Read Thado Chin Minbu 27 Bible Online

Minbu 27 - Thado Chin bible

Minbu 27

¹Chujouvin Joseph chapa Manasseh insunga Manasseh chapa, Machir chapa, Hepher chapa, Gilead chapa, Zelophehad chapa ahungun: chule achanute min chu Mahlah, Noah, Hoglah, Milcah chule Tirzah ahi.

²Chuin amaho Mosi le Eleazar thempupa masang, pipui hole houkhom ho jouse masang-ah, houkhom ho houbuh kotbula chun adingun, hitin aseijuve,

³Kapao chu gamthipma athin, chule Korah loiho lah-a Pakai douna-a kichom khomho loi lah-a chun ana pangpoi; amavang ama chonset na-a thi anahin, chapaho ana neipon ahi.

⁴Chapa neilou jeh-a kapamin chu ipi dinga a-insung mite lah-a kona paidoh-a umding ham? Hijeh chun kapao sopi holah-a chankhat neipeuvin atiuve.

⁵Chuin Mosi'n athu chu Pakai henga alhuttan ahi.

⁶Chuin Pakaiyin Mosi henga thu seijin, hitin ati.

⁷ Zelophehad chanute sei chun adih aseiju ahi: apao sopiho lah-a gou chanding napeh tei dingu ahi; chule apao gou chanding chu amaho napeh ding ahi.

⁸Chule nangman Israel chate jah-a hitia naseiding ahi; Pasal khat chu chapa beija athia ahile, apa gouchu achanu teo napeh dingu ahi.

⁹Ahinla amachun chanu aneilouva ahile, nanghon ama gouchu asopiho napeh dingu ahi.

¹⁰Chule aman sopi aneilouva ahile, ama gouchu apa sopiho napeh dingu ahi.

¹¹Chule apao chun sopi aneilouva ahile, nanghon agouchu a-insunguva akinaipi pa henga napeh diu, ama chun aloding ahi. Hichu Pakaiyin Mosi athueh banga Israel chate dinga thutanna chondan hiding ahi.

¹² Chuin Pakaiyin Mosi jah-a, Nangma hiche Abarim molsanga hin kaldoh-in lang, Israel chate kanapeh gam khu gaven.

¹³Chule nangman hichu navetjou tengle, nasopipa Aaron kagop khom banga nangma jong namite toh kagop khom ding nahi.

¹⁴Ajehchu Zin nelgama houkhom ho phunchel laijun, twiphunga amitmu uva suhthenga kaumna dinga kathupeh napalkeh lhonin ahi. Hichu Zin gamthipma um Kadesh mun'a Meribah twi chu ahi, ati.

¹⁵Chuin Mosi'n Pakai henga thu aseijin, hitin ati.

¹⁶Pakai tipum jouse-a um lhagao Pathen chun houkhom ho chunga mikhat tunghen,

¹⁷ Chutia chu Pakai houkhom ho hi achingbei kelngoi abah louna dinguva amasanguva potdoh-a, amasanguva chelut ding, chule amaho puidoh dingle amaho puilut dingin, ati.

¹⁸ Chuin Pakaiyin Mosi jah-a, Asunga lhagao um mipa, Nun chapa Joshua chu kipuijin lang achunga nakhut ngamin;

¹⁹Chule amachu Eleazar thempupa le houkhom ho jouse masanga dinsah inlang, amitmuva chun mopohna pen.

²⁰Israel chate houkhom ho jouse seingai ahina diuva, ja naumna phabep chu achunga nakoiding ahi.

²¹ Chule ama Eleazar thempupa anga ding ding, chule amachun Pakai angsunga Urim thutanna dungjuija ama-a dinga thumop athumpeh ding ahi. Ama le Israel chate jouse, houkhom ho jouse ngeichu ama thusah-a potnuva, chule ama thusah-a lut ding ahiuve, ati.

²²Chuin Mosi'n Pakaiyin athupeh bangchun abolin; Joshua chu Eleazar thempupa le houkhom ho jouse masanga adinsah tan ahi.

²³ Chuin aman achunga chun akhut angamin, Pakaiyin Mosi khutna athupeh bangin amachu mopohna apetan ahi.