Read Thado Chin Haggai 1 Bible Online

Haggai 1 - Thado Chin bible

Haggai 1

¹ Darius lengchan kal kum nina, alhagup channa, nimasa nin Judah gamvaipo Shealtiel chapa Jerubbabel hengle, Josedech chapa thempu chungnung Joshua henga, Haggai themgaova konin Pakai thu ahung lhungin, aseije,

²Janel Pakaiyin hitin aseije, Hiche mite hin, Pakai houin sahna ding phat chu ahung lhunghih laije, atiuve.

³Chuin Haggai themgaova konin Pakai thu chu ahung lhungin, hitin aseije,

⁴Vo nangho, Hiche houin ahomkeova auma, nangho siling in'a nachenu chu, nangho dinga aphat hinam?

⁵Hijeh chun tun janel Pakaiyin hitin aseije; nalampi hou ngaito temun.

⁶Nanghon tamtah natu uvin, themcha nahin polutnun; naneovin, ahinla na oiva pouvin; nadonun, ahinla nadang nou pouve; pon nakisilun, ahinla lum nasa dehpouve; atha paija lopan sumdip tovanga khum dinga alo ahi.

⁷Janel Pakaiyin hitin aseije; nalampi hou ngaito temun.

⁸Molsang chunga kaldoh-unlang thing hinpuvin, chule houin chu saovin; chutile hichea chun lunglhai jing ting, choisanga kaumding ahi, tin Pakaiyin aseije.

⁹Nanghon tamtahdin nakinem un, ahinla veuvin, themchan bou ahunge; nanghon in nahinlhut tenguleh achung chu kamutji ahi. Ipi din-em? tin janel Pakaiyin aseije. Ajehchu ka-in agohkeova uma, nangho amitakipmin na-in lamcheh nadel jeh-u ahi.

¹⁰Hijeh-a chu nachung uva van chun daitwi atuhtanga, chule leiset chun aga atuhtang ahi.

¹¹Chule keiman gamsung chunga, molsang ho chunga, changle min chunga, lengpigui thah ho chunga, thao chunga, chule aga sodohji leiset chunga, mihem chunga, gancha chunga, chule khutna tonggim ho jouse chunga gamna kakou ahi.

¹²Chujouvin Shealtiel chapa Jerubbabel le Josedech chapa thempu chungnung Joshua, chule mipi amoh chengse chun Pakai a-Pathen'u aw le, Pakai a-Pathen'un ahinsol Haggai themgao thuho chu angaijun, chule mipi chu Pakai angsunga akicha lheh-un ahi.

¹³Chuin Pakai thupole Haggai chun miho henga Pakai thulhah chu aseijin, Keiman nangho kaumpi naove tin Pakaiyin aseije, ati.

¹⁴Chuin Pakaiyin Judah vaipo Shealtiel chapa Jerubbabel lungthim le, Josedech chapa thempu chungnung Joshua lungthim, chule miho lah-a amoh umho jouse lungthim chu asuthouvin; chule amaho ahungun a-Pathen'u, janel Pakai in'a chun na ahung tongun ahi;

¹⁵Hichu Darius lengchan kal kum nina, lhagup channa, nisomni le nili ni ahi.