Read Thado Chin Zechariah 11 Bible Online

Zechariah 11 - Thado Chin bible

Zechariah 11

¹Vo Lebanon, meijin na Cedar thingho akahvam theina ding, nakot ho hongin.

²Vo chahthing, pengin; ajehchu cedar thingho alhugamtai; ajehchu thing thupi tahtah ho akisuse gamtai: Vo Bashan gangpiho, nangho pengun; ajehchu gammang thingho alhugamtai.

³Kelngoi chingho pen awgin akijai, ajehchu aloupinao akisuhmang tai: keipi bahkai donglai kitumgin akijai, ajehchu Jordan kiletsahna suhsetnin aumtai.

⁴Pakai ka Pathen'in hitin aseije; tha ding kelngoihon ho chu vah-in.

⁵Aneiho tah-in amaho athatjiuvin, themmo akisaji pouve: chule amaho joh-a panghon, Pakai chu nunnom hen; ajehchu keima kahao tai, atijiuve. Amaho achinga pangho tah-in jong akhotoji pouve.

⁶Ajehchu gamsunga chengho chu khoto taponge, tin Pakaiyin aseije. Ahinla veuvin, keiman mitin chu aheng akom khut le alengpau khutna kapehdoh ding ahi. Amahon gamsung chu asat dingu, akhutnuva kona kahuh dohlou ding ahi.

⁷Chule thading kelngoihon ho chu kavahding, vo kelngoihon lah-a genthei, nangma tahjong kavah ding nahi. Chuin keiman keima dingin tenggol ni kalan, khat chu Ahoi kasah-in, khat chu Kikan khom kasah-in; chuin kelngoihon chu kavahtai.

⁸Lha khat sungin kelngoi ching thum jong kasumangin; chule kahinna-in amaho athetnin, amaho hinna-in jong keima eihouve.

⁹Chujouvin ken kaseijin, ken nangho vahponge, athi ding chu thi hen; akisumang ding chu kisumang hen; adang chu amahole amaho sa kinetohen, katitai.

¹⁰Chuin katengol Ahoi kiti chu kalan, mijousetoh kitepna kananei chu kasuhkeh nadingin, katan bonghel tai.

¹¹Chule hiche ni chun hichu abongtai: chule ganhon lah-a agenthei keima eina ngahho chun, hichu Pakai thu ahi, ti ahetauve.

¹²Chuin keiman ahenguva, pha nasah ule, kalo neipeu vinlang; pha nasah lou uleh neipeh daovin, kati. Hichun amahon kalo dingin dangka somthum eitedoh peh taove.

¹³Chuin Pakaiyin kahenga, kaman dinga manpha tah amahon eipeh-u chu, beldengpa henga petan eiti. Chuin dangka somthum chu kalan, Pakai in'a beldengpa chu kapetai.

¹⁴Chujouvin Judah le Israel kah-a kisopitna chu kasuhkehthei nadingin, katengol dang Kikan khom kiti chu kalan, kasu bongheltai.

¹⁵Chuin Pakaiyin kahenga, kelngoiching mingolpa manchah chu lakit nalai jin eiti.

¹⁶Ajehchu vetan, keiman gamsunga kelngoiching khat kahin tundoh ding, amachun akisumang dingho avil lou ding, anouho jong ahol lou ding, agu bongho jong aboldam lou ding, adinglaiho jong avahlou ding ahi. Ahivanga aman athaoho phe chu anehding, chule atinho chu ahal hala asat telding ahi.

¹⁷Phatchomna bei kelngoiching kelngoihon dalha-a chu ohe ada ahi! aban le amit jetlama chemjam chuding: abanchu gotheng hela, chule amit jetlam jong thimdel ding ahi.