Read Thado Chin Minbu 31 Bible Online

Minbu 31 - Thado Chin bible

Minbu 31

¹Chuin Pakaiyin Mosi henga thu aseijin, hitin ati,.

²Midia mite chunga Israel chate phu lanlang, chujouteng na mite toh gopkhoma naum ding ahitai.

³Chuin Mosi'n mipi ho henga chun aseijin, hitin ati; Nangho lah-a mi phabep galsat dingin galvon kivonu henlang, Midia mite doudin cheohen, chule Midia mite chungah Pakai phuba galao hen.

⁴Israel phung jouse-a kon, phung khatna kon sangkhat cheh chu galkon dinga nasol dingu ahi, ati.

⁵Hitichun Israel sangtamtah ho lah-a konin phung khatna kon sangkhat cheh, galkon dinga galvon kivon mi sangsom le sangni alhengdoh taovin ahi.

⁶Chuin Mosi'n amaho chu manchah thengtah hole mutding sumkon ho chu akhutnuva akichoisah-in, chule Israelte phungtina sangkhat cheh le Eleazar thempu chapa Phinehas chu galsat din asoltan ahi.

⁷Chuin Pakaiyin Mosi athupeh bang chun, amahon Midia mite asat taovin; chule pasal jouse athat taovin ahi.

⁸Chuin adang athahou tilouvin jong amahon Midia leng ngaho athatnun, amaho chu: Evi, Rekem, Zur, Hur chule Reba ahiuve. Beor chapa Balaam jong chu chemjamin athatnun ahi.

⁹Chuin Israel chate chun Midia numei ho le achasen hou jouse gal hingin ahin kaijun ahi, chule agancha hou jouse, akelngoi hou jouse, chule athilkeo jouseu ahin chomun ahi.

¹⁰Chuin amahon achennao khopi jouse le akulpiu phatah ho jouse chu meijin ahal lha uvin ahi.

¹¹Chuin amahon galthil achom jouseu, mihem le ganhing agomin apui taovin ahi.

¹²Chuin amahon gal hinga kiman jouse le thil achomdoh hou jouse chu Mosi le Eleazar thempupa, chule Israel chate houkhom ho henga Jericho naija um, Jordan pang Moab phaichama gebuh-ah ahinpui taovin ahi.

¹³Chuin Mosi le Eleazar thempupa, chule houkhom ho lah-a lamkai pipuiho chu amaho kimupi din gebuh pama apotdoh-un ahi.

¹⁴Chuin galmuna kona hung janel lamkaiho, sepai asang sang lamkai ho, chule aja aja chunga lamkai ho chunga chun Mosi alunghang tan ahi.

¹⁵Chuin Mosi'n amaho henga, Nanghon numei ho jouse hi hinghoi nahiuvem?

¹⁶ Veovin, hiche numei ho hin Balaam thumopma kona Israel chate hi Peor chungchanga Pakai douna asuhkhel sah-u ahin, chule Pakai houkhom ho lah-a chu hise analanga ahi.

¹⁷Hijeh chun tun chapangho lah-a pasal takip chu thatnun lang, chule numei takip pasal toh lupkhom kha jouse chu thatnun,

¹⁸Amavang numei chapang jouse, pasal toh lumkhom khalou jouse chu nangho-a dingin hinghoijun;

¹⁹Chule nangho gebuh pama ni sagi naum dingu: koi hijongleh mi that tapou, chule koi hijongle mithilong tongkha tapou chu, nangho le nami mat hou agoma nithum ni leh ni sagi ni-a naki suhtheng dingu ahi.

²⁰Chule navon jouseu, savuna kisem jouse, kelmulla kisem jouse, chule thinga kisem jouse chu sutheng uvin, ati.

²¹Chuin Eleazar thempupan galsatna che galsat miho henga chun, Hichehi Pakaiyin Mosi henga athupeh danthua chondan ahi;

²²Sana, dangka, sum-eng, thih, tin chule ngen hobou,

²³Meija katheilou thil jouse chu nanghon meija nahal diu, chuteng hichu atheng hiding ahi. Hijeng jongle kisekhena twija suhtheng hiding ahi. Chule mei kahthei jouse chu twija nadediu ahi,

²⁴Chule nanghon napon hou chu ani sagi nile nasop theng diu, chuteng atheng nahi dingu ahitai. Chujou tengle nangho gebuh-a nahung lut dingu ahi, ati.

²⁵Chuin Pakaiyin Mosi henga thu aseijin, hitin ati,.

