidoh ho:

¹⁷Keiman ama chu kamuding ahin, tuvang hilouding; keiman amachu kavet ding ahin, naicha vang ahipoi: Jacob'a kona Ahsi khat hungdoh-a, Israel lah-a kona leng tenggol khat hung kitungdoh ding; hichun Moab ningkoi ho avoh-a, chule Seth chateho jouse asuhmang ding ahi.

¹⁸Chule Edom chu chanvou hung hiding, Seir jong amelmateuva dinga chanvou hung hiding ahi: chule Israel ten hangsan tah-a aboldingu ahi.

¹⁹Lengvai podingpa chu Jacob'a kona hungdoh-a, khopi-a umdenpa chu asuhmang ding ahi, ati.

²⁰Chuin aman Amalek lam aven athulem aseipanin, hitin ati, Amalek hi chitin namtin bulpi ahinan, amavang akichaina ding chu tonsotna manthah na hiding ahi, ati.

²¹Chuin aman Ken miteho aven, athulem aseipanin, hitin ati, Nachenna mun chu dettah ahin, nabuh chu songpi chunga nakiset in ahi:

²²Hijeng jongle Asshur'in gal hinga nakaimang kahse-a, Ken chu suhsetna umding ahi, ati.

²³Chuin aman athulem aseikitnin, Ohe! Pathen'in hitia hi ahinbol tengle, koi hingjou tantem!

²⁴Chule Chittim gamkaija konin kong inneiho hunguntin, Asshur le Eber chu asuh gentheidiu, chule amajong a-itih-a dinga mangthah ding ahi, ati.

²⁵Chuin Balaam akipatdoh-in, aumna lama akile kit tai. Chule Balak jong alampia achetan ahi.