Read Thado Chin Minbu 32 Bible Online

Minbu 32 - Thado Chin bible

Minbu 32

¹Tun Reuben chate le Gad chate chun gancha atama tam aneijun: chule amahon Jazer gam le Gilead gam amuphatnun, veuvin, amun chu gancha vahna dinga mun phatah ahijeh-in,

²Gad chate chule Reuben chate chu ahungun, Mosi le Eleazer thempupa, chule houkhom lamkai pipuiho henga aseijun, hitin atiuve,

³Ataroth, Dibon, Jezer, Nimrah, Heshbon, Elealeh, Shebam, Nebo chule Beon,

⁴Pakaiyin Israel houkhom ho masang tah-a anasuhmang gamhi gancha vahna dinga phatah ahin; nasoh houhin gancha kaneijun ahi:

⁵Hijeh chun amahon, Keiho namitmu-a lungsetna kachan uva ahile, hiche gam hi nasohte lo dingin nei pedoh jengun, chule keiho Jordan gal lama neipuilut da taovin, atiuvin ahi.

⁶Chuin Mosi'n Gad chate le Reuben chate jah-a chun, Nasopi ho gal kona cheova, nangho hilaija hi natou thim dingu ham?

⁷Chule ibola nanghon Israel chate chu Pakaiyin apehnao gam agalkai diuva kona nalung lhahsah uham?

⁸ Kadesh-bernea'a kona agam vedinga kasolai chun napateu vin hitihin anabolun ahi.

⁹Ajehchu amaho Eshcol phaichama acheuva, agam agamu-u chun, amahon Israel chate chu Pakaiyin apehnao gama alut louna diuvin alunglhah sah-un ahi.

¹⁰ Chuin Pakai lunghanna chu hiche pet chun ahung koudohtan, chule ama akihah sellin, hitin ati.

¹¹Thonlouva Egypt gama kona hungdoh miho kumsom ni-a lhah chunglamse koimachan keiman Abraham, Isaac chule Jacob henga kanatep gam chu amutheilou dingu ahi, ajehchu amahon eijui bulhing pouve;

¹²Kenez mi Jephunneh chapa Caleb le Nun chapa Joshua tilou; ajehchu amanin Pakai ajui bukim lhonin ahi.

¹³Chuin Pakai lunghanna chu Israel chate chunga akoudoh tan, Pakai mitmu-a thilse bolho khang jouse chu abeisoh kahsen amaho chu gamthipma kum somli avavai sah-in ahi.

¹⁴Chule veuvin, chonset punna mite, Israel chunga Pakai lunghan punbesah nadingin, nangho napateu khelin nahung kisepdoh-un ahi.

¹⁵Ajehchu nangho ama najuinaova kona nakihei manguva ahile, aman amaho hi gamthipma adalhah kit ding, chule nanghon hiche miho jouse hi nasuh mangdiu ahi, ati.

¹⁶Chuin amahon ama ahin naijun, Keihon hilaija hi kagancha ho hongding le kachateu ho-a ding khopiho chu kasahdiu:

¹⁷Amavang keiho tah hi Israel chate cheng achen nadiu gamsunga kapuilut kahseuva amasanguva manchah puma kigosa kachediu ahi: chule agama cheng miho jeh-a hi kachateu kul kikai khum khopiho-a kachen sahdiu ahi, atiuve.

¹⁸Israel chate amichang cheh-in aloding cheh-u alo kahseuva keiho ka in'uva kahung kile loudiu ahi.

¹⁹Ijeh inem itile keihon amaho toh Jordan gallang, ahiloule akal lam chu kalokhom loudiu ahi; ajeh chu keiho gamloding chu hilam Jordan solamsang ahi, atiuve.

²⁰Chuin Mosi'n amaho henga, Hitobang thil hi nabol uva, Pakai angsunga galsatna nakon uva,

²¹Chule Pakaiyin amelmate a-angsung kona adelmang kahse-a, nangho galvon kivon jouse Pakai angsunga Jordan nagal kaijuva,

²²Chule Pakai angsung tah-a agam chu suhnema auma ahile; chujouteng chule nangho nakinungle uva, chule nangho Pakai angle Israelte anga themona bei nahi dingu; chule agam chu Pakai angsunga nangho loding hiding ahi.

²³Ahinla nanghon hitia chu nabol lou uva ahile, veuvin, nangho Pakai douna-a chonse nahiuvin, thonlouva nachonset nao chun nahin holdoh dingu ahi.

²⁴Nachasen teo dingin khopi saovin lang, nakelngoi houva din kelngoi hong saovin, hitichun nakam muva thupot dungjui chun bollun, ati.

²⁵Chuin Gad chate le Reuben chate chun Mosi henga, ka Pakai thupeh banga nasohten kabol dingu ahi.

²⁶Kachasen hou, ka-inneipiteu, kakelngoi hon hou, chule kagancha hou, hiche Gilead khopiho sunga umdingu ahin,

²⁷Ahin ka pakai pa seibanga, nasohte amitakip galsat dinga galvon kivon chengse, galsatna Pakai angsunga kache dingu ahi, atiuve.

²⁸ Hijeh chun amaho chung thua hin Mosi'n Eleazar thempupa le Nun chapa Joshua, chule Israel chate phung lamkai ho thu apen:

²⁹Chule Mosi'n amaho jah-a, Gad chate le Reuben chate hi nangho toh Pakai angsunga amitakip galvon akivon uva, Jordan agalkaijuva, gamchu namasanguva suhnema auma ahileh; chuteng nanghon Gilead gam chu amaho lodinga napeh dingu ahi.

³⁰Ahin amaho galvon puma nangho toh agalkai khom lou uva ahile, amahon Canaan gama nangho lah-a loding anei dingu ahi, ati.

³¹Chuin Gad chatele Reuben chate chun adonbutnun, Pakaiyin nasohte henga asei banga chu keihon kabol dingu ahi.

³²Kachan dingu kagoulo diu chu Jordan hilamsang ahitheina dinga keiho galvon kivon puma Pakai angsunga Canaan gamsunga kagalkai dingu ahi, atiuve.

³³Chuin Mosi'n Amor mite lengpa Sihon gam le Bashan lengpa Og gam, agamgi sunga khopi ho, gamsung kimvella khopiho chu Gad chate, Reuben chate chule Joseph chapa Manasseh phung akehkhat hochu apetai.

³⁴Chuin Gad chate chun Dibon, Ataroth le Aroer,

³⁵Chule Atroth, Shophan, Jazer le Jogbehah,

³⁶Beth-nimrah chule Beth-haran, kul kikai khum khopiho, chule kelngoi hongho asadoh-un ahi.

³⁷Chule Reuben chaten Heshbon, Elealeh le Kirjathaim,

³⁸Nebo, Baal-meon (amin ho kikhela ahitai,) chule Shibmah khopiho asadoh-un, chule amahon asahdoh-u khopiho chu minchom asah-un ahi.

³⁹Chuin Manasseh chapa Machir chate hochu Gilead'a acheuvin, agalaovin, chule asunga um Amor miho chu anodoh-un ahi.

⁴⁰Chuin Mosi'n Gilead chu Manasseh chapa Michir apen, ama chua achengtan ahi.

⁴¹Chuin Manasseh chapa Jair chu achen, chua khopi neoho chu alan, chule hicheho chu Havoth-Jair asahtai.

⁴²Chule Nobah achen Kenath le chua kho neoho chu alan, ama min aputsah-in, Nobah asahtan ahi.