Read Thado Chin Minbu 9 Bible Online

Minbu 9 - Thado Chin bible

Minbu 9

¹ Egypt gama kona ahung potdoh nungu kumni lhinna, lha masapen-in Pakaiyin Sinai gamthipma Mosi henga aseijin, hitin ati.

²Israel chaten akitep phat dungjuijin kalchuh kut mang jingu hen.

³Hiche lha nisom le nili ni, nilhah lam, akitep phat tah-a hi naman dingu; chondan kisun jouse le akibolding dan jouse dunjuija naman dingu ahi, ati.

⁴Chuin Mosi'n Israel chate chu kalchuh kut aman nadingun aseipeh tan ahi.

⁵Chuin amahon lhamasa nisom le nili ni nilhah-in Sinai gamthipma chun kalchuh kut chu amangun, Pakaiyin Mosi athupeh jouse dungjuijin, Israel ten hitichun abol taovin ahi.

⁶Chule mi phabep mithilong jeh-a kisuboh aumun, hicheni chun kalchuhkut anitthei tapouvin ahi. Chuin amaho hicheni chun Mosi le Aaron masanga ahungun;

⁷Chule hiche miho chun ajah-a, Mithilong jeh-a suhboh-a um kahiuvin; ibola Israel chate lah-a akitep phat sunga Pakaiya thilpeh kapediu kijahda ham? atiuve.

⁸Chuin Mosi'n ajah uva, Khongaita diuvin, keiman nangho chung changa Pakaiyin thupeh aneijam ngaijing kate, ati.

⁹Chuin Pakaiyin Mosi jah-a aseijin, hitin ati,

¹⁰Israel chate jah-a seipeh inlang, hitin seijin, Nalah uva ahiloule nachilhah hou lah-a mikhattou thilong khat jeh-a athenlouva, ahiloule kholgamla tah-a um hijongle, amachun Pakaiya kalchuhkut aman thouthou ding ahi.

¹¹Lhani lhinna nisom le nili nilhah lamle aman dingu, cholsolou changlhah le anche kha toh amediu ahi.

¹² Amahon hichu khatcha jong jingkah geija akhenlou diu, agujong khatcha asuhboh loudiu: kalchuhkut kiman dingdan jouse dungjuija aman diu ahi.

¹³Ahin mikhat chu atheng ahia, chule kholgama che jong ahilouva, ahia kalchuhkut mangding anoplouva ahile: amatah chu amite lah-a kona paidoh-a umding ahi; ajeh chu aman akitep phat sungin Pakaiya dingin thilpeh ahinchoipon, hichepa chun achonset akipoh ding ahi.

¹⁴Chule nalah uva namdang mi ahung kholjin auma, ama chun Pakaiya kalchuhkut manding anople, kalchuhkut kiman dingdan dungjuija le chonna ngai dungjuija amanding ahi: nanghon namdang mi ding le agama peng denpa-a dinga dan khatseh naneidiu ahi.

¹⁵Chuin houbuh kitundoh ni chun ponbuh, hettohsahna ponbuh chu meilom'in atomin ahi. Chule nilhah lamin houbuh chung chu meikong bangin, jingkah geijin aumin ahi.

¹⁶Chutobang chun aumjing jengin ahi: sunle meilom'in atomin chule jan le meikongin akilangjin ahi.

¹⁷Chule meilom chu houbuh akona lahtouva aum tengle, Israel chate chu akitol jiuvin, chutengle meilom kingahna mun'a chun Israel chaten ponbuh akison jiuvin ahi.

¹⁸Pakai thupeh dungjuijin Israel chate akitol jiuvin, chule Pakai thupeh dungjuijin gehbuh akison jiuvin; meilom chu houbuh chunga aum laisen apon in houva akicholnga jiuvin ahi.

¹⁹Chule houbuh chunga meilom chu nitampi aumteng le, Israel chaten Pakai thupeh anitnun, akitoldohji pouvin ahi.

²⁰Meilom chu houbuh chunga chu ni lhomcha aum kom jongle chutobang chun abolun ahi; Pakai thupeh dungjuijin amaho aponbuh uva aumun, chule Pakai thupeh dungjuijin akitol jiuvin ahi.

²¹Hitichu ahin, meilom chu nilhah-a pat jingkah gei auma, hiche meilom chu jingkah-a akilah-a ahile amaho akitol jiuvin ahi. Sun hihen jan hijong le meilom chu akilahdoh tihtih le amaho akitol jiuvin ahi.

²²Ahiloule nini hihen, lhakhat hihen, ahiloule kumkhat hijongle, meilom chu houbuh chunga auma, aumdena ahile, Israel chate chu aponbuh houva aumun, akitol ji pouve: ahin hichu akilah doh tengle, akitol jiuvin ahi.

²³Pakai thupeh dungjuijin amaho ponbuh-a akicholdo jiuvin, Pakai thupeh dungjuijin akitol jiuvin ahi; Pakaiyin Mosi khutna athupeh dungjuijun, amahon Pakai thu chu anitjiuvin ahi.