Read Thado Chin Habakkuk 1 Bible Online

Habakkuk 1 - Thado Chin bible

Habakkuk 1

¹Habakkuk themgaovin anamu pohgih.

²Vo Pakai, itihchan kakouva, ngaipeh louva neikoi ding ham! hunam-a natoh chungchanga nangma kakouva, nangman huhdoh louva nakoi dingham!

³Ipi dinga khangitlouna neimusah-a, gentheinaho neivetsah ham? Ajehchu gamna le hunama natoh kamasanga aumin, kinah nale kidouna ahung sohdoh tai.

⁴Hijeh chun danthu athahat jou tapon, chule thutana dih himhim aum tapoi: ajehchu migilou hon michonpha chu aumchah taovin; hijeh chun thutan dihlou amachaltan ahi.

⁵ Nanghon Pathen hephalou lah khu veovin, ngaitouvin lang, kidang satah-in datmouvin; ajehchu nanikho hou sunga na khat katohding, hichu nangho nakiseipeh jongleu, natahsan lou diu ahi.

⁶ Ajehchu, veuvin, keiman nam gangtah le engsetah, Chaldea mite katungdoh-e, amaho chun leiset chung achot leova, amaho-a hilou chena munho chu alo dingu ahi.

⁷Amaho chu kichat umtahle tijat umtah ahiuvin; athutan nule aja-umnao chu amahole amaho-a kona sohdoh ahi.

⁸Asakolhou jong lutnuho sangin akaljang jouvin, nilhah lam ngeiho sangin gin aumjouve; asakol chung touhou chu kithejal uva, asakol chung touhou chu gamlatah-a kona hungdiu; amaho chu an nedinga kinotah-a leng muvanlai banga leng dingu ahi.

⁹Abonchauva hunam-a natong dinga hungkon diu; amaiju chu solam hui banga hungdoh ding, chule amahon sohchangho chu neldi banga akhopkhom diu ahi.

¹⁰Amahon lengho chu nahsahmon neijuntin, pipuiho chu amaho totnopna hidingu: amahon kuldet jouse chu anuisat diu; ajehchu leivui avuh khumuva alahjeng diu ahi.

¹¹Chuteng alungthim kikhel ding, apal galkal paipai ding, asuh lungjing ding athahatna chu a-pathen'a kona angaito ding ahi.

¹²Vo Pakai ka Pathen, keija athengpen, nangma atonsotna pat umjing nahilou ham? keiho thipou vinge. Vo Pakai, nangman amaho chu thutan dingin nana sudetnin; chule vo hat chungnung Pathen, nangman suhdih nadingin amaho natungdoh tan ahi.

¹³Nangma thilse vethei louhel mit thengpen, chule khansetna vetheilou nahin; iti danna dihlou tah-a chonho navetthima, mikhang gilouvin amasanga chonphajo michu suhmang ding atiteng thipbeh-a naum ham?

¹⁴Chule iti dana mihemte hi twikhanglen'a ngaho, achunguva vaihom neilouho a-opma kithol thoho, bangbepma nasem ham?

¹⁵Amahon amaho chu abonchan ngakoijin akoidoh-un, alennuva amanun, alen khon houva ahuikhomun; hijeh chun amaho akipah-un athanomun ahi.

¹⁶Hijeh chun amahon alennu henga ganlhaina abollun, alen khonhou henga gimnamtui ahaljiuve; ajehchu hiche ho-a kona chu haodoh uva, anneh nenga ahiuve.

¹⁷Hijeh-a chu amahon alennu chu asuhthenguva, namtin vaipi chu khenlou hella athajom jingdiu ham?