Read Thado Chin Minbu 30 Bible Online

Minbu 30 - Thado Chin bible

Minbu 30

¹Chuin Mosi'n phung lamkai ho jah-a, Israel chate chungchang thudol aseijin, hitin ati; Hichehi Pakai thupeh ahi.

² Mikhattou Pakai henga kitepna khatna akitepma, ahiloule ahinna kikanna dinga kihahselna khatna akihahsela ahile, athusei chu apalkeh louding, akama aseidoh dungjuija atohding ahi.

³Numei khattou Pakai henga kitepna khatna akitepma, anungah laija apa in'a ana umlaija, kikanna khatna amanu akikana;

⁴Chule apan akitepna le ahinna kikan nadinga akikan nachu ajah-a, apan amanu athipsan jeng ahile; akitepna jouse chu ding jing ding ahin, chule ahinna anakanna akihahselna jouse jong chu ding jing ding ahi.

⁵Amavang apachun ajah nikho-a chu ajahda-a ahile; amanu kitepna ho, ahiloule ahinna kikan nadinga akikannaho chu dinglou ding ahi; chule apan ajahda jeh-a, Pakaiyin amanu chu angaidam ding ahi.

⁶Chule amanu akitepet ahiloule amanun ahina akana dia akamsunga thu hungpotdoh laija chu jinei ahitah-a;

⁷Chule hichu ajipan ajah-a, chule ajah nikho-a chu amanu ana thipsanna ahile; amanu kitepnaho chu ding jing ding; chule ahinna kikana dinga akihahsel naho chu ding ding ahi.

⁸Ahinla ajipan hichu ajahdoh nikho-a ajahda-a ahile, amanu kitepna khatna anakitepna, chule ahinna akikana akamsunga kona thu hungpot doh ho chu asuhmang pehding; Pakaiyin amanu chu angaidam ding ahi.

⁹Amavang meithai le akidasa numei jin ahinna kikan nadinga akitepna tapou chu amanu chunga ding jing ding ahi.

¹⁰Chule amanu chu ajipa in'a kitep ahia, ahiloule ahinna chu kihahsel na-a akan ahi-a,

¹¹Chule ajipan hichu ajah-a, amanu athip sana, ajahda louva ahile, akitepna jouse chu dingjing ding, ahinna kikan nadinga akihahselna takip chu ding jing ding ahi.

¹²Ahinla ajipan hiho chu ajahdoh nikho-a ajah da-a ahile; akitepna thudola akama kona potchan, ahiloule ahinna kikana thudol chu dinglou ding ahi. A-inneipun ajahda ahin, Pakaiyin amanu angaidam ding ahi.

¹³Kitepna tapou le ahinna sugentheina dinga kikana tapou chu ajipan aphudet thei, ahiloule asuhmang thei ahi.

¹⁴Amavang a-inneipun ani ania amanu henga chu imacha seilouva auma ahile; amanu akitepnaho le amanu chunga akikana jouse chu aphudet peh ahi. Amapan hicheho chu ajahdoh nikho-a athipsan jeh-a chu, hicheho chu anamdet ahi.

¹⁵Ahinla amapan hicheho ajahdoh nunga asuhmanga ahile; amapan amanu chonsetna chu akipoh ding ahi.

¹⁶Hicheho hi Pakaiyin Mosi ana thupeh, pasal le a-inneipi kikah-a, chule amanu khangdong ahilai, apa in'a aumlaija amanu le apa kikah-a dinga chondan apeh chu ahi.