Read Thado Chin Minbu 36 Bible Online

Minbu 36 - Thado Chin bible

Minbu 36

¹Chuin Gilead chate insung mi upaho, Machir chapa Manasseh chapa Joseph chapate insung miho chun, Mosi angle lamkai ho anga, Israel chate upaho masang ahin naijun, aseitaovin ahi:

² Chuin amahon, Chaten vang sanna alodiu gam chu pedingin Pakaiyin ka pakai thu anapen; chule kasopipa Zelophehad gouchan chu achanute pehdingin ka pakai hi Pakaiyin ana thupeh tai.

³Tun amaho chu Israel chate phung dangho chatetoh kicheng tale, agou loding hou chu kapa tehouva kona kiladoh-a amaho kichenpi phungho gouchan chuto kigoppeh ding ahin; chutia chu vang dungjuija kagou chanuva kona kiladoh ding ahitai;

⁴Chule Israel chate Jubilee ahunghi tengle, amaho gouchu amahon akichenpiu phungho gou chutoh kigop thading ahitan; chutia chu amaho gou chu kapu kapatehou phungho goulah-a kona kiladoh ding ahitai, atiuve.

⁵Chuin Mosi'n Israel chate chu Pakai thupeh dungjuijin thu apen, hitin ati, Joseph chapateho phungin aseiju chu adih lheh-e.

⁶Zelophehad chanuho chungchanga Pakaiyin thu apeh chu hitihi ahi, Amaho pha asah penpenu chutoh kichengu hen, ahinla apu apateu phung sunga ho kichen piu hen:

⁷Chuti chu Israel chate gouchan chu phung khatna kona phung khatna kichon lele louding ahi; ajehchu Israel chate tapou chun amatah-in apu apatehou gou chu anga dingu ahi.

⁸Chule chanu tapou, Israel chate sung koiphung hitale gouloa chun, hiche apa phung insung khatna chu inneipi hiding, hitia chu Israel chate takip min apu apateu gou chu alothei dingu ahi.

⁹Gou chu phung khatna kona phung khatna kichon lele louding; amavang Israel chate phung khat cheh chun ama ama gou akinga dingu ahi, ati.

¹⁰Chuin Pakaiyin Mosi athupeh bangchun Zelophehad chanute chun abol taove;

¹¹Ajehchu Zelophehad chanute Mahlah, Tirzah, Hoglah, Milkah, Noah chu apateo sopiho chapate toh akicheng taovin ahi.

¹²Chuin amaho Joseph chapa Manasseh chapate insung miho toh akicheng taovin, agouhou chu apateu insung phunga chun aumdentan ahi.

¹³Hicheho hi Jericho naija Jordan pang Moab phaija Israel chate henga Mosi khutna Pakai thupeh, thupeh ho le thutannaho chu ahi.