Read Thado Chin Minbu 4 Bible Online

Minbu 4 - Thado Chin bible

Minbu 4

¹Chuin Pakaiyin Mosi le Aaron henga asejin, hitin ati,

²Kohath chapate mijat chu Levi chapaho lah-a kon le a-insung chule apu apateo insung dungjuijin,

³Kum somthuma lhah chunglam kum somnga gei houkhom ho houbuh sunga natohna tongdinga pangthei nalai jouse chu simdoh lhonnin.

⁴Hichehi houkhom ho houbuh sunga Kohath chapaten thiltheng chungnung penho chungchanga atohdiu kin chu hiding ahi:

⁵Houbuh chu akichondoh ding tengle, Aaron le achapate chu hunguva muntheng chungnunga kikhai pondal chu aloilhah uva, hettohsahna thingkhong chu akhukhum dingu ahi.

⁶Chule hichu satwilut vuna akhu khumuva, chule apumpia chu pondum khat akhukhum diu, chutengle ajolho chu athollut dingu ahi.

⁷Chule vetsahna changlhah dokhang chunga chu pondum khat apha uva, chule hiche achunga chu kongho, thihkheho, sum lhengho, chule asinna ding asinho akoi dingu: chule tanglouhela kikoijing changlhah chu chuche chunga umding ahi.

⁸Chule amahon hicheho chunga chu ponsanthip khat aphadiu, chule hichemama chu satuilut vunho-a akhukhum muva, chule ajolho chu athollut dingu ahi..

⁹Chule amahon pondum khat alah uva alhacha natoh naova kimangcha meivah khom le athaomei, avutloho, akongho, chule chua um athaobelho jouse chu akhukhum diu:

¹⁰Chule amahon hiche chu le umle belho jouse chu satuilut vunho-a akhukhum uva, ajol chunga chu akoidiu ahi.

¹¹Chule sana maicham chung chu pondum khat na akhu khumuva, hichu satuilut vun khuna-a akhudiu, chule ajolho chu avodiu ahi.

¹²Chule amahon munthenga akin bolnaova kinbolna manchaho jouse chu pondum khatna akoijuva, satuilut vun khuna akhudiu, chule moljol chunga akoidiu ahi.

¹³Chule amahon maichama kona vut hochu alahdoh uva, chule achunga ponsandup khat apha diu:

¹⁴Chule hiche chunga chu amahon kinbolna-a amanchah-u umle belho jouse, gimnamtui halnaho, sathuhna thihkhe kaho, vutloho, twibel ho, chule maichama um thiljouse chu satuilut vun khuna ho-a akhuva, moljol ho avodiu ahi.

¹⁵Chule houbuh chu akichondohna dinga, Aaron le achapaten muntheng le asunga um le bel jouse akhukhum jou tengule; Kohath chapate chu apudinga hungdiu: amavang amahon athilouna dinguva thiltheng tapou chu atohkhah loudiu ahi. Hichehohi houkhom ho houbuh-a Kohath chapate pohding chu ahi.

¹⁶Chule Aaron thempupa chapa Eleazar tohding chu; meija vahding thao, gimnamtui, nitin anneh thilto, nuding thao, chule houbuh pumpi leh asunga um jouse, munthenga thil umjouse le chua um le bel ho jouse vetsui ding chu ahi.

¹⁷Chuin Pakaiyin Mosi le Aaron henga thu aseijin, hitin ati,

¹⁸Levi miho lah-a konin Kohath phung insungmite chu paidoh lhon hih-in;

¹⁹Ahinla amahon thiltheng chung nungho anaitengule thilouva ahinthei nadinguva hitia hi nabolpeh lhon ding ahi. Aaron le achapate chu lutnuntin, atohdiu kin le apohdiu cheh agotpeh diu:

²⁰Amavang thilthengho akikhukhum pet teng, athilouna diuva avedinga lutlou diu ahi.

²¹Chuin Pakaiyin Mosi henga thu aseijin, hitin ati,

²²Gershon chapate mijat chu apu apateo insung pumpi le a-insungu dungjuijin simdoh-in;

²³Lhacha kin bola lutna, houkhom ho houbuh sunga natohna tongthei jouse chu kum somthuma lhah chunglam kum somnga gei jouse chu nasimdoh ding ahi.

²⁴Kinbol le pohgih pohna lam hi Gershon insung mite tohding kin ahi.

