Read Thado Chin Minbu 8 Bible Online

Minbu 8 - Thado Chin bible

Minbu 8

¹ Chuin Pakaiyin Mosi jah-a aseijin, hitin ati,

²Aaron jah-a thu seijin lang, Nangman meivah navah tengle, meivah sagi chun meivah khom masangtah chu asalvah ding ahi, tin seijin ati.

³Chuin Aaron'in hitichun abolin, Pakaiyin Mosi athupeh bangchun meivah ho chu meivah khom masanga avahtan ahi.

⁴Hiche meivah khom kisem dan chu sana kikheng ahin, akhom topala pat apah geichu akikheng ahi: Pakaiyin Mosi anavetsah dan bang bang chun, aman meivah khom chu asemin ahi.

⁵Chuin Pakaiyin Mosi jah-a aseijin, hitin ati.

⁶Israel chate lah-a konin Levi ho chu lhengdoh inlang amaho chu suthengin.

⁷Chule amaho suhthenga aumna diuva hitia hi nabolding ahi: achunguva suhthengna twi chu thekhumin lang, amahon atipum piuva amul jouseu chu avolhah diu, chule aponsilu akisop uva, hitia chu amaho kisuhtheng dingu ahi.

⁸Chutengle amaho chun bongchalgol khat le anneh thilto, thao toh kihal changbong neljet ngei chu kilah-uhen, chule nangman bongchalgol dang khat chonset thilto dinga nalah ding ahi.

⁹Chule nangman Levi ho chu houkhom ho houbuh maija nahinpui ding: chule Israel chate khoppi pumpi chu nakhop khom sohkei ding ahi.

¹⁰Chule nangman Levi ho chu Pakai anga nahin puija, chule Israel chaten amaho chunga chu akhut angap dingu ahi.

¹¹Chule Pakai lhacha na atoh doh theina dinguva, Aaron'in Levi ho chu Israel chate-a kon thilto khat banga Pakai angsunga atodoh ding ahi.

¹²Chule Levi hon akhutnu chu bongchal teni luchunga angapdiu; chule nangman Levi ho longlhenna dinga bongchal khat chu chonset thilto-a dinga nato-a, chule khatpa chu govam thilto-a dinga nato ding ahi.

¹³Chule nangman Levi ho chu Aaron le achapate masanga natousah-a, amaho chu Pakai henga thilto banga natodoh ding ahi.

¹⁴Hitia chu Levi hochu Israel chate lah-a kona nakhendoh ding: chule Levi ho chu keija hiding ahiuve.

¹⁵Chujou tengle Levi ho chu houkhom ho houbuh lhacha natong dinga lutdiu: chule nangin amaho chu nasuh thenga, thilto khat banga natodoh ding ahi.

¹⁶Ajehchu amaho apumpiuva Israel chate lah-a kona keima eikipe ahitan; naobu takip phukeh ho jouse khel, apeng masa jouse khela keiman amaho keija dinga kana kilah ahitai.

¹⁷ Ajehchu Israel chate lah-a kon apeng masa jouse mihem hihen lang, gancha hile keija ahi. Keiman Egypt gama apeng masa jouse kathagam nikho-a chu amahohi keija dinga kasuhtheng ahitai.

¹⁸Chule keiman Levi hohi Israel chate apeng masa ho jouse khela kalah ahi.

¹⁹Chule Israel chaten muntheng ahinnai tengule, Israel chate lah-a hise umlouna dinga; keiman Levi ho hi Israel chate lah-a kona Aaron le achapate henga houkhom ho houbuh-a Israel chate lhacha natong ding le Israel chate-a dinga longlhenna boldinga thilpeh banga kapeh ahitai.

²⁰Mosi le Aaron chule Israel chate houkhom ho jouse chun Levi mite chungchanga Pakaiyin Mosi athupeh jouse bangin Levi ho chunga chun abolun, Israel chate chun amaho chunga chutichun abol taovin ahi.

²¹Chuin Levi miho akisuthengun, avonhou akisop thengun; Aaron'in amaho chu Pakai angsunga thilto bangin atoh doh-in; chule Aaron'in amaho suhtheng nadingin longlhenna abolpeh tan ahi.

²²Chuin hiche jou chun Levi miho chu houkhom ho houbuh sunga Aaron le achapate masanga lhacha natong dingin alut taovin ahi: Pakaiyin Levi ho chung changa Mosi athupeh bangin, amahon hitichun achunguva abol taovin ahi.

²³Chuin Pakaiyin Mosi henga thu aseijin, hitin ati,

²⁴Hiche hi Levi mite thudol ahi: kum somni le nga-a lhah chunglamse houkhom ho houbuh-a sunga lhacha natong dinga lutdiu ahi.

²⁵Chule kumsom nga alhin tengule lhacha natohna-a kona kicholdodiu, atohbe loudiu ahitai.

²⁶Hijongle houkhom ho houbuh-a chu asopi hotoh ngaichat ahinaova lhachana atoh khomdiu, amavang lhacha kin abol loudiu ahi. Hitia chu Levi miho chu atohdiu nagonpeh ding ahi, ati.