Read Thado Chin Haggai 2 Bible Online

Haggai 2 - Thado Chin bible

Haggai 2

¹Lha sagina, chuche lha nisomni le ni khatnin, Haggai themgaova konin Pakai thu ahung lhungin, hitin aseije,

²Tun Judah gamvaipo, Shealtiel chapa Jerubbabel, Josedech chapa thempu chungnung Joshua, chule mipi amoh aumsun henga seijin,

³ Masang laija hiche houin loupina masa mukha-a nalah uva koi umem? chule tu-a hi itobanga namu uvem? Hichu akitekah-a ahile namitmuva dinga imachalou hilouham?

⁴Hijongle tun Vo Jerubbabel, hatnin, tin Pakaiyin aseije; chule Josedech chapa, Vo thempu chungnung Joshua, hatnin; chuleh gamsunga mi jousen jong hatnunlang na tongun, tin Pakaiyin aseije; ajehchu keiman kaumpi naove tin janel Pakaiyin aseije.

⁵ Egypt gama kona nahungdoh laijuva kakitepna thu dungjuijin, nalah uva kalhagao acheng jinge, nangho kicha hih-un.

⁶ Ajehchu janel Pakaiyin hitin ati; Khatvei, chomkah louva, keiman van le leiset, chule twipi le gamgo hi kaholing ding ahi;

⁷Chule nam jouse kaholinga, nam jouse ngaichat chu hunglhung ding; chule keiman hiche inhi loupi na-a kadip ding ahi, tin janel Pakaiyin aseije.

⁸Dangka chu keija ahin, sana jong keija ahi, tin janel Pakaiyin aseije.

⁹Hiche in nunung hi amasa sanga lujo ding ahi, tin janel Pakaiyin aseije: chuleh hiche mun'a hi chamna kapeh ding ahi, tin janel Pakaiyin aseije.

¹⁰Darius lengchan kal kum nina, alha ko channa, nisomni le nili nin Pakai thu chu Haggai themgao heng ahung lhungin, aseije,

¹¹Janel Pakaiyin hitin aseije; Tun thempuho chu danthupeh thudol dongin lang, seijin,

¹²Mi khattouvin asangkhol chola satheng chun henlang, asangkholchol chun changlhah ham, meham, lengpitwi ham, thao ham, nehthei poupou ham tongkha taleh, hiche atohkhah thilho chu atheng hintem? tin ati. Chuin thempuho chun adonbutnun, Thengponte, atiuve.

¹³ Chuin Haggai'in, Khattou thilonga kisuhboh hen, hicheho khat hi tongkha taleh, hichu boh intem? ati. Chuin thempuho chun adondutnun, Boh ding ahi atiuve.

¹⁴Chuin Haggai'in adonbutnin aseije, Hiche mite leh hiche namhi kamasanga chuto bang chu ahiuve, tin Pakaiyin aseije; chule chutobang machu akhutnuva atoh jouseu, chule chua athilto hou chu thenglou ahi.

¹⁵Chule tun, naheng uva katao ahi, Pakai houin'a song khat chunga song khat akiset thop masangin, tunia kipat khonung changei ding ngaitouvin.

¹⁶Chuche nikho laija patchun, mikhat thil tena somni kite dinga ahungleh, sombou anaumin; mikhat lengpithei chilna-a bel somnga thaldoh dinga ahungleh, somni bou anaumin ahi.

¹⁷Nakhut soh natoh gimna jouseova lungle nget chule gelchangin kabol gimmun, ahinla keima lama nahung kile deh pouve tin janel Pakaiyin aseije.

¹⁸Tuni hiche lhako chana, nisomni le nili ni-a kipat khonung geiding ngaitouvin, houin bul kiphudoh ni-a pat jengjong hin ngaitouvin.

¹⁹Changsalla chu changchi um nalaijem? Lengpigui le theichang phung chule kolbu theiphung galou hiuva, chule olive thingin aga asodoh loulai ham? Tunia pat nangma phatthei kabohding nahi ati.

²⁰Chule chuche lha nisomni le nili nin, Haggai henga Pakai thu chu ahunglhung kitnin, aseije.

²¹Judah gam vaipo Jerubbabel henga hitin seijin, Keiman vanle lei kaholing ding ahi;

²²Chule keiman lenggam ho laltouna chu kalekhup ding, chule keiman Pathen hephalou lenggam thahatna hochu kasuhmang ding; akangtalai hou le achunga touho kale khupding; chule sakol holeh achunga touho hungkum lhadiu, mitin asopiho chemjam'a lou dingu ahi.

²³Janel Pakaiyin hitin aseije, Hiche ni chule, Vo Shealtiel chapa Kasoh Jerubbabel, keiman kalahding nahi tin Pakaiyin aseije; chule mahor banga kasem ding nahi, ajehchu kalhen nahi, tin janel Pakaiyin aseije.