Read Thado Chin Minbu 3 Bible Online

Minbu 3 - Thado Chin bible

Minbu 3

¹Hichehohi Pakaiyin Sinai molsanga Mosi henga thu anasei nikho-a Mosi le Aaron chilhah ho chu ahiuve.

² Chule hicheho hi Aaron chapate min chu ahi: apeng masapen Nadab, chule Abihu, Eleazer chule Ithamar ahiuve.

³Hichehohi thempu natohna-a lhacha natoh tong dinga aman akatdoh, thempu dinga thao kinu Aaron chapate ho min chu ahi.

⁴ Chule Nadab le Abihu chu Sinai gamthipma Pakai masanga dan ngailouva gimnamtui ahalpet lhonin, Pakai angsunga athi lhontan, chule amanin cha aneilhon pon ahi: chule Eleazer le Ithamar chun apao Aaron mitmun thempu natohna lhachana chu atong lhontan ahi.

⁵Chuin Pakaiyin Mosi henga thu aseijin, hitin ati,

⁶Levi phung chu hinpui naijin lang, amahon ama henga lhacha na atohtheina diuvin Aaron thempu masanga hinpui lutnin.

⁷Chule amahon houbuh lhacha natoh nadinga, houkhom ho houbuh maija chu ama le houkhom pumpiho kin aboldingu ahi.

⁸Chule amahon houbuh lhacha natohna dinga, houkhom ho houbuh manchah jouse achin uva, Israel chate jouse tohding kin chanchu atoh dingu ahi.

⁹Chule nangman Levi mite chu Aaron le achapate henga napehdoh ding ahi: amaho chu Israel chate lah-a kona apumpiuva ahenga dinga pehdoh ahiuve.

¹⁰Chule nangman Aaron le achapate chu thempu-a napan sah-a, chule amahon thempu tohmun chu angatup diu: chule hetkhahlou mi ahung naija aumle kithat ding ahi, ati.

¹¹Chuin Pakaiyin Mosi henga thu aseijin, hitin ati,

¹²Chule keima, ven, keiman Israel chate lah-a naobu phukeh-a apeng masaho jouse khela Levi mitehi Israel lah-a kona kalahdoh ahitai: hijeh chun Levi mite chu keija hidingu ahi.

¹³ Ajehchu apengmasa jouse chu keija ahi; ijeh inem itile keiman Egypt gama apengmasa jouse katha nikho-a chu, Israelte lah-a apengmasa jouse mihem hihen gancha hijongle keima-a dinga kana suhtheng ahitai: amaho keija hiding ahiuve: keima Pakai chu kahi, ati.

¹⁴Chuin Pakaiyin Sinai gamthipma chun Mosi henga thu aseijin, hitin ati,

¹⁵Levi chateho jouse a-inko kou-a, apu apateu insung kailhah dungjuija, pasal takip lhakhatna pat chunglamse nasim ding ahi.

¹⁶Chuin Mosi'n Pakaiyin athupeh bangin amaho chu asimtan ahi.

¹⁷Chule hicheho hi aminu dungjuija Levi chapate chu ahiuvin; Gershon, Kohath, chule Merari ahiuve.

¹⁸Chule hiche hohi a-inkou dungjuijin Gershon chapate ahiuve; Libni chule Shimei ahilhone.

¹⁹Chule a-insungu dungjuija Kohath chapate chu; Amram, Izehar, Hebron, chule Uzziel ahiuve.

²⁰Chule a-inkou dungjuija Merari chapate chu; Mahli chule Mushi ahiuve. Apu pateu insung kailhah dungjuija hiche hohi Levi insung mite ahiuve.

²¹Gershon'a kon hochu Libni insung mite le Shim insung mite ahiuvin; amaho hi Gershon insung miho chu ahiuve.

²²Amaho-a kon kisimdoh, pasal jouse kisim dungjuija lhakhat napat achunglam akisimdoh ho chu sangsagi le janga ahi.

²³Gershon insung mite chun houbuh tomlam, lhumlam sanga houbuh akisondiu ahi.

²⁴Chule Gershon insung mite pipuding chu Lael chapa Eliasaph hiding ahi.

²⁵Chule Gershon le achapaten houkhom ho houbuh sunga atohdiu chu houbuh, ponbuh, chule achung khuna, houkhom ho houbuh kotna khai ding ponjal,

²⁶Chule inhong sunga kikhai pondal ho, houbuh koma umle maicham kimvella um inhong kotna ding pondal, chule akhaoho jouse le hichea pangthei jouse chu ahi.

