Read Thado Chin Zephaniah 2 Bible Online

Zephaniah 2 - Thado Chin bible

Zephaniah 2

¹Nangho kikhom khomun, henge, nangho kikhom khomun, vo dei umlou nampi mite;

²Thupeh ahung kipohdoh masang, nikho chu changsi banga alen mang masang, Pakai lunghanna nasatah nachung uva ahunglhun masangin, nachung uva Pakai lunghanna nikho ahunglhun masangin, kikhom khomun.

³Nangho leisetna mikineosah jousen, athutan dihna domsanga Pakai chu hollun; chonphatna holun, kineosahna hollun: chuti henlang hile Pakai lunghan nikho le sella naumthei dingu ahi.

⁴Ajehchu Gaza chu dalhah-a uma, Ashkelon kamhel ding: amahon sunchang laija Ashdod anodoh diu, chule Ekron chu bodoh-a umding ahi.

⁵Twikhanglen panga cheng Chereth nam miteho, ohe ada nahiuve ahi! Pakai thun nangho nadouvun ahi; Vo Canaan, Philistine te gam, koimacha achenga aumlouna dinga, keiman nangma jengjong kasuhmang ding nahi.

⁶Twikhanglen pang chu kelngoi chingho dinga chenna inle, kelngoi honho dinga hong hiding ahi.

⁷Luipang chu Judah insung amohho ding ahin; chua chu amahon akelngoi honhou avahdiu: amaho Ashkelon inho-a chu nilhahle lumjidiu ahi. Ajehchu Pakai a-Pathen uvin aviluva asohchan nao aheimang ding ahi.

⁸ Keiman kamite i-sah louva abolnao, Moab mite i-sah louna leh, Ammon mite housetna kajan, chule agamgiu douna-in akichoisangun ahi.

⁹ Hijeh chun Israel janel Pakaiyin hitin aseije, keima kahin jing bangin, thonlouva Moab chu Sodom bang ding, Ammon chate chu Gomorrah bangdiu, ling nangbohle chi khuhlah hiuva, a-itih-a kamhela umdiu ahi. Kamite kim khat hon amaho chu achomuva, kami amoh chengsen amaho chu alodingu ahi.

¹⁰Hichehohi ahoitho jeh uva aneidiu ahi, ajehchu amaho janel Pakai mite dounale i-sah louna-in akichoi sangun ahi.

¹¹Pakai chu amaho dinga tijat umtah hiding ahi: ajehchu Aman leiset pathen jouse asuhmanga, chule mihem ten ama ahou dingu, mitinin ama mun cheh-a konle twikol gam ho-a milim houho sanin ahoudiu ahi.

¹² Nangho Ethiopia mite jong, kachemjama kithat ding nahiuve.

¹³ Aman sahlam douna-a akhut alhana, Assyria asuhmang ding, chule Nineveh mite chu, gamthip gamgo banga akamhel sah ding ahi.

¹⁴Chule amanu lailunga chu kelngoi honle namtina kon gamsa jouse kol dingu ahi. Twikhanglen vacha hole twivamuhsao ho a-inkam chunga chenguntin; bangkot ho-a a-aw uvin la asahding; kotsangkil jong chu agohkeo hiding ahi; ajehchu aman Cedar thinga kisa jouse ahodoh ding ahi.

¹⁵Hichehi alung sunga, keibou kahi, koima dang aumpoi, tia sei khohsahna neilou tah-a cheng kipahjing khopi ahi: iti dana ama ahomkeova hung uma, ganhingho kolnabep hungsoh-a ahitadem! ajotpa jousen ahuisat khumuva, akhut ajapkhum dingu ahi.