Read Thado Chin Minbu 28 Bible Online

Minbu 28 - Thado Chin bible

Minbu 28

¹Chuin Pakaiyin Mosi jah-a thu aseijin, hitin ati.

²Israel chate chu thu penlang, hitin seijin, Keima-a dinga thil kitoh ho, keima henga gimnamtui tah hidinga meija kisem kaganlhaina ka changlhah hochu, kahenga akitep phat dungjuija natona dingun chingtheijun.

³Chule nangman ajah uva, Hiche hi Pakai henga dinga meija kisem thilto nato dingu chu ahi; jomjing govam thilto-a ding chu, nolnabei kelngoinou kumkhat lhingbep ni hiding ahi.

⁴Kelngoi nou khat chu jingkah lamle nato dingu, chule kelngoi nou adang khatma chu nilhah lamleh nato dingu ahi.

⁵Chule a-anneh thilto ding chu thao kimehdoh hin khat hopli-a hopkhat toh kihal changbong nel Ephah khat hopsom-a hopkhat hiding ahi.

⁶Hiche hi Pakai henga gimnamtui tah hidinga meija kisem kilhaina, Sinai molsanga kisudetsa jomjing govam thilto chu ahi.

⁷Chule donding thilto ding chu kelngoinou khatna dinga hin khat hoplia hopkhat hiding; munthenga chu lengpitwi chihtah chu Pakai henga donding thito hidinga nasunlhah dingu ahi.

⁸Chule kelngoi dang chu nilhah lamleh natodiu ahin; jingkah lama anneh thilto bangle donding thilto banga chu Pakai henga gimnamtui hidinga meija kisem kilhaina nato dingu ahi.

⁹Chule cholngahni leh kumkhat lhingbep nolna beihel kelngoinou ni, chule anneh thilto dinga thao toh kihal changbong nel hopsom-a hopni, chule adonding thilto toh nato tha dingu ahi.

¹⁰Hiche hi jomjing govam thilto le adonding thilto tilouva jong, hiche hi cholngah niseh-a govam thilto ding chu ahi.

¹¹Chule nangho lha kipat sehleh Pakaiya govam thilto natodiu; bongchal gol ni, kelngoi chal khat, nolna beihel kumkhat lhingbep kelngoinou sagi nato dingu ahi.

¹²Chule bongchal khatna dinga, a-anneh thilto ding chu thao toh kihal changbongnel ephah hopsom ma hopthum; chule kelngoichal khatna dinga a-anneh thilpe ding chu, thao to kihal changbongnel ephah khat hopsom-a hopni hiding ahi.

¹³Chule kelngoinou khatna dinga a-anneh thilto dingachu thao to kihal changbongnel ephah hopsom-a hopkhat hiding ahi; hiche hi Pakaiya dinga meija kisem kilhaina govam thilto gimnamtui chu ahi.

¹⁴Chule adonding thilto houchu bongchal khatna dinga lengpitwi hin keh khat, kelngoichal khatna dinga hin khat hopthum-a hopkhat, chule kelngoinou khatna dinga hin khat hoplia hopkhat hiding ahi. Hichehi lhaseh-a pumgo thilto, kumlhung keija lhaseh-a bolding ahi.

¹⁵Chule jomjing govam thilto le adongding thilto tilouva jong, kelchanou khat chu chonset thilto-a dinga Pakaiya nato dingu ahi.

¹⁶ Chule lhamasa pen nisomle nili ni chu Pakai dinga kalchuh kut ahi.

¹⁷ Chule hiche lha nisom le ninga nichu kut ahin; nisagi chol solou changlhah nehdingu ahi.

¹⁸Nikho masapen nile kikhoppi theng umding; hiche sunga chu natoh imacha natoh lou dingu ahi;

¹⁹Amavang Pakai henga govam thilto-a dinga meija kisem kilhaina naboldiu, bongchal gol ni le kelngoichal khat, chule kum khatbep kelngoinou sagi nato diu, hiche hochu nolna beihel hidingu ahi;

²⁰Chule a-anneh thilto-u chu changbongnel thao toh kihal hiding, bongchal khatna dinga ephah hopsom ma hopthum, kelngoichal khatna dinga ephah hopsom ma hopni hiding ahi;

²¹Kelngoinou sagiho jouse dinga chu kelngoinou khat cheh dinga ephah hopsom-a hopkhat hiding ahi.

²²Chule nangma longlhen bolna-a kelcha khat chonset thilto dinga nato dingu ahi.

²³Jomjing govam thilto, jingkah-a govam thilto tilouva jong hichengho jonghi nato dingu ahi.

²⁴Pakai henga gamnamtui hidinga meija kisem kilhaina sa chu hiche banga hi aniseh-a, nisagi lhumkeija nato dingu ahi: hichehi jomjing govam thilto le adonding thilto tilouva jong pehtei dingu ahi.

²⁵Chule nisagi nile kikhoppi theng khat nanei uva, natoh imacha natohlou dingu ahi.

²⁶ Ga masa nikho, hapta kut sunga Pakai henga anneh thilto thah nahin to tengu jongleh, nanghon kikhoppi theng nanei diu, natoh imacha natoh lou dingu ahi;

²⁷Amavang Pakai henga gimnamtui hidinga govam thilto natodiu; bongchal gol ni, kelngoichal khat, kumkhat lhingbep kelngoinou sagi nato dingu ahi;

²⁸Chule a-anneh thilto diu chu changbongnel thao toh kihal hiding, bongchal khatna dinga ephah hopsom-a hopthum, kelngoichal khatna dinga ephah hopsom-a hopni,

²⁹Kelngoi sagiho jouse dinga chu kelngoinou khatna dinga ephah hopsom-a hopkhat hiding ahi.

³⁰Chule nangma longlhen bolna dinga kelchaho nou khat nato dingu ahi.

³¹Jomjing govam thilto le, a-anneh thilto-u (hicheho chu nolna beihel hidiu,) chule adonding thilto hou tilouva jong hicheho chu nato diu ahi.