Read Thado Chin Zechariah 14 Bible Online

Zechariah 14 - Thado Chin bible

Zechariah 14

¹Veovin, Pakai nikho chu hunglhung ding ahitai, chule nathil chomdoh chu nalah uva kihomjal ding ahi.

²Ajehchu Jerusalem galla dou dinga kigo nam jouse kakhop ding; khopi chu kila-a, inho chu kichoma, numei ho kisuse ding; khopi kehkhat chu sohchanga potdoh diu, mipi amohho chu khopi-a kona kisumang louding ahiuve.

³Chutengle Pakai chu potdoh intin, galsat nikho-a gal asat banga, chuche namho douna-a gal asatding ahi.

⁴Chule chuche nikho chule Jerusalem mai solama um Olive molsanga chu akenga hung ding ding, chule Olive molsang chu solam le lhumlama alaitah-a kehlha-a phaicham lentah hungsoh ding; mol kehkhat chu sahlama, chule kehkhat chu lhanglama kichondoh ding ahi.

⁵Chule nangho molsang phaicham lama najam diu ahi; ajehchu molsang Phaicham chun Azal gei aphah ding ahi. Henge, Judah lengpa Uzziah nikho laija inling kihot masanga najam banguva najam diu ahi: chule Pakai ka Pathen chu hungding, chule mitheng jouse chu nangma toh hungdingu ahi.

⁶Chule hiche nikho chule hunghiti ding ahi, vah chu thenglou ding, thimjong thimlou ding ahi.

⁷Ahinla hichehