Read Thado Chin Minbu 35 Bible Online

Minbu 35 - Thado Chin bible

Minbu 35

¹ Chuin Pakaiyin Moab phaicham Jordan gal Jericho naija chun Mosi henga thu aseijin, hitin ati.

²Israel chate chu agou chanhou lah-a kona Levi miho chen nading khopi apeh nadingun thu pen, chule nanghon Levi miho chu khopiho kimvela gam op-ho chu napeh dingu ahi.

³Chule khopiho chu achenna dingu hintin, chule agam op-hou chu agancha hou, athilkeu hou, aganhing hou jouse-a ding hiding ahi.

⁴Chule nanghon Levi miho napeh dingu gam op-ho chu, khopi kulbanga pat polam tong sangkhat kimvel hiding ahi.

⁵Chule khopiho pamlam chu nate dingu, solam sanga tong sangni, lhanglam sanga tong sangni, lhumlam sanga tong sangni, chule chunglam sanga tong sangni hiding, akhopi chu alailunga umding, hichehohi amaho dinga khopiho gam-op hiding ahi.

⁶Chule nangman Levi miho napehding khopiho lah-a chu hoidohna khopi gup, tolthatpa jamlutna dinga nalhendoh ding; chule amaho dinga khopi somlileni nabedingu ahi.

⁷Chitia chu Levi miho napeh dingu khopiho jouse chu khopi somlileget hiding, amaho chu agam op-toh napehtha diu ahi.

⁸Chule nanghon napeh diu khopiho chu Israel chate losa ho-a kon hiding; atam neiho-a kona natampeh diu, alhom neiho-a kona nalhom pehdiu: amitakip min Levi miho chu analo akhopihou dungjui cheh-a apeh dingu ahi, ati.

⁹Chuin Pakaiyin Mosi henga thu aseijin, hitin ati,.

¹⁰Israel chate henga thu seijin lang, ajah uva, Nangho Jordan gal Canaan gamsung nahung galkai tengule,

¹¹Nanghon nangho dinga hoidohna khopi dinga khopiho na kilhendoh diu; chutia chu kiningman louva khattou tolthatna chu chulama jamthei ding ahi.

¹²Chule hicheho chu nangho-a dinga phula dingho-a kona nahoidohna diu hiding; houkhom ho thutanna anga adin tokahse-a mithat chu athi louna ding hiding ahi.

¹³Chule nanghon napehdiu khopi holah-a kona gup chu nangho dinga hoidohna hiding ahi.

¹⁴Nanghon Jordan hilam sanga khopi thum napeh uva, Canaan gamsunga khopi thum napeh diu; hichu hoidohna khopi ho hiding ahi.

¹⁵Hicheng khopi gup chu, Israel chate le namdang hoding, chule alah uva khopemdenho agomuva dinga hoidohna hiding, kiningman louva tolthat chan chulama jamthei ahi.

¹⁶Chule aman thih manchah khatna amachu avoh-a, athitah-a ahile, ama chu tolthat ahitan; tolthat chu thatei teiding ahi.

¹⁷Chule athina theija, aman songa asekhah-a, athitah-a ahile, ama chu tolthat ahitan; tolthat chu thatei tei ding ahi.

¹⁸Ahiloule aman thina khopma thing manchah khutchoi khatna avoh-a, ama athi tah-a ahile, ama chu tolthat ahintan; tolthat chu thatei teiding ahi.

¹⁹Thisan phulapa amatah chun tolthatpa athading; aman ama chu amu mule atha ding ahi.

²⁰Ahinla muda mana asotlhuh ham, ahiloule achanlhih-a thilkhat touva asea, athitah-a ahile,

²¹Ahiloule kidouna jeh-a akhutna avoh-a, ama athitah le; ama vopenpa chu thatei teiding ahi. Ajehchu ama tolthat ahitan: thisan phulapa chun amuteng le atha ding ahi.

²²Ahinla aman amachu kidouna beija hetman louva asotlhuh ham, ahiloule changlhi louva ama chunga thil khattou asekhuma ahile,

²³Ahiloule mikhat thinathei khop song khat touva amapa chu mulouva asekhah-a, ama athitah-a; ahia ama chu akidoupi jong hilou chule suhgenthei dia jong ahol hilou ahile,

²⁴Houkhom ho chun mithat pale thisan phulapa kikah-a thutanna dan dungjuija thu atan dingu ahi.

²⁵Chule houkhom ho chun mi thatpa chu thisan phulapa khutna kona ahuhdoh uva, houkhom ho chun ama chu ajamna hoidohna khopi-a chu agathah diu; chule ama chukoma chu thaotheng kinu thempu chungnungpa thi kahse-a umjing ding ahi.

²⁶Ahinla tolthat pa chu ajamna lam, ahoidohna khopi gamgi pam polama, ahungpotdoh khah-a;

²⁷Chule thisan phulapa chun hoidohna khopi polama amapa chu amua, thisan phulapan mithatpa chu atha-a ahile; amachu thisana themmo chang louding ahi.

²⁸Ajehchu ama hoidohna khopi sunga chu thempu chungnung thi tokahse-a umthim behding ahin, thempu chungnung thi nung teng vangle mithatpa chu alosa agam sunga hung kinung lekit ding ahi.

²⁹Chutichun hicheng jousehi nangho dinga nakhang khanguva, nachena mun jouseuva chondan hiding ahi.

³⁰ Koi hijongle mi khattou thatna aumle tolthatpa chu ahetoh ho kama kona thajeng ding ahi. Ahinla mikhattou thana dinga achunga hettohsah khatnin photchena aneilou ding ahi.

³¹Chukal vallin nanghon thinakhop hella mochang tolthat chu lhatdohna dinga kilhatdohna nalah lou dingu ahi, ajehchu ama chu thatei teiding joh ahi.

³²Chule hoidohna kulpi-a jampa chu thempupa thikah-a, gamsunga chengdia ahung kile theina dinga, ama dinga kilhatdohna nalah theilou diu ahi.

³³Hitia chu nanghon nachen nao gam chu nasuh boh loudiu, thisan jeh-a gam chu boh-a ahin; thisan lonna gam chu kisutheng joulou ahin; amavang thisan sopa thisana bou kisutheng thei ahi.

³⁴Hijeh chun nachena diu gam, keima chenna chu suboh hih-un: ajehchu keima Pakai Israel chate lah-a cheng jinga chu kahi.