Read Thado Chin Nahum 3 Bible Online

Nahum 3 - Thado Chin bible

Nahum 3

¹Thisan sona dim khopi chu ohe adana-e! hiche-a chun mijoule michom ho adimsetnin, thil kichom ho abei khapon;

²Molla kijepna husa, kangtalai kang lhaigin, sakol ho lhaigin le sakol kangtalai ho kichop gin atangpon ahi.

³Sakol chunga tou mihon achemjamu val lahlah le atengcha hou pahlahlah chu adomsangun; akithatna mihem tamtah aumin, mihem thisa long simjoulou akijamin; alongu kiphong chu abeitih aumpon, amithi long hou chunga chun akipalun;

⁴Hichu kihoisah-a jonthanhoi bol simjoulou notiho, ajonthanhoi bolna-a namtin johmanga doichoi nu, chule adoi choina-a a-insung johmangnu jeh ahi.

⁵Ven, keima nangma douva kahi tin janel ho Pakai chun aseije; keiman nanih chu namaikoh chunga kahodoh pehding; chule nasagohkeo hina chu namtin kamusah ding chule najumna chu lenggam ho kamusah ding ahi.

⁶Chule keiman kidah umtah thilboh nachunga kahin selhah-a, jachat umtah-a kasoding, chule nangma vetset umtah-a kakoiding ahi.

⁷Chule hung hiti ding ahi, mihem namu jouse chu nanga konin jamuntin, chule Nineveh ahomkeovin akijamtai atidiu ahi: chutengle koijin ama akapi ding hitam? Nangma nalhamon dinga chu hoija kahol ding hitam?

⁸Vadungho lah-a ana chengah, akimvel twijin aumkol, twipilen chu akulpia panga, chule akulbang twipilen'a kona umdoh miminthang No-amon mite sanga nangma phajo nahim?

⁹Ethiopia le Egypt chu amanu thahatna ahin, hichu akhonna bei ahi; Put le Lubim chu napanpi-a ahilhone.

¹⁰Hijongle amanu puimangin aumin, gal hinga kaimangin aumtan ahi. Achate donglai hojong chu khopi lamlen ho chungvuma ahal halla chilngemin aumtaove; chule amahon ja um miho-a din vang asanun, chule amilen hou chu thihkhaovin akanun ahi.

¹¹Nang jong ju nakham ding; nangma sela naum ding, melma jeh-a jong nangman thahatna nahol ding ahi.

¹²Namundet ho jouse chu theichang phunga amin masapen theichang ho tobang hiding; hicheho chu akiholinga ahile, anedingpa kamsunga chu khelut dingu ahi.

¹³Vetan, nalah-a um namite hi numei ngen ahiuvin; nagamsunga um kotpi ho chu namelmate ho-a dinga lentah-a hung kihong ding; nabanggol ho meijin akahvam ding ahitai.

¹⁴Umkhuma naum nikho-a dingin twi kithalin, namundet ho chu khodetnin, leingan umna-a chenlang bon ngan chilin, chule cheh kiseho chu sudetnin.

¹⁵Chua chu meijin nakahvama, chemjamin nasat tanding, hichun nangma thinglung banga naneh chaiding ahi. Nangma thinglung banga tamin kisemin, khaokhote banga tamin kisemin.

¹⁶Nangman nasum kolvei ho chu van'a ahsi ho sanga tamjon nasupung tan; thinglungin anesen, aleng mangtai.

¹⁷Napipui hou jong khaokhote bangbep ahiuvin, nagal lamkaite chu nilhah nidaija honpal chunga umji-a khaokhopi ho abangun ahi. Ahin nisa ahungso tengle alengmangun, hoilaija aumu akiheji tapoi.

¹⁸Vo Assyria lengpa, nakelngoi ching ho a-imulhu gamtaove: namilen namilalte chu vutvai lah-a cheng ding ahiuve: namite hi molle lhang chung dungho-a akithecheh gam taovin, chule amaho koiman apui khom pouvin ahi.

¹⁹Nakisuh khah na hin damna aneipon, namaput hi asesoh tan; nakisuh khah thu jajousen nachunga akhut abehdiu ahi. Ajehchu nakhangitlou boljingna koichunga alhun khah louna umem?