²⁷Chule Kohath insungmiho chu Amram insungmi, Izehar insungmi, Hebron insungmi, chule Uzziel insungmi ahiuve: hichenghi Kohath insungmi ahiuve.

²⁸Muntheng vetup ding mi pasal lhakhat napat achunglamse akisim doh sangget le jagup ahi.

²⁹Kohath chapateho insungmi chun houbuh pang lhanglam sanga chu pon in akisondiu ahi.

³⁰Kohath chilhah insung mite pipupen ding chu Uzziel chapa Elizaphan hiding ahi.

³¹Chule amopoh diu chu Pathen thingkhong, dokhang, meivah khom, maicham ho, akin bolnadiu munthenga sumlheng ho, pondal, chule chua kin kibolding jouse chu ahi.

³²Chule Aaron thempupa chapa Eleazar chu Levi ho pipuiho chunga pipui pen hiding, chule muntheng vetupma pangho vesuile hiding ahi.

³³Merari'a kon hochu Mahli insungmite le Mushi insungmite ahiuvin; hichengse hi Merari insungmi ho ahiuve.

³⁴Chule amaho-a kon kisimdoh, pasal jouse kisim dungjuija lhakhat napat achunglam akisimdoh ho chu sang gupto jani ahi.

³⁵Merari chilhahte insung pipupen chu Abihail chapa Zuriel ahi; hicheho hin houbuh pang sahlam sanga chu pon in akison dingu ahi.

³⁶Chule Merari chapate vetup dinga kinganse chu houbuh thingpeh ho, chua kimang banggol ho, akhomho, akhom tunnaho, sumlheng ho, chule hicheho to kisai thil jouse,

³⁷Chule ahongsung kimvella akhomho, akhom tunnaho, akilbeh naho leh akhaojangho chu ahi.

³⁸Ahinla solam sanga Houbuh maija, houkhom ho houbuh mai tah-a solam sanga ponbuh song ding chu Mosi le Aaron chule achapateho hiding, Israel chatehoa dinga muntheng mopohna chu atohdiu ahi; chule midang akom naija hung aumleh thajeng ding ahi.

³⁹Pakai thupeh-a Mosi le Aaron'in asimdoh lhon Levi mite akisimdoh jouse chu, a-inko pumpiuva, pasal lhakhatna pat chunglam jouse chu sangsomni le sangni ahi.

⁴⁰Chuin Pakaiyin Mosi henga, Israel chate apengmasa pasal jouse lhakhat napat chunglam jouse simdoh inlang, aminhou jatchu simdoh-in.

⁴¹Chule nangman Levi mite chu keija dinga Israel chate apeng masaho jouse khella nalahding, (keima Pakai kahi); chule Israel chate gancha apengmasa jouse khela Levi mite gancha chu nalah ding ahi.

⁴²Chuin Mosi'n Pakai thupeh bangin Israel achate lah-a apengmasa ho jouse chu asimdohtan ahi.

⁴³Chule apengmasa pasal jouse min kisim dungjuijin lhakhatna pat achunglam jouse chu sangsomni le sangni toh jani le somsagi le thum ahi.

⁴⁴Chuin Pakaiyin Mosi henga thu aseijin, hitin ati,

⁴⁵Israel chate lah-a apengmasa jouse khelin Levi mite, aganchaho khellin Levi mite ganchaho lan; chule Levi mite chu keija hidingu ahi: Keima Pakai chu kahi.

⁴⁶Chule lhatdoh-a umding Israel chate apengmasa Levi miho sanga jani le somsagi le thuma tamho chu;

⁴⁷Nangman mikhat na Shekel nga cheh, munthenga shekel kila dungjuija nalahding ahin; (Shekel khat chu gerah somni ahi.)

⁴⁸Chule nangman sum chu avalho lhatdohna dinga Aaron le achapate napehding ahi, ati.

⁴⁹Chuin Levi mite sanga tamjoho kilhatdohna ding sum chu Mosi'n alatan ahi.

⁵⁰Munthenga shekel dungjuijin Israel chate apengmasa ho-a konin aman sum shekel sangkhat le jathum le somgup le nga alatan ahi.

⁵¹Chuin Pakaiyin Mosi athupeh bangin, Mosi'n lhatdamna sum chu Pakai thu dungjuijin Aaron le chapate apetan ahi.