Read Thado Chin Minbu 25 Bible Online

Minbu 25 - Thado Chin bible

Minbu 25

¹Chuin Israelte chu Shittima achengun, chule miho chun Moab chanute toh jonthanhoi abolpan taovin ahi.

²Chuin amaho chun Israelte chu a-pathen hou ganlhaina-a akoutaovin; chule miho chun aneovin, a-pathenhou anga abohkhup taovin ahi.

³Chuin Israel chun Baal-Peor chu ajoptan ahile, Pakai lungsat chu Israel chunga akongjah tan ahi.

⁴Chuin Pakaiyin Mosi henga, Mipi lamkaiho jouse chu puijin lang, tijat umtah Pakai lungsatna chu Israel te-a kona akichon mangtheina dingin, Pakai masang nisanoi tah-a khailih-in ati.

⁵Chuin Mosi'n Israel thutan ho henga, Nangho amitakipmin Baal-Peor jopma amite jousechu that cheh hen, ati.

⁶Chuin veuvin, Israel chate lah-a mi khat ahungin, Mosi mitmule Israel chate houkhom ho houbuh kot maija kapma-um miteho mitmu-a chun Midian mi numei khat asopiho henga ahin puijin ahi.

⁷Chuin Aaron thempu chapa, Eleazar chapa Phinehas in hichu amuphatnin, houkhom ho lah-a konchun akipatdoh-in, akhutna tengcha khat akichoijin;

⁸Chule Israel mipa chu pon in sunga ajuilutnin, anilhonin Israel mipale numeinu chu a-oipi laitah chu asunpai tan ahi. Chutichun Israel lah-a konin hise chu atangtan ahi.

⁹Chule hiche hise-a thi chu sangsomni toh sangli ahi.

¹⁰Chuin Pakaiyin Mosi henga aseijin, hitin ahi.

¹¹Aaron thempupa chapa Eleazar chapa Phinehas'in kalung hanna chu Israel te-a konin aheimangin ahi; ajehchu kathangthipna-a Israel chate kasuhmang lounadin, amaho lah-a keiding jal-in athang thipmin ahi.

¹²Hijeh chun hitin seijin, Ven kachamna kakitepna chu ama kapetan ahi;

¹³Chule hichu ama le ama nunga achilhah hon anei dingu, a-itih-a thempu hina dinga kitepna ahi; ajehchu ama a-Pathen'a dingin athang thipmin, Israel chate-a dingin longlhenna chu abolin ahi, ati.

¹⁴Tun akithatna Israel mipa, Midian numei nutoh kithat koppa min chu, Zimri ahin, Salu chapa Simeon miho lah-a insungmi upa khat ahi.

¹⁵Chule Midian numei akithatnu minchu Cozbi ahin, apa Zur chu mipi chunga lamkai, Midian miho insunga mi upa khat ahi.

¹⁶Chuin Pakaiyin Mosi jah-a aseijin, hitin ati.

¹⁷Midian ho chu sunohphah inlang, chule sugammin:

¹⁸Ajehchu amahon Peor chungchang le, Peor jeh-a hise lan mikho-a kithat Median pipupa chanu Cozbi le asopinu chungchanga alungthim gilouvun nasunoh phah-un ahi, ati.