Read Thado Chin Minbu 34 Bible Online

Minbu 34 - Thado Chin bible

Minbu 34

¹Chuin Pakaiyin Mosi jah-a aseijin, hitin ati.

²Israel chate thu penlang, chule ajah uva hitin seijin, Nangho Canaan gamsunga nalut tengule, (hichehi nangho lodinga hunglha ding gam chu ahin, Canaan gam agamgi chin hotoh hitha ding ahi).

³Lhanglama nagamgi dingu chu Zin gamthipma pat Edom gamgi chin gei hiding, chule lhanglam sang gamgi chu Chi dil solam among gei hiding ahi.

⁴Chule nagamgiu chu lhanglama Akrabbim kaltouna-a patna hung kiheidoh-a, Zina galkai ding; chule Kadesh-barnea lhanglama chepeh ding, chule Hazar-addar'a cheding, chule Azmon galkai ding ahi.

⁵Chule agamu ngahna chu Azmon'a patna Egypt vadung geija akolding, ahung kikhodoh ho chu twipia kinga ding ahi.

⁶Chule lhumlam gamgi ding chu, agamgi-a dinga twipilen naman diu; hichehi lhumlama nagamgiu hiding ahi.

⁷Chule nangho sahlam gamgi ding chu, twipilen'a kona Hor molsang chan hiding ahi.

⁸Hor molsanga kona nanghon Hamath lutna geichu namelchih peh dingu; nangho gamgi kilhungdoh chu Zedad'a kilhung lutding ahi.

⁹Chule agamgi chu Ziphron geija kilhunga, Hazarenan'a kilhunglut ding; hichu sahlama nagamgiu hiding ahi.

¹⁰Chule nangho solam gamgi chu Hazarenan'a patna Shepham geija namelchih diu,

¹¹Chule gamgi chu Shepham'a pat A-in solam sanga Riblah'a kilhunglha ding, chule agamgi chu kilhungsuh-a, Chinnereth solam dil gei lhungding,

¹²Chule agamgi chu Jordan geija kilhung lha-a, chule akilhungdoh ho Chi twipia kilhunglut ding; hichu nangma gam kimvela nagamgi hiding ahi.

¹³ Chuin Mosi'n Israel chate thu apen, Hiche gamhi nanghon vang sanna nalodiuva Pakaiyin phung ko hole phung kehkhat ho anapeh chu ahi.

¹⁴Reuben chate aphung kailhah le apu apateu insung dungjuija, chule Gad chate aphung kailhah le apu apateu insung dungjuija, amahon alodingu gou chu amu-u ahitai, chule Manasseh phung keh khat jong aloding dolu chu changa ahitaove:

¹⁵Phung nile phung keh khat hochun achandingu chu Jordan hilamsang, Jericho nai solamsang, nisa sona lamsang amutaovin ahi, ati.

¹⁶Chuin Pakaiyin Mosi henga thu aseijin, hitin ati,.

¹⁷Hichehohi nanghon nalodingu gam nahop khenpeh dinghou min chu: Eleazar thempupa le Nun chapa Joshua ahi.

¹⁸Chule nangman nalodiu gam hopkhen peh dinga aphung takipma kona pipui khat cheh nalhendoh dingu ahi.

¹⁹Amaho min chu hiche hi ahi: Judah phunga Jephunneh chapa Caleb;

²⁰Simeon chate phunga, Ammihud chapa Shemuel;

²¹Benjamin phunga kona Chislon chapa Elidad;

²²Chule Dan chate phung lamkai Jogli chapa Bukki;

²³Joseph chate phung lamkai, Manasseh chate phunga dingin, Ephod chapa Hanniel;

²⁴Chule Ephraim chate aphung lamkai, Shiphtan chapa Kemuel;

²⁵Chule Zebulun chate phung lamkai, Parnach chapa Elizaphan;

²⁶Chule Issachar chate phung lamkai, Azzan chapa Paltiel;

²⁷Chule Asher chate phung lamkai, Shelomi chapa Ahihud;

²⁸Chule Naphtali chate phung lamkai, Ammihud chapa Pedahel ahi.

²⁹Hichehohi Pakaiyin Canaan gama Israel chate gouchan hoppeh dinga athupeh hochu ahi.