²⁵Chule amahon houbuh pondal ho, houkhom ho houbuh, achung khuna, achunga um satuilut vun chung khuna, chule houkhom ho houbuh kotna kikhai pondal,

²⁶Chule inhong sunga pondal ho, houbuh kom le maicham kimvela um inhongsung kotpi kotkhah-a pondal kikhaiho, akhaoho, chule akinbol naova manchah jouse le amaho dinga kisem jouse chu apohdiu ahi. Hitia chu amahon kin chu aboldiu ahi.

²⁷Gershon chapate natoh jouse, apohdiu jouse le akinboldiu jouse chu Aaron le achapate thupeh-a kona aboldingu ahi: chule nangman apohdiu jouse-a dinga thuneina napehding ahi.

²⁸Hiche hi Gershon insung chapatehon houbuh sunga atohdiu kin chu ahi. Chule amaho natoh jouse chu Aaron thempupa chapa Ithamar mopohna noija umding ahi.

²⁹Merari chapate chu ahile, a-insung hou le apu apateo insung kailhah dungjuija nasimding;

³⁰Kum somthuma pat chunglam kum somnga gei, houkhom ho houbuh sunga natong dinga, kinbolna-a lutsese chu nasimding ahi.

³¹Chule amaho mopohna chu hichehi hiding ahi; houkhom ho houbuh sunga anatohnao dungjuija, houbuh thingpehho, chua um banggol ho, akhompiho, akhom tunnaho,

³²Chule ahongsung kimvela khompiho, akhom tunnaho, akilnaho leh akhaoho, amanchahho jouse pum leh anatohna hou jouse toh pohding ahin; amin cheh uva apoh diu manchah cheh chu nagonpeh ding ahi.

³³Hichehi Aaron thempu chapa Ithamar khut noija houkhom ho houbuh sunga akin jouseu dungjuija Merari chapate insung tohding kin chu ahi.

³⁴Chuin Mosi le Aaron chule houkhom pipuihon Kohath chapate chu a-insungu dungjui le apu apateo insung kailhah dungjuijin asimtaovin,

³⁵Kum somthuma pat chunglam kum somnga gei houkhom ho houbuh sunga natong dinga, kinbolna-a lutsese chu,

³⁶Amaho insung kailhah cheh-a kisimdoh-a chu sangni le jasagi toh somnga ahi.

³⁷Hiche hohi Pakaiyin Mosi khutna kona athupeh dungjuija Mosi le Aaron'in Kohath insungmi teho jouse houkhom ho houbuh sunga kin natong dinga asimdoh lhon chu ahi.

³⁸Chule Gershon chapateho a-insung pumpiu, apu apateu insung kailhah dungjuija kisimdoh ho,

³⁹Kum somthuma pat chunglam kum somnga gei, houkhom ho houbuh sunga natong dinga kinbolna-a lutsese chu,

⁴⁰Chuti chun a-insungu pumpi le apu apateu insung kailhah-a kona kisimdoh chu sangni le jagup toh somthum ahi.

⁴¹Hichengse hi Gershon chapate insungho-a houkhom ho houbuh sunga kinbolna jouse-a natongthei cheh dinga Mosi le Aaron'in Pakai thupeh dungjuija asimdoh lhon chu ahi.

⁴²Chule Merari chapate insung, apu apateu insung kailhah dungjuija a-insung pumpiu kisimdoh ho chu ahi.

⁴³Kum somthuma pat chunglam kum somnga gei houkhom ho houbuh sunga natong dinga, kinbolna-a lutsese chu,

⁴⁴Hitichun a-insungu dungjuija kisimdoh chengse chu sangthum le jani ahi.

⁴⁵Hichengse hi Pakaiyin Mosi khutna kona athupeh dungjuija Mosi le Aaron'in Merari chapate insung anasimdoh lhon chengse chu ahi.

⁴⁶Mosi, Aaron chule Israel lamkai pipuihon a-insungu dungjui, apu apateu insung kailhah dungjui cheh-a anasimdoh hou chengse chu,

⁴⁷Kum somthuma lhah chunglam kum somnga gei, kinbolna lhacha natohna le houkhom ho houbuh sunga lhacha kinbona dinga hungchan chu,

⁴⁸Hitia amahoa kona kisimdoh jouse chu sang get le janga toh somget ahi.

⁴⁹Pakai thupeh dungjuijin Mosi khutna konin amitakip chu atohdiu kin dungjui cheh leh apohdiu dungjui cheh-in asimdoh un, hitichun Pakaiyin Mosi anathupeh bangin amaho chu asimdoh tan ahi.