Read Thado Chin Zechariah 13 Bible Online

Zechariah 13 - Thado Chin bible

Zechariah 13

¹Chuche nikho teng chule chonsetna le thenlouna jeh-a David insung dingle Jerusalem'a chengteho-a dinga twinah khat hung putdoh ding ahi.

²Hiche nikho chule hunghiti ding ahi, gamsunga kona alim semthuho min chu kasuhbeija, geldoh-a umkit talouhel ding ahi. Chule athemgao houle lhagao bohho chu gamsunga kona kapotdoh sah ding ahi, tin janel Pakaiyin aseije.

³Chule hung hitiding ahi, mi khattou gao thusei aumle, ama hinga anule apa chun ahenga, Pakai mina jou nasei jeh-a nahinlou ding ahi, atilhon ding ahi. Chule ahinga anule apan agao thusei petna chu paihela asutlhon ding ahi.

⁴Chule hiche nikho chule hunghiti ding ahi, themgaoho chu gaothu aseitengule agaothilmu jeh uva jahcha dingu; mi lheplhahna dinga ponham jong akisil tahloudiu;

⁵Amavang, Keima themgao kahipoi, loubol mi kahi; ajehchu kakhangdon apatna gancha chinje min einahil ahitai, atijoh ding ahi.

⁶Chule khat touvin, nakhut ho-a maha hohi ipi itiham? atile, aman, kagol ho in'a kona machang kahi, atiding ahi.

⁷ Vo chemjam, kakelngoi chingpa dounan, kakiloipi pa dounan hung thouvin, tin janel Pakaiyin aseije. Kelngoiho jamchehna dingin, achingpa chu volhun: chule keiman anoute chunga kakhut kalhah ding ahi.

⁸Chule hung hiti ding ahi, gamsung jouse-a hopthum-a hopni kisumanga thidiu, hopthum-a hopkhat bou kikhen ding ahi, tin janel Pakaiyin aseije.

⁹Chule hopthum na chu meija kahin pui galkai ding, dangka kilhatheng banga kalhahthenga, sana kipatep banga kapatep ding ahi. Amahon kamin kou untin, ken kadonbut ding ahi. Keiman, hichehi kamite ahi, katiding, amahon, Pakai chu ka Pathen ahi, atidiu ahi.