Read Thado Chin Micah 6 Bible Online

Micah 6 - Thado Chin bible

Micah 6

¹Tun nanghon Pakai thuseihi ngaijun; kipat doh unlang molsang ho masanga nachung thu galhutnun, lhangho chun na aw-u ngaijuhen.

²Vo nangho, molsang jousen, Pakai nelkalna chu ngaijun, chule nangho leibul dettahhon ngaijuvin, ajehchu Pakai chun ami Israelte toh kinel kalna aneijin, chule ama Israelte toh kinel ding ahi.

³Vo kamiteho, nangho-a dinga ipi kanabolem? chule hoilaija kana suhchol khah uvem? neihin donbutnun.

⁴ Ajehchu keiman Egypt gamma konin nangma kahin puidoh-in, chule soh hina insunga konin kalhat doh-in, namasanguva Mosi, Aaron chule Miriam kasole.

⁵ Vo, kamiteho, Pakai chonphatna chu nahet theina dinguva, Moab lengpa Balak thumop le, Beor chapa Balam'in Shittim'a kona Gilgal geija adonbut dan chu, tuhin geldoh uvin.

⁶Pakai anga chu ipitoh kahunga, Pathen chungnung anga chu kakunding ham? kum khatbep bongnou leh govam thilto toh ama anga chu kahung ding ham?

⁷Pakai chu kelngoichal sang tamtah jeh-a lunglhaija, ahiloule thaotwija long vadung sangsoma lunglhai dingham? Kasuhkhel jeh-a kacha masapen chu kapeh-a, kahinna chonset jeh-a kalaigil ga chu kapeh ding ham?

⁸Vo mihem, aman apha chu navetsahsa ahitan; Pakaiyin nangma-a kona angeh chu navetsah ahitai; dihtah-a na natoh-a, hepina nakhoh sah-a, chule kineosah tah-a na-Pathen toh lam najotkhom ding chu hilou ham?

⁹Pakai aw chu khopi heng lama akisamin, chihna nei mihon namin amu dingu ahi; Nanghon tenggol le alheng dohpa thu ngaijuvin.

¹⁰Migiloupa ina chu gitlouna goubom um nalaija, thil tena dihlou thet umtah chu um nalaijem?

¹¹Khaikot dihlou pumle lheplhahna khaodip gihtah puma chu amaho athenga kasim ding ham?

¹²Ajehchu chukoma mihaoho chu hunam dimset ahiuvin, chule chua chengho chun jou thu aseijun, akamuva aleiju chu lheplhah na dimset ahi.

¹³Hijeh-a chu kenjong nang kavoh-a kanatsah ding, nachonset naho jeh-a agohkeova kalha ding nahi.

¹⁴Nangman nen natin, ahivanga nava louding; chule lhahsamna chu nalai lunga umding ahi; nangman tuhdet ding somin natin, ahivanga nahuhdoh jou louding ahi; nahuhhing chasun jongchu keiman chemjam henga kapeh doh ding ahi.

¹⁵Nangman tun natin, ahivanga na-at louding, olive gaho chu chillin natin, ahivanga athao chu nakinu lou ding, lengpitwi lhumkeija nasemding, ahivanga nadon lou ding ahi.

¹⁶ Ajehchu Omri dan kisunho akinit jingin, Ahab insung miho thilbol jouse chu akibol jingin, chule athumop houva nachon jingin ahi; hijeh-a chu keiman nangma ahomkeova kasema, chule chua chengho chu nuijat nopna bep kahisah ding, chutia chu kamite ikisah louna chu napohdiu ahi.