Read Thado Chin Habakkuk 3 Bible Online

Habakkuk 3 - Thado Chin bible

Habakkuk 3

¹Shigionoth chunga Habakkuk themgao taona ahi.

²Pakai, nathusei kajan, kakicha lheh-e: O Pakai, kumho sunga hin nanatoh hinsuhalin, kumho sungin kihetdohsah in; lunghan na-a hepina geldoh in.

³Pathen chu Teman'a konin ahungin, chule Athengpa chu Paran molsanga konin ahunge. Selah Aloupinan vanho atomin, leiset hi avahchoi na-in adime.

⁴Chule ama vahdan chu nisa vah abangin; akhutna konin vahgui akikhodoh in, chule hichea chun athahat akiselin ahi.

⁵Amasanga hise achen, akengtoa natset khohsetah apohdoh-in ahi.

⁶Ama adingin leiset chu aten; aman aven, chule namtin chu anocheh-in; tonsot molsang ho chu akithe cheh-un, tonsot lhangho chu abohkhupmuve. Alampiho chu tonsotna ahi.

⁷Keiman Cushan ponbuh gimthoh-a aum kamun, Midian gama ponjal ho chu akithingin ahi.

⁸Pakai chu vadungho chunga lunglhailou ham? Nalunghanna chu vadungho chunga uma hitam? Nalungsatna chu twikhanglen chung, nasakol ho, nahuhhingna sakol ho chunga natouna chunga chu uma hitam?

⁹Nathu dungjui, phungho kihahselna dungjuijin nathalpi chu akeoseh-in aumtai. Selah Nangman leiset hi vadungho-in nahomkhene.

¹⁰Molsang ho chun nangma namun, akihot jenguve: twi longlet chu ahin jotpan ahi. Twi thuh chun a-aw ahinsodoh sah-in, chule akhut chunglama adomtouvin ahi.

¹¹Nisa le Lhathah chu aumna-a adingden honin; athalpi chang vah leh, natengcha phelitlet vah-a chun ache honin ahi.

¹²Lungphamo pumin gamsung najotsoh-in, nalunghana-in Pathen hephalou mite nachilgoi tai.

¹³Namite huhhingna dingin nakon doh-in, nathao nusapa huhhing dingin nakondoh tai; abula pat angong geijin nahodoh peh-in, migiloupa inna konin alu namaputsah tai. Selah

¹⁴Nangman ama tenggol ho-a chun akhosung lamkaiteo luchang navohpeh-in; keima sucheh dingin chimpei bangin ahungdoh uve: amaho kipana chu guhthima mivaichaho bahgam dingbou chu ahi.

¹⁵Nangman nasakol'in twikhanglen napal galkaijin, twipi kinong nasatah lah chu napal galkaije.

¹⁶Keiman kajah phat chun ka-oipi akithingin; awgin chun kaneteni akihotnin; kagusunga monna alutnin, lungkhamna nikho-a kakicholdo theina dingin keima kakithingtai. Mipi ho henga ama ahungtou tengle, aman agalsat miho toh amaho chu asat ding ahi.

¹⁷Theichang phung pahhih henlang, lengpi gui aga umhih jongle; olive kibolna tohgimna chu thon henlang, phaileijin anneh sodoh hih jongle; ganhonga konin ganchaho kisugamhel henlang, gan inho-a gancha umhih jongleh;

¹⁸Keivang Pakaiyah kipah jing inting, eihuh hingpa ka Pathen'a kathanop ding ahi.

¹⁹ Pakai Pathen chu kathahatna ahin, aman kakeng hi sajuhpi keng banga asemding; chule aman kamun sangho-a eivale sah ding ahi. La lamkaipa henga, ka tumgingthei akhaonei mangcha-a sah ding.