Read Thado Chin Minbu 6 Bible Online

Minbu 6 - Thado Chin bible

Minbu 6

¹Chuin Pakaiyin Mosi henga thu aseijin, hitin ati,

²Israel chate lah-a seipeh-in lang, ajah uva, Pasal ahiloule numei Pakaiya dinga atumbeh hiding, Nazir mikhat hina dinga kitepna-a kitep dinga akichomkhen tengule;

³ Amachu ju le khamna theija kona kikangse ding, juthuh ahiloule khamnathei juthuh adonlou ding, lengpiga ju tapou hijongle adonlou ding, chule lengpiga athah hihen alui hijongle anehlou ding ahi.

⁴Akichom khenna nikhoho jouse-a chu lengpiguija kona kisem, amuho-a patna ahoh changeija kisem ipi hijongle anehlou ding ahi.

⁵Akichom khenna akitepna nikhoho jouse-a chu aluchanga samchem chulouding ahi. Chule Pakaiya dinga akipehdohna nikhoho abulhit masangse-a ama chu atheng hiding, chule alua asamlom jong akhansah ding ahi.

⁶Pakaiya dinga akichom khenna nikhoho sungse-a chu aman mithilong anailou ding ahi.

⁷Aman apa ham, anuham, asopipa ham ahiloule asopinu ham athi tengle, amale ama kisuboh louding ahi; ajehchu a-Pathen suhthengna chu aluchanga uma ahi.

⁸Akichom khenna nikhoho sungse-a chu ama Pakaiya dinga atheng ahi.

⁹Ahin mikhattou akoma photlotna athi jeng tah-a, Pathen'a akipeh thengna aluchu abohtah-a ahile, akisuhtheng nikho nile alu ahettol ding, anisagi nile ahettol ding ahi.

¹⁰Chule aniget lhin nile aman houkhom ho houbuh kotbula thempu henga chu vakhu nou ni ahiloule vapal nou ni ahinchoi ding;

¹¹Chule thempupa chun khatchu chonset thilto-a ato-a, chule khat chu govam thilto-a atoding, chule amadinga chu longlhena abolding ahi; ajehchu mithilong jeh-a achonsea ahin, chule hiche nima ma-a chu aman alu akisuhtheng ding ahi.

¹²Chule akichomkhena nikho hochu Pakai henga suhthengna dinga, kumkhat lhingsa kelngoinou chal khat suhkhel thilto-a dinga ahinkai ding ahi. Amavang akichom khenna abohtah jeh-a chu amasanga nikhoho chu moh hiding ahitai.

¹³ Chule hichehi Nazir mikhatnin akichom khenna nikhoho alhin teng abolding dan chu ahi: amachu kimutona houkhom ho houbuh kotna chu hung kipui ding:

¹⁴Chule aman Pakai henga govam thilto-a todinga kumkhat lhingsa nolnabei kelngoinou chal khat, chonset thilto-a dinga kumkhat lhingsa nolnabei kelngoinou chal khat, chule chamna thilto-a dinga kumkhat lhingsa nolnabei kelngoinou chal khat apehding,

¹⁵Chule cholsolou changlhah pocha khat, thao toh kihal changbong neljet changlhah phengkhat, thao kinu-a pasetna kisem cholsolou changlhah khat toh, anneh thilto le donding thilto apehding ahi.

¹⁶Chule thempu pan hicheho chu Pakai masanga ahinchoi ding, chule aman chonset thilto le govam thilto chu atoding:

¹⁷Chule aman kelngoichal chu Pakai anga chamna ganlhaina thilto-a dinga cholsolou changlhah pocha khattoh atoding: Thempu pa chun a-anneh thilto le adon thilto jong atoding ahi.

¹⁸Chule Nazir mi chun houkhom ho houbuh kotna chu akichom khenna lu chu akivoding, chule akichom khenna melchihna asam chu alah-a, hichu gan lhaina chamna thilto ho noija um meisunga aselut ding ahi.

¹⁹Chule thempu pa chun akihonminsa kelngoichal chu adah khatle pocha-a cholsolou changlhah lum khat, chule cholsolou changlhah paset khat alah-a, hicheho chu akichom khenna sam avojou tengle Nazir pa khutna apehding ahi.

²⁰Chule thempu pa chun hicheho chu Pakai anga jap thilto-a dinga ajapding ahi: hiche hi le jap thilto-a dinga kitoh a-om le amal chu thempu-a dinga atheng ahi. Chujouteng lehin Nazir mi chun lengpitwi adonthei ding ahitai.

²¹Hichehi akitepma Nazir mi-a dinga dan le, akhutnin aphal dungjuija apeh ho simlouva, akichom khenna-a dinga Pakai henga athilpeh ding chu ahi: kitepna-a akitep banga chu akichom khenna dan dungjuija aboltei ding ahi.

²²Chuin Pakaiyin Mosi henga thu aseijin, hitin ati,

²³Aaron le achapate jah-a chun hin seijin, Hiche dungjuija hi Israel chate chu phatthei naboh uva, ahenguva hitia nasei dingu ahi,

²⁴Pakaiyin nangma phatthei naboh henlang, naching jinghen,

²⁵Pakaiyin nachunga amai vahsah henlang, nachunga lungsetna neijinghen,

²⁶Pakaiyin nachunga amai hinlah henlang, chamna napejing hen.

²⁷Chutia chu amahon Israel chate chunga kamin akoidiu; chule keiman amaho phatthei kabohding ahi.