Read Thado Chin Habakkuk 2 Bible Online

Habakkuk 2 - Thado Chin bible

Habakkuk 2

¹Keima galvena mun'a kadina, insang chunga kapansat ding, aman kahenga ipi ahinseija, chule suhdih-a kaumteng, iti kadonbut dingham gavenge.

²Chuin Pakaiyin eidonbutnin, hitin ati, gaothilmu chu asimpan lhaipuma asimthei nadin, songpheng chunga kichehtah-in sunin.

³ Ajehchu gaothilmu chu phat kitepsa sunga ding ahin, hijongle achainale thu asei ding, jou louding ahi; geijep jongleh ngah tadin; ajehchu hunglhung teiding ahin, geisang louding ahi.

⁴ Veovin, ama kichoisanga chu, ahinna ama-a achondih poi; Ahinla midih chu atahsan vanga hing ding ahi.

⁵Chukitmale ama ju-a suhkhelna anei jeh-in, mikiletsah ahin, chule in'a jong aum pon, angaichat chu thilkholkhul bangin akehlenin, chule athi tobang ahin, chimtheilou ahi, ahinla nam jouse ahenga akhom khomin, mijouse chu ahenga asekhomin ahi.

⁶Hicheho jousehin ama douna-a thulem aseijuva, ama douna-a jontaina thuchih, ama-a hilou kholkhompa chule bonlhoh satah-a pohding kisempa chu ohe ada na-e! itih chanpi ahiti theidem? tia aseilou dingu ham?

⁷Nangma napet dingho chu kipatdoh phunguva, nasugenthei dingho chu thoudoh uva, nangma amaho dinga gal thila kichomdoh nahilou ding ham?

⁸Nangman nam tamtah nachomgam jehle, miho thisan naso-a, gamsung, khopi le asunga cheng jouse chunga hunam namanchah jeh-a, mihem ahingdoh amoh chengsen nangma nachom dingu ahi.

⁹Thaneina dihlouva kona akihuhdoh theina dingle, abu sangtah-a akisah theina dinga, kilosetna phalouva a-insung dinga kilosepa chu ohe ada ahi!

¹⁰Mitamtah nasuhgama konin na-insung najumsah-in, chule nahinna dounan chonsea nahitai.

¹¹Ajehchu banga kona song chu pengdoh ding, thinga kon inkam chun ahindonbut ding ahi.

¹²Thisanna khopi sahdoh-a, khan gitlouna-a khopi tungdohpa chu ohe ada ahi!

¹³Veovin, mihon meikong vahna dinga atohgimu chu, janel Pakaiya ding ahipoi; mipi ho chu pannabei dinga kisulung gim dingu ham?

¹⁴ Ajehchu twijin twipi akhubanga, Pakai loupi hetna chun leiset hi alodim ding ahi.

¹⁵Aheng akom asagoh keovu mutheina dinga ju pe-a, juhai tunpeh-a, kham jong khamsah-a michu, ohe ada ahi!

¹⁶Loupina khelin jachatnan nadimtai: nangman jong don inlang, nachep jong chu kihohdoh hen; Pakai khut jetlam khon chu nangma douna-a hungkihei ding, naloupina chunga jachatna sangtah chu ding ahi.

¹⁷Gamsung, khopi sung, chule asunga cheng jouse chunga pumhat naman jeh-a, Lebanon chunga pumhat thilbol, chule miho thisan kiso jeh-a gamsaho kichatsah suhgamna chun nangma nakhu khum ding ahi.

¹⁸Asempan asemthu milim, chule akilhah tho milim, jouthu hila pang, asemtengle asempa chun hichu atahsan, chuche paomo milim chu ipi-a phachom em?

¹⁹Thingjah-a thouvin, song paotheilou jah-a kipat in, hichun ahilding ahi, tipa chu ohe ada ahi! Veovin, hichu sanale dangka-a kiloijol ahin, asunga haitheina hu umlouhel ahi.

²⁰Ahinla Pakai vang chu a-houin theng sunga um ahin, leiset pumpi a-anga thipchet hen.