Read Thado Chin Nahum 1 Bible Online

Nahum 1 - Thado Chin bible

Nahum 1

¹ Nineveh khopi pohgih. Elkosh mi Nahum themgao thilmu lekhabu.

²Pathen hi thangthip tah le phulaji Pakai ahin; Pakaiyin phu alanjin, chule alungsajin ahi; Pakaiyin akidoupite chunga phu alahding, chule amelmate din alunghana akholin ahi.

³Pakai hi lunghang vahlou, thahat nasatah nei ahin, chule mi khangilou chu talen pelouva akoilouhel ding ahi. Pakaiyin chimpei le khopi hui lah-a lampi aneijin, chule meilhang hohi akeng phang dinga leivui tobang ahi.

⁴Aman twipi aphoh-in, akansahjin, vadung jouse akansah jin ahi; Bashan le Karmel agolhatan, Lebanon pahcha amol gamtai.

⁵Amasanga molsang ho akihotnin, lhangho ajunlha tan, chule a-angsunga leiset akalhan, vannoi leiset le asunga cheng jouse jong ahi.

⁶Alunghana masanga ding thei dinga koiham? chule alungsatna khoh tah-a um thei dinga koiham? alungsatna chu meikong bangin ahung kibung lhan, chule songpi ho chu aman asonlha jin ahi.

⁷Pakai hi apha ahin, lungkham nikho-a kulpidet ahi; ama tahsanna mite chu aman ahejingin ahi.

⁸Ahinla twisoh longlet lhaleova amun chu akichaihel sah ding, chule muthimin ama melmate chu adelding ahi.

⁹Nanghon Pakai douna-a ipi nagelu ham? Aman akhonna hela achaina asemding; anivei chana dinga kisuh gentheina sohdoh kit lou ding ahitai.

¹⁰Ajehchu ling banga amaho thakhatna akihelkop laijule, jukham ho banga ju akham laijuva, changkong gosel banga amaho mahthah ding ahiuve.

¹¹Pakai douna-a thilse ngaito jing, mi khanggilou thumopthem khat, nanga kona hung peng doh ding ahi.

¹²Pakaiyin hitin ati; amaho lung mongin umu hen, chutobang chun tamtah hijongleu, aman alah-u ahinjotpa tengle chutobang ma-a chu suhmanga umding ahiuve. Keiman nangma nanasulunggim jongleng, kasuh lunggim kit louding nahitai.

¹³Ajehchu tu-a hi keiman ama namkoljon chu nanga kona kaheboh ding, chule nakihena chu kasa tanding ahi.

¹⁴Chule namin hi a-itih-a akiphah pohkit louhelna dingin, Pakaiyin nachung changa hin thupeh apen ahi. Na pathen ho insunga kona akikhentho le akilhahtho milim ho chu kasuhmang helding; nangma thet umtah mi nahijeh-a, nalhan kasempeh ding nahi.

¹⁵ Vetan molsang chung ho-a chamna thu phonglea, kipana thupha polepa keng chu! Vo Judah, na kut thupi ho chu phaten nitnin lang, nakitepna ho chu tong doh-in. Ajehchu mikhang gilou chu nahenga hung louhel ding ahitai; ama chu mit hella kisumanga ahitai.