Read Thado Chin Micah 2 Bible Online

Micah 2 - Thado Chin bible

Micah 2

¹Khangitlouna thilgongho, ajalkhun chunga thilse bolho chu ohe adao ahi! akhutnuva boltheina umma ahijeh-in, jingkah kho hungvah teng hichu aboljiuve.

²Chule amahon mi lou athang setnun, pumhatnin alahpeh-un; chule inho athangset nun, alahpeh-un; chutichun amahon mihem le a-in, amihem le anei agouho asugenthei jin ahi.

³Hijeh chun veuvin, hiche insung douna dingin thil gilou kagongin; hiche phat hi phat phalou ahijeh-a chua kona chu nangongu naheithei lou dingu, hoitho tah-a naumthei lou dingu ahi, tin Pakaiyin aseije.

⁴Hicheni chule mikhatnin nangho douna-a thulem khat aseija, lunghem tah-a ka la-a nakacham uva; eikisumang theng helluva ahitai, kamite gouchan chu akheldoh tai; Aman hichu keija kona iti ana chon mang ahitadem! aman kagam hou chu akaleh in eihop khenpeh taove, tia aseidiu ahi.

⁵Hijeh-a chu nangin Pakai houkhom na-a khaova vang kisanna chan homding koima naneilou dingu ahi.

⁶Gao hih-un, tin gao thusei ho henga seijuvin; amaho henga chu amahon gaothu aseiloudiu, chule amahon jachatna atoloudiu ahi.

⁷Vo nangho Jacob insung tia kiminvote, Pakai lhagao chu nahsah mo-a uma ham? hichehi ama natoh hi jaham? Kitah-a chonpha chunga chu kathu hohin thilpha abolji hilou ham?

⁸Ahinla tumapan louvin kamitehi melma bangin nabolun; nangman gal deilou mongtah-a vahle ho chu galmuna kon hung kileho bangin avonu le asangkhol cholu nasutlhah peh-in ahi.

⁹Kamite numei ho chu a-in'u nomtah ho-a konin nanodoh un, kaloupina chu achateuva konin a-itih-a dingin naladoh taove.

¹⁰Hikom munhi nakicholdo nao mun ahilou jeh-in, kipat un lang potdoh-un; ajehchu hichehi akisuboh ahin, hichun nangho nasuhmanguva, melse tah-a nasuh gamheldiu ahi.

¹¹Mikhat chun lhagaovin vahle hen adihlouvin jou bol henlang, keiman lengpitwi le ju thu-in naheng uva gaothu seijinge, tile, ama chu hiche mite themgao hiding ahi.

¹²Vo Jacob, keiman nabon chaova kakhop khom teidingu ahi. Keiman thonlouva Israel amoh chengse chu kakhop khom ding, keiman amaho Bozrah kelngoi banga kakoi khoma, hongsunga kelngoihon banga kakoi khomding; amaho mipi tamtah jeh-a husan nasatah aso dingu ahi.

¹³Asusepa chu amasanguva ahungdoh-e; amahon asuseuvin, chule kotpi chu ajotpaijun, chua chun achedoh taove; chule alengpao chu amasanguva chea, Pakai chu amaho luchang hiding ahi.