Read Thado Chin Minbu 29 Bible Online

Minbu 29 - Thado Chin bible

Minbu 29

¹Chule lhasagi channa, hiche lha nimasa nileh nanghon kikhoppi theng khat nanei diu; natoh imacha natohlou diu ahi; hichu nangho dinga sumkon ho mut nikho ahi.

²Chule nanghon Pakai henga gimnamtui tah hidinga govam thilto nato dingu; bongchal golkhat, Kelngoichal khat, Chule kum khat lhingbep nolna beihel kelngoinou sagi nato dingu ahi.

³Chule a-anneh thilto-u chu thao toh kihal changbongnel hiding; bongchal khatna dinga ephah hopsom-a hopthum, chule kelngoichal khatna dinga ephah hopsom-a hopni hiding,

⁴Kelngoinou sagi ho jouse-a dinga chu kelngoi khat cheh dinga ephah hopsom-a hopkhat khat hiding ahi.

⁵Chule nangma longlhen bolna dinga kelcha nou khat chu chonset thilto-a nato ding ahi.

⁶Lhaseh-a govam thilto le a-anneh thilto, niseh govam thilto le adonding thilto, chule ajatnu dungjuija Pakai henga gimnamtui tah hidinga meija kisem kilhaina tilouva jong, hicheho hi nato dingu ahi.

⁷ Chule nanghon hiche lhasagi channa nisom channi le kikhoppi theng khat nanei diu; chule nanghon nahinnao nasuhgim diu; chule hiche sunga natoh imacha natoh loudiu ahi.

⁸Ahinla nanghon Pakai henga gimnamtui tah hidinga pumgo thilto natodiu, bongchal golkhat ,kelngoichal khat, kumkhat lhingbep kelngoinou sagi nato dingu ahi. Hicheho chu nolna beihel hidingu ahi.

⁹Chule a-anneh thilto-u chu thao toh kihal changbongnel hiding, bongchal khatna dinga ephah hopsom-a hopthum, chule kelngoichal khatna dinga ephah hopsom-a hopni hiding;

¹⁰Kelngoi sagi ho jouse-a dinga chu kelngoinou khatna dinga ephah hopsom-a hopkhat khat hiding ahi;

¹¹Longlhenna chonset thilto leh jomjing pumgo thilto, chule a-anneh thilto le adonding thilto hou tilouva jong, kelchanou khat jong chonset thilto-a nato dingu ahi.

¹²Chule lhasagi channa nisom le ninga nile kikhoppi theng khat naneidiu; natoh imacha natoh loudiu, Pakai henga ni sagi kut nabol diu ahi.

¹³Chule nanghon Pakai henga gimnamtui tah hidinga meija kisem kilhaina pumgo thilto natodiu, bongchal gol somlethum, kelngoichal ni, kum khatbep kelngoi somleli: hicheho chu nolna beihel cheh hiding ahi.

¹⁴Chule a-anneh thilto-u chu thao toh kihal changbongnel hiding, bongchal somle thuma dinga chu, bongchal takipma dinga ephah hopsom-a hopthum, kelngoichal ni-a dinga chu kelngoichal khatna dinga ephah hopsom-a hopni hiding,

¹⁵Chule kelngoi somleli ho jouse-a dinga chu kelngoinou khat dinga ephah hopsom-a hopkhat cheh hidingu ahi;

¹⁶Chule jomjing pumgo thilto, a-anneh thilto-u le adonding thilto-u tilouva jong, kelngoiho noukhat chonset thilto-a nato dingu ahi.

¹⁷Chule anini lhin nile nanghon bongchal gol somleni, kelngoi chal ni, kumkhat bep nolna beihel kelngoi nou somleli nato diu ahi.

¹⁸Chule bongchal ho-a ding, kelngoichal ho-a ding, kelngoichal hole kelngoinou ho-a ding, ajatnu dungjuija angaina dungjuija, a-anneh thilto-u le adonding thilto-u nato dingu ahi;

¹⁹Chule jomjing pumgo thilto le a-anneh thilto-u, chule adonding athilto-u tilouva jong, kelcha ho nou khat chu chonset thilto-a nato dingu ahi.

