Read Thado Chin Micah 4 Bible Online

Micah 4 - Thado Chin bible

Micah 4

¹Ahinla ninunung lamleh hunghiti ding ahi, Pakai in umna molsang chu molsang ho chung vuma hung kisadoh ding, lhangvum hoa choisanga hung umding; chule hia chu mipi ho twilona longlut dingu ahiuve.

²Chule namtinho chu hunguvin tin, hungun, Pakai molsanga kaltouvu hitin, Jacob Pathen in'a chun kaltouvu hite; aman alampiho chu eihil untin, eiho alampia chu ichediu ahi; Zion'a kon chun danthupeh potdoh intin, Pakai thu chu Jerusalem'a kona hungpotdoh ding ahi.

³ Chule aman mitamtah thu atana, chule gamla tah-a nam hattahho chu aphosal ding; chuleh achemjamu chu lou kaina ha-a akhendiu, chule atengcha hou chu kangkuija akhendiu ahi; nam khatnin nam khat chunga chemjam lamtapontin, galsat jejong kithemchuh tapouvinte.

⁴ Ahivangin mi jouse ama ama lengpi theile theichang phung noija touvuntin, koima chan kichatsah tapou vinte; ajehchu janel Pakaiyin akamcheng tah-a aphondoh ahi.

⁵Ajehchu mi jouse ama Pathen min cheh-a chonuntin, chule eiho Pakai i-Pathen'u mina atonsot atonsotna ichon lediu ahitai.

⁶Pakaiyin hitin aseije, hicheni chuleh keiman elbaiho khom ingting, akinomang saho kakhopkhoma, chule kasuhgentheiho chu kakhop khom ding ahi;

⁷Chule elbaiho chu ahingdoh amoh-a kasemding, gamla tah-a kipaidoh ho chu nam hattah khatna kasem ding ahi; tua patna Pakaiyin Zion molsanga tonsotna achunguva vai ahomding ahi.

⁸Chule Vo nangma, ganchaho insang, Zion chanu umna kuldet, nahenga hunglhung ding ahi, navaihom na masa jongchu hunglhung ding ahi; lenggam chu Jerusalem chanute henga hunglhung ding ahi.

⁹Tu-a ibolla awthong jeju-a naka ham? nalah uva leng umlou ham? nangma nathumop ji-a chu mang thah-a hitam? ajehchu numei naosonat banga natna-in naphah ahitai.

¹⁰Vo Zion chanu, naonei dingin chanei dinga naosonat thohgim bangin thohgimin; ajehchu khopi-a kona tu-a napotdoh-a, loujaova nachen ding, chule Babylon geipeh-a nache ding ahi. Chukoma chu huhdoh-a naum ding; chukoma chu namelmaho khutna kona Pakaiyin nahuhdoh ding ahi.

¹¹Tunjong nangma doudin nam tamtah akikhom taovin, amanu suhboh-in umhen lang, imitnu hin Zion vehen, atiuve.

¹²Ahinla amahon Pakai lunggel ho chu ahepouvin, athumopna jong ahethem pouve; ajehchu pholla changphal ho banga amaho chu akhop khomding ahi.

¹³Vo Zion chanu, thouvin lang chillin, naki chu thih banga kasem ding, natin chu sum-eng banga kasem ding ahi; chule mi atama tam ahalhalla nasuhchip ding; chule ahamphatnao Pakaiya dinga kakatdoh ding, chule athilluhou chu leiset pumpi Pakaiya dinga kakatdoh ding ahi.