Read Thado Chin Zechariah 10 Bible Online

Zechariah 10 - Thado Chin bible

Zechariah 10

¹Goju nunung laihin nanghon Pakai henga go thumin; chutile Pakaiyin meilom vahsah intin, loulaija hampa tin cheng chu gotwi apehding ahi.

²Ajehchu semthu milimhon pannabei thu aseijun, doi-aithem hon jouthu amuvin, mang dihlou aseijuvin; amahon ahomkeovin alhamonun ahi. Hijeh chun kelngoihon bangin ama ama lampia acheuvin, kelngoi chingpa umlou jeh-in, amaho alungkham taove.

³Kelngoi chingho chunga chun kalung hang behsehnin, kelchaho chu ka-engbol tai. Ajehchu janel Pakaiyin akelngoihon Judah insung avilin, galbolna sakol phatah bangin aseme.

⁴Ama-a konin inning songpi ahungdoh-in, ama-a konin thihkil, ama-a konin galkapna thalpi, ama-a konin misuh gentheina ho jouse chu ahungdoh-e.

⁵Amaho chu gal kisatna-a amelmate lamlena bonlhoh toh chotbeh-a mihat tah tobang hunghidiu ahi. Chule Pakaiyin aumpi jeh uva gal asatnuva, sakol chung chongho chu kijumso diu ahi.

⁶Keiman Judah insung kahatsah-a, Joseph insung kahuhhing ding: keiman amaho chensah dinga kahin lepui kitding ahi; ajehchu keiman amaho kakhoto-in ahi. Amaho kanapai manglou tobang hidiu ah; ajehchu keima Pakai a-Pathen'u kahin, chule kangaipeh dingu ahi.

⁷Ephraim miho chu mi hattah banguntin, alungu chu lengpitwi kham tobanga thanom ding: achateu vin hichu amuva, kipah dingu; Pakaiya alungu kipah ding ahi.

⁸Keiman amaho dinga huisatding, chule kakhop khomding ahi; ajehchu keiman amaho kalhatdoh ahitan: anapunthei banguva chu pungthei diu ahi.

⁹Chule keiman amaho chu mite lah-a katulut ding: amahon gamlatah-a eihin geldoh dingu ahi; chule achateutoh cheng khomuva, hung kilekit dingu ahi.

¹⁰Keiman amaho Egypt gama konin jong hinle puidoh kitning ting, Assyria'a kona kakhop khom ding; Chule Gilead le Lebanon gama kona kapuilutna, amaho dinga mun akimulou geija kapuilut ding ahi.

¹¹Chule ama gimbolna pumin twipi chu galkaijin tin, twipi kinong chu avoh ding, luipi thuhtah jouse kanggam helding ahi: Chule Assyria hoithona kisunema, Egypt te leng tenggol jong kitolmang ding ahi.

¹²Chule ken amaho chu Pakaiya hatsah ingting, ama minna chesuh chetoudiu ahi, tin Pakaiyin aseije.