Read Thado Chin Minbu 5 Bible Online

Minbu 5 - Thado Chin bible

Minbu 5

¹Chuin Pakaiyin Mosi henga thu aseijin, hitin ati,

²Miphah takip, athilong takip le, thilonga suboh chan chu ponbuh polama anodoh nadiuvin Israel chate thu pen:

³Alaitah-a ka chenna aponbuh hou asuhboh louna diuva, nangma pasal le numei agoma nanodoh-a, ponbuh polama nakoidoh ding ahi, ati.

⁴Chuin Israel chaten chutichun abolun, amaho chu ponbuh polama akoitaove. Pakaiyin Mosi jah-a anasei bang chun Israel chaten aboltauvin ahi.

⁵ Chuin Pakaiyin Mosi jah-a thu aseijin, hitin ati,

⁶Israel chate jah-a seipeh in, Pasal ahiloule numei khattouvin Pakai douna-a mihemin abolji chonset itobang hijongle abol tengle, hitobang mi chu themmo changa ahin,

⁷Chutengle amahon achonset bolu chu aphondoh dingu, chule aman asuhkhelna chu lhingsetna aledit ding, hichea chu hopnga-a hopkhat abe-a, anasuhkhelna pa chu apehding ahi.

⁸Ahinla asuhkhel ditdohna ding mipa chu inko neilou ahile, asuhkhelna chu Pakai hengle thempu heng ngeija ledit hen; longlhenna kelngoichal simlouva, ama dinga longlhenna khat semding ahi.

⁹Chule Israel chatehon thempu henga ahinchoi ju ahintou thiltheng hou jouse chu ama-a hiding ahi.

¹⁰Chule amitakip thilto kisuthengho chu ama-a hiding; itobang hile mi khattouvin thempupa apeh tapou chu, ama-a hiding ahi.

¹¹Chuin Pakaiyin Mosi henga thu aseijin, hitin ati,

¹²Israel chate jah-a seipeh in lang hitihin tin, Pasal khattou aji ajammanga, amapa douna-a suhkhel abola,

¹³Pasal khattou amanutoh alup khoma, hichu ajipa mitmu-a kona akisel manga, aki-imchah-a, chule amanu akisuhboh-a, amanu chunga ahetoh aumlouva, chule amanu matdoh ahilouva;

¹⁴Chule amapa chunga thangthipna lhagao achuh-a, akisuboh-a a-inneipi chu athang thippi khah tah-a; ahiloule amapa chunga thangthipna lhagao achuh-a, ana kisubohlou a-inneipi chu athang thippi khah tah-a ahile;

¹⁵Chuteng mipa chun a-inneipi chu thempupa henga apuiding, amanu dinga thilpeh suhlou chang anneh ephah hopsom ma hopkhat ahinchoi ding; amapan achunga thao asunlou ding, bego jong akoilou ding ahi; ajehchu hichehi thangthip thilpeh, hetjingna thilpeh le, khanset geldoh jingna thilpeh ahi.

¹⁶Chule thempupa chun amanu chu akom naija apuilutna, Pakai masanga adinsah ding:

¹⁷Chule thempupa chun twitheng leibela ahindopma; houbuh lhonga leivui chu alah-a, twilah-a chu alhahlut ding;

¹⁸Chule thempupa chun numeinu chu Pakai anga adinsah-a, asam alhaplhah peh-a, akhutna chu thangthipna thilpeh, hetjingna thilto chu akoi ding: chule thempupa chun akhutna sapset konsah twikha chu akidop ding ahi.

¹⁹Chutengle thempun amanu kihahsel sah-a, amanu jah-a chu, Koimachan naluppi louva, na-inneipu khela midangtoh thanhoi na-a navamang lou ahile, hiche sapset konsah twikha-a konhin ongtholin:

²⁰Amavang na-inneipu khela midang henga vahmanga, nakisuh boh-a, chule na inneipu tailou midang khattouvin naluppi-a ahileh:

²¹Chutengle thempupa chun numeinu chu sapsetna kitepna khatna akitepsah-a, chule thempu chun numeinu jah-a, Pakaiyin napheipi amonsah-a, chule na-oipi apohsah tengle, Pakaiyin namite lah-a nangma gaosap le hahselna nachansah hen;

²²Chule hiche sapset kona twihin na-oipi pohsah ding le napheipi monsah dinga na-oipi sunga lutding ahi, atiding; chule numeinu chun Amen, Amen, atiding ahi.

²³Chule thempupa chun hiche sapsetna hochu lekhabu khatna ajihlutna, chule aman hicheho chu twikha-a chu asoplhah ding ahi.

²⁴Chule aman numeinu chu sapset konsah twikha chu adonsah ding, chule sapset konsah twi chu amanu sunga lutna hungkha ding ahi.

²⁵Chujouteng thempu chun thangthipna thilpeh chu numeinu khutna kona alah-a, thilto chu Pakai masanga ajapma, maicham chunga ato ding ahi.

²⁶Chule thempu chun thil kitohdoh, hetjingna ngeitah chu khutdim khat achoija, maicham chunga ahalvam ding, chujou tengle aman numeinu chu adonsah ding ahi.

²⁷Chule aman amanu chu twi adonsah tengle hitiding ahi, hichu, amanu kisuboh ahia, a-inneipu douna-a suhkhel nei ahile, sapset konsah twi chu asunga lutna, hungkha-a, a-oipi hungpoma, chuleh apheipi hungmon lhading: chuleh numeinu chu amite lah-a sapset chang hitading ahi.

²⁸Ahinla numeinu chu akisuhboh lou ahi-a, athensel ahivangle; amanu chu ongthola, son le pah aneiding ahi.

²⁹Hichehi inneipi khat a-inneipu khela michom henga achea akisuboh tenga dinga thangthipna dan ahin,

³⁰Ahiloule ama chunga thangthipna lhagao ahung uma, ajinu chunga thangthipna nei ahile, numeinu chu Pakai masanga adinsah ding, thempupa chun amanu chunga hiche dan jousehi atoh bulhit ding ahi.

³¹Chutengle mipa chu khangitlouna-a kona ongthola, numeinu chun ama khangitlouna chu akipoh ding ahi.