²⁶Nangmale Eleazar thempupa, chule houkhom ho lah-a lamkai pipuihon, galla kichom doh chu mihem hihen sa hijongle ajat simtoh-un.

²⁷Chule galsat dinga galmuna konho le houkhom ho jouse kah-ah galthil chu hopnin hoppeh-un:

²⁸Chule galsat dinga galmuna konho-a konin Pakaiya dingin kai dongun; mihem'a kon, bongchal ho-a kon, sangan ho-a kon, chule kelngoi ho-a konin agomun janga lah-a khatcheh laovin;

²⁹Pakaiya lhuh thilto dingin, akehkhat chu lanlang, Eleazar thempupa chu pen.

³⁰Chule Israel chate chan akeh khatna konin, somnga lah-a konin khat ladoh-un lang, mihem'a kon, bongchal ho-a kon, sangan ho-a kon, kelngoiho-a kon, gamsa jouse-a konin laovin lang, chule Pakai houbuh chingtup-a pang Levi ho henga peuvin.

³¹Chuin Mosi le Eleazar thempupan Pakaiyin Mosi athupeh bangchun abol lhontan ahi.

³²Chule galsat mihon ahinlah-u galthil kichomho simlouvin, kelngoi chu sangjagup toh sangsomsagi le sangnga ahin,

³³Bong sangsomsagi le sangni,

³⁴Sangan sangsomgup le sangkhat,

³⁵Chule pasal to kitimat khalou numei chu sangsomthum le sangni ahi.

³⁶Chule akeh khat, galsatna konho chan chu: kelngoi sangjathum le sangsomthum le sangsagi le janga ahin;

³⁷Chule Pakaiya dinga kelngoi kai kipe chu jagup le somsagi le nga ahi.

³⁸Chule bongchal ho chu sangsomthum le sanggup ahin; hicheho lah-a kona Pakaiya dinga kai kipe chu somsagi le ni ahi.

³⁹Chule sangan ho chu sangsomthum le janga ahin; Pakaiya dinga kai kipe chu somgup le khat ahi.

⁴⁰Chule mihem chu sangsom le sanggup ahin; hicheng lah-a Pakaiya dinga kai kipe chu mi somthum le ni ahi.

⁴¹Chuin Pakaiyin Mosi athupeh bangchun, Pakaiya lhuh thilpeh kai chu Mosi'n Eleazar thempupa apetan ahi.

⁴²Chule Israel chate chan akehkhat, galsatna konho lah-a kona Mosi'n ahopkhenho chu;

⁴³(Tun houkhom ho chan akeh khatna chu: kelngoi sangjathum le sangsomthum le sangsagi to janga ahin,

⁴⁴Chule bongchal sangsomthum le gup,

⁴⁵Chule sangan sangsomthum le janga,

⁴⁶Chule mihem sangsom le sang gup ahi.)

⁴⁷Israel chate-a chan akeh khatna konin, Mosi'n mihem le gancha agomin somnga-a khat alan, chule Pakaiyin Mosi athupeh bangchun Pakai houbuh ngahtup Levi miho chu apen ahi.

⁴⁸Chuin janel asang sangho chunga lamkai, asang sang lamkaiho le, ajaja lamkaihon, Mosi ahin naijun,

⁴⁹Chuin amahon Mosi henga, Nasoh keihon mi keiho mopohna noija um galsat miho sese kasimun ahile, mi khatcha akisam aumpoi.

⁵⁰Hijeh chun amitakip min Pakai henga thilpeh dingin kanei hou, sana-a kisem kijepna ho, sumguiho, chaoho, khutjemho, bilbaho, chule khiho Pakai anga kahinna uva dinga longlhenna bolna dingin kahin choijun ahi, atiuve.

⁵¹Chuin Mosi le Eleazar thempupa chun amaho-a konin sana jouse, sana-a kisem kijepna jouse ala lhontan ahi.

⁵²Chule Pakaiya dinga asangsang lamkaiho le ajaja lamkaihon apehdoh-u thilpeh sanaho jouse chu, shekel sangsom le sanggup toh jasagi le somnga ahi.

⁵³(Ajehchu galkon miho amitakip min ama ding cheh-a thil ahin kichomu ahi.)

⁵⁴Chuin Mosi le Eleazar thempupan asangsang lamkai ho le jalamkai ho sana chu ala lhonin, Pakai angsunga Israel chate-a dinga melchihna khat hidingin, houkhom ho houbuh sunga achoilut lhontan ahi.