Read Thado Chin Micah 5 Bible Online

Micah 5 - Thado Chin bible

Micah 5

¹Vo galsat mihonpi chanu, tun nangman galsatmi ahona din kigom khomin; aman eiho dounan kulpi eikaikhum taovin; amahon Israel thutanpa chu molla angeiphe avohdiu ahi.

² Ahinla nangma, Bethlehem Ephrathah, nangma Judah gam sang tamtah lah-a neocha hijongle chun, nangma-a kona kami Israelte lah-a vaipo ding khat hungsoh doh ding; ahung kipatna chu masanglaipeh, tonsotna pat ahitai.

³Hijeh-a chu aman naosonat thohnun cha ahindoh kahse-a, amaho chu donlouva akoija adalhah ding ahitai; chutengle asopite ahingdoh amoh chengse chu Israel chate henga hung kile kit dingu ahi.

⁴Chule ama chu dingin tin Pakai thahat na-a chu kivah ding; Pakai a-Pathen loupina-a minna chu kivah ding; chule amaho umjing dingu ahitai; ajehchu tu-a ama chu leiset kolmong geija loupi ding ahitai.

⁵Chule Assyria miho chu igam sunguva hi ahunglut tengule, hiche mipahi kichamna chu hintin; chule aman ileng inpihou ahin chotpha tengleh, eihon ama doudinga kelngoi ching sagi le pipui get itun dohdiu ahi.

⁶ Chule amahon Assyria gam chu chemjam'a asuhgamuva, Nimrod gam chu ahunglut na-a asuhgam diu; chutia chu ama igam sunguva ahunglutna, igamgisung hou achotpha tengle, Assyria mite-a kona eihuhdoh dingu ahi.

⁷Chule Jacob'a ahingdoh amoh chengse chu, mipi tamtah lah-a Pakaiya kon daitwi le hamhing chunga goju banga umding ahiuve; hichun mihem angahpon, chule mihem chapate jong angah pon ahi.

⁸Chule Jacob'a ahingdoh amoh chengse chu mipi tamtah lah chidang namdangte lah-a gammang lah gamsaho lah-a keipi bahkai tobang hidiu, chule kelngoi hon lah-a keipi bahkai khangdong tobang hi ding ahi; Amachu avahlen ahile, achonlhun chule abottelin, koima ahuhdoh jou aumpoi.

⁹Nakhut chu nakidoupi te chunga kidomsang ding, chule namelmaho chu kisatlha ding ahi.

¹⁰Chule hiche ni chule hunghiti ding ahi, Keiman nalah uva kona nasakol hou chu kasat chapma, chule nakangtalai hou chu kasuhmang ding ahi, tin Pakaiyin aseije.

¹¹Chule keiman nagam uva khopiho chu kasat gama, chule nakhopi det jouseu kasuhchim ding ahi.

¹²Chule keiman nakhutna mitpheldoi themho chu kasatlhah ding, chuleh nangman phunsan ho naneilou ding ahitai.

¹³Nalah uva kona namilim semthu hou kasatlhah ding, chule namilimu dinglaiho kasat lhah ding ahi; chule nanghon nakhutsemhou chu nahou kit tahlou heldiu ahi.

¹⁴Nalah uva kona nathing milimhou chu kabodoh ding, chutiachu nakhopihou chu kasuhmang ding ahi.

¹⁵Chule Pathen hephalouho chunga, anajahkhah louvu lunghang tah-a phulahna le lungsatna kalhunsah ding ahi.