Read Thado Chin Micah 3 Bible Online

Micah 3 - Thado Chin bible

Micah 3

¹Chuin keiman, Vo Jacob luchangho, chule Israel insunga pipuiho, ngai phaovin, naheng uva katao ahi, nanghon thutandih nahet dingdolu hilou ham? kati.

²Nangho apha hot bolla ase ngailuho, amaho-a kon avunu naleolhah peh-un, aguhouva konin atahsapheo nakhoh lha uvin;

³Kamite sajong nane uvin, amaho-a kon avunu naliplhauvin; chule bella lhah ding bangle belpi sunga lhahding bangin aguhou navochip un, aphe-u nachen bong selun ahi.

⁴Chuteng amaho Pakai henga penguntin, hijongleh aman amaho angaipeh lou ding; athil bollule amaho tah chonna phatlou jeh-a, aman amaho-a kona amai jengjong aselding ahi.

⁵Kamite lamvai sah-a, chamna umhen tia samma, aha uva pet; akamuva ima henglouva pa douna-a galsat dinga kigo themgaoho thudolla; Pakaiyin hitin aseije.

⁶Hijeh chun mu naneilou helna diuva nangho dinga jan hunglhung ding, chule ai nasan theilouna dinguva nachung uva mu thim ding, chule themgaoho chunga nisa lhumma, amaho chunga chu sun jong thim ding ahi.

⁷Chutengle themgaoho chu jahchao vintin, Ai themho chu maimoh dingu; henge, Pathen'a kona donbutna aumtah loujeh-a, amahon akamu akisipdiu ahitai.

⁸Ahinla Jacob henga asuhkhelna, Israel henga achonsetna phonpeh dingin, Pakai lhagaova konin tahbeh-in thilboltheina, thutanna chule hatna-in kadimset tan ahi.

⁹Nangho Jacob insung luchangho leh Israel insung pipuho, thutanna hotbola, thudih akaleh-a heiho, naheng uva katao ahi, hichehi ngai phaovin.

¹⁰Amahon Zion chu thisan aso uvin, Jerusalem chu khangitlouna asouve.

¹¹Chukoma vaipoho chun thilpeh kineppi na-in thu atannun, chule thempuhon tohman mun'a dingin ahilun, themgaoho chun sum deinan agaovui. Achutijeng vangin, Pakai chu eiho lah-a uma hilou ham? Ichunguva thilphalou hunglhung ponte, atiuvin Pakaiya akingaijun ahi.

¹² Hijeh-a chu Zion chu nangho jala lou banga kikaija, Jerusalem chu thilboh kisevum hung hiding, houin umna molsang chu gamlah-a munsang ho bangding ahi.