Read Thado Chin Zephaniah 1 Bible Online

Zephaniah 1 - Thado Chin bible

Zephaniah 1

¹ Judah lengpa, Amon chapa Josiah nikho laija Hizekiah chapa, Amariah chapa, Gedaliah chapa, Kushi chapa Zephaniah henga Pakai thu hunglhung chu.

²Leiset na kon thil jouse kasuhmang ding ahi tin Pakaiyin aseije.

³Mihem le gamsaho kasuhmanga; chungleng vachaho, twipia nga ho, chule kipal lhuhna chu migiloute toh kasuhmang ding; chule leisetna kona mihem kasuhgam ding ahi, tin Pakaiyin aseije.

⁴Keiman Judah chung le Jerusalem'a chengho jouse chunga kakhut kajahdoh ding; chule hiche mun'a kona hi Baal hou amoh chengsele, Chemarim ho min chu thempuho puma kapaidoh ding;

⁵Chule in chung vum ho-a van janel ho chibai bohho; Pakai houva amin panna kihahsel ho, chule Malcham min pana kihahsel ho;

⁶chule Pakaiya kona kinung heiho; chule Pakai hollouho le ama dong louho chu kapaidoh ding ahi.

⁷Pakai Pathen anga chun thip chetnin umun, ajehchu Pakai nikho chu anaitai. Ajehchu Pakaiyin ganlhaina agongin, ajinho chu akoutai.

⁸Chule Pakai ganlhaina nikhole hung hiti ding ahi, keiman pipuiho le lengpa chateho, chule gamchom miho vona kivonho jouse chu talen kapeh ding ahi.

⁹Hiche ni mama chule chang phola kichom ho, apupao in pumhat le lheplhah na-a dipho chu talen kapeh ding ahi.

¹⁰Chule hiche nikho chule hunghiti ding ahi, tin Pakaiyin aseije, nga kotpi-a kona ka awgin, kotpi nichana-a kona ka awgin, chule lhang ho-a kona thil kisukeh gin nasatah kijading ahi.

¹¹Maktesh'a chenga nangho penguvin, ajehchu kivei miho jouse akisugamin; chule dangka choiho jouse akisugam tai.

¹²Chuche phat chule hung hiti ding ahi, keiman Jerusalem chu thaomei mangcha-a kahol ding, juheh-a hingho, alunguva Pakai chun thilpha jong thilse jong bolponte tia seiho chu talen kapeh ding ahi.

¹³Hijeh chun athil hou chu thil kichomdoh soh intin, a-inhou chu kamhel ding: amahon in jong saovintin, alolou dingu, chule amahon lengpilei ho boluntin, hia kona chu lengpitwi adonlou diu ahi.

¹⁴Pakai niloupi tah chu ahung naijin, ahung naijin, akikino lheh-in, chule Pakai nikho husa gin jengjong chu akinolheh-e; chuche nikho chule mihatpa jong chu haka-a kapding ahi.

¹⁵Chuche nikho chu lungsat nikho, lungkham nikho le lung hesoh nikho, manthah na le kisuh kamhelna nikho, muthim le genthei nikho, chule meibol le muthim lhangkhal kiheh nikho ahin,

¹⁶Chule kulpi kikai khum khopi hole, insangho douna-a, sumkon kimut nikho le gal kisap phongna nikho ahi.

¹⁷Chule keiman mihemte chunga hesohna kapohlut ding, amahon Pakai douna-a achonset jeh uva, mitcho banga lam ajotdiu: chule athisanu chu leivui banga kisunglha-a, atahsao chu eh banga kisunglha ding ahi.

¹⁸Pakai lunghan nikho lechun asana hou le adangka houvin alhatdoh theilou diu; amavang agam pumpi chu athang thipna meikongin ahalvam ding ahi. Ajehchu aman chuche gama cheng jouse gangtah-a asuhmang ding ahi.