Read Thado Chin Micah 7 Bible Online

Micah 7 - Thado Chin bible

Micah 7

¹Ohe ada kahi! ajehchu keima nipilai theiga ho kilohkhom bangle, lengpiga kilo lhahna nung bangin kaumtai; nehding thei bohla aumtapon, ka hinna'in theiga min masapen angaichan ahi.

²Mipha chu leisetna konin amangthah tan; mihemte lah-a kitah khatcha aumtapoi: abonchauvin thisanso ding ngahin aumun, mitin asopi mandin lenthang toh anung delen ahi.

³Lung luttah-a akhut niuva thilse aboltheina dingu vin, pipuihon thilpeh angeh-un; Thutan hon nehguh angeh-un chule milenpa chun alung ngaichat dihlou chu aseidoh-in, chutichun amaho akithutoh soh uve.

⁴Alah uva miphapen chu khaogui lingnei bang ahin, mikitahpen jong chu meithai seltholing sangin ahemjoi; nakinga tup nikho leh nakivilna nikho chu ahung lhunge, tuhi amaho dinga lungdona hiding ahi.

⁵Loi legol chunga natahsan ngam hih-in, lamhil chunga jong kingai hih-in, na-anga lumnu henga jong namuh kihupmin.

⁶ Ajehchu chapan apa ajatapon, chanu anu doudin akipan tan, mouvin atehpi adouvin, mihem dinga amelmaho chu ama insung miho tah ahitai.

⁷Hijeh chun keiman Pakai henglam vengting, eihuh hingpa Pathen chu kanga ding ahi; ka Pathen'in kataona eingaipeh ding ahi.

⁸Vo kamelma, kachunga kipah hih-in, keima kalhuh teng thou kitding kahi; muthima katouteng, Pakai chu keija dinga vah hiding ahi,

⁹Ama douna kachonset jeh-in, kathu eiseipeh-a, kadinga thu atan masangsen, Pakai lunghana chu potange; aman khovah-a eipuidoh intin, achonphatna chu kamuding ahi.

¹⁰Pakai na Pathen chu koiham? tia sei kamelma nun amu ding, jachat na-in amanu akhuding ahi; kamit tenin amanu chu avetding, lamlena bonlhoh banga amanu chotpha-a umding ahitai.

¹¹Nabangho kisahna ding nikho, hiche nikho chule thupeh chu gamla tah-a kichondoh ding ahi.

¹²Hiche nikho chule ama Assyria gama konle khopi det ho-a kon, chule kulpi-a pat vadung gei, twipi apat twipi gei, amol alhanga kona nahenga hungding ahi.

¹³Ahijeng vangin, chuche gam chu asunga chengho jehle, athilbol ga hou jeh-a agohkeova umding ahi.

¹⁴Carmel gammang lailunga, lunghem tah-a achanga cheng nagoulo kelngoihonho, chule namite chu namoltumin vah-in; masang laija bang chun, Bashan le Gilead na kivah uhen.

¹⁵Egypt gama kona nahung potdoh laija banga chu ahenga thil kidangtah kavetsah ding ahi.

¹⁶Namtinin hichu muvintin, athahatna jouseu chu ajachat pidiu; amahon akhutnuva akamu akisip diu, anao ngong ding ahi.

¹⁷Amahon gul bangin leivui leh untin, leija ganhingho banga akohouva kona hung kitholdoh diu; amahon Pakai i-Pathen'u chu akichatnuva, nangma jeh-a agindiu ahi.

¹⁸Nang banga khangitlouna ngaidama Pathen koi uma, chule agoulo amoh chengse suhkhelna chelep sah-a koi umam? hepina akipapi jeh-in, alunghana a-itih-in aching jingpoi.

¹⁹Ama hungkilekit nintin, ichunguva khotona aneiding, ikhangit lounao hochu anemse ding; chule nangman achonset nahou jouse twipi thuh tah-a nalelut ding ahi.

²⁰Nangman khanglui laija kapu kapateu henga nathu tepsa, Jacob henga thutah le Abraham henga hepina chu namolso ding ahi.