Read Thado Chin Nahum 2 Bible Online

Nahum 2 - Thado Chin bible

Nahum 2

¹Ahal halla suchipjipa chu namasanga ahungtai: kulpi chu kiven phatnin, nalampi vephan, natai kigah detnin, nathahatna chu nasatah-in kisem phatnin.

²Ajehchu Pakaiyin Israel chungnunna alahmang banga, Jacob chungnunna jong alahmang ahitai: ajehchu michom gam hon amaho achomgamu ahitan, chule alengpigui bahhou chu suhmanga uma ahitai.

³Amihat hou lum chu aki susan gamtan, mihangsan ho von chu asanthip tan ahi; akigot nikho le asakol kangtalai hou chu meikou vahleng lung tobang hiding, chule chah thingphung ho chu tijat umtah-a kihot ling ding ahi.

⁴Sakol kangtalai ho chu khopi lamlen ho-a lung hang tah-a lhaile diu, amaho khatle khat lam lhongpi ho-a kineh todiu: amaho meivah lengle bangdiu, chule kolphe banga lhaile diu ahi.

⁵Aman amilen ho chu ahetdoh ding; amaho alamjot naova kipal lhudiu; amaho kulbang lam jona chu kino tah-a chediu, kivenbitna chu kisemtup ding ahi.

⁶Vadung ho-a kotpi ho hondoh-a hung umding, leng inpi chu suhmanga umding ahi.

⁷Chule Huzzab chu gal hinga kipui mang ding, khoukhah-a hung umding, chule asoh numeiten a-op achup dingu, vakhu aw banga maopuma apuilediu ahi.

⁸Ahinla Nineveh hi masang laija chu twikul tobang anahin, hijongle amaho jam mang ding ahiuve. Dingun, dingun tia amahon asapdio, hijongle koiman anungvet lou ding ahi.

⁹Nanghon akichom doh dangkale sana chu kilah-un; ajehchu neile gou hin beitih aneipon, Thil manlut tahtah honjong beitih aneipon ahi.

¹⁰Ama ahomkeo, pannabei le man theilou chu ahitai: Chule lungthim ajunlha tan, khup teni akitatton, tai jouse-a natna khohtah achun, chule amaiju abonchan adup gamtan ahi.

¹¹Koimachan asuh linglaolou keipi bahkai, keipi teh, chule anou valena mun, Keipi bahkai ho chenna mun le keipi donglai ho kivahna mun chu hoilai hitam?

¹²Keipi bahkaijin anoute ding khambep-in ahal hallin asat telin, chule keipi nu-a din alolla apet lih-in, akosungho chu asamat ho-a adipmin, chule akulsung chu sa adimin ahi.

¹³Ven, keiman nangma kadouve tin janel ho Pakai chun aseije, keiman asakol kangtalai ho chu meikhu-a kahal lhah ding, chemjamin na keipi bahkai donglai ho chu asat chapding: chule leisetna kona nasamat ho chu kasuhmanga, nathupolepa awgin chu kijakit louhel ding ahitai.