²⁰Chule anithum nile bongchal somlekhat, kelngoichal ni, chule nolna beihel kumkhat lhingbep kelngoinou somleli nato dingu ahi.

²¹Chule bongchal ho-a ding, kelngoi chalho-a ding, chule kelngoiho-a dinga ajatnu dungjuija, angaina dungjuija, a-anneh thilto-u le adonding thilto-u nato dingu;

²²Chule jomjing pumgo thilto le a-anneh thilto-u, chule adonding athilto-u tilouva jong, chonset thilto-a dinga kelcha khat hiding ahi.

²³Chule anili nile bongchal som, kelngoi chal ni, chule nolna beihel kumkhat lhingbep kelngoinou somleli nato dingu ahi.

²⁴Chule bongchal ho-a ding, kelchal ho-a ding, chule kelngoiho-a dinga ajatnu dungjuija angaina banga, a-anneh thilto-u le adonding athilto-u nato dingu;

²⁵Chule jomjing pumgo thilto le a-anneh thilto-u chule adonding athilto-u tilouva jong, kelchaho nou khat chonset thilto-a apehdingu ahi.

²⁶Chule ani nga nile bongchal ko, kelngoichal ni, chule apolkom beihel kum khat lhingbep kelngoinou somleli nato dingu ahi.

²⁷Chule bongchal ho-a ding, kelngoi chal ho-a ding, chule kelngoi nou ho-a dinga chu, amaho ajatnu dungjui le angaina banga a-anneh thilto-u le adonding athilto-u nato dingu;

²⁸Chule jomjing pumgo thilto le a-anneh thilto-u, chuleh adonding athilto-u tilouva jong, chonset thilto dinga kelcha khat nato dingu ahi.

²⁹Chule anigup nile bongchal get, kelngoichal ni, chule nolna bei kumkhat lhingbep kelngoinou somleli nato dingu;

³⁰Chule bongchal ho-a ding, kelngoichal ho-a ding, chule kelngoinou ho-a dinga chu amaho jat dungjui le angaina banga a-anneh thilto-u leh adonding thilto-u nato dingu ahi.

³¹Chule jomjing pumgo thilto le a-anneh thilto-u, chule adonding athilto-u tilouva jong, chonset thilto dinga kelngoi khat nato dingu ahi.

³²Chule ani sagi lhin nile bongchal sagi, kelngoichal ni, chule nolna beihel kumkhat lhingbep kelngoinou sagi nato dingu ahi.

³³Chule bongchal ho-a ding, kelngoichal ho-a ding, chule kelngoinou ho-a ding, ajatnu dungjuija leh angaina banga, a-anneh-u thilto-u le adonding thilto-u nato dingu;

³⁴Chule jomjing pumgo thilto le a-anneh thilto-u chule adonding athilto-u tilouva jong, chonset thilto dinga kelcha khat nato dingu ahi.

³⁵Aniget nile kikhoppi loupitah khat naneidiu; hiche sunga nanghon natoh imacha natoh loudiu ahi.

³⁶Ahin Pakai henga gimnamtui tah hidinga, meija kisem kilhaina govam thilto natodiu; bongchal khat, kelngoichal khat, nolna beihel kelngoi sagi kumkhat lhingbep nato dingu ahi.

³⁷Chule bongchal ho-a ding, kelngoichal ho-a ding, chule kelngoinou ho-a dinga amaho jat dungjuile angaina banga a-anneh thilto-u leh donding athilto-u nato dingu;

³⁸Chule jomjing pumgo thilto le a-anneh thilto-u, chule adonding thilto-u tilouva jong, chonset thilto dinga kelcha khat nato dingu ahi.

³⁹Chule nakitep nahou, nalung cham thilto hou, napumgo thilto houding, na anneh thilto hou ding, nadon ding nathilto hou ding, nachamna thilto hou ding tilouva jong, hicheng hi Pakaiya dinga na kut houva chu nabol dingu ahi, ati.

⁴⁰Chuin Mosi'n Pakaiyin athupeh jouse dungjuijin Israel chate henga aseitan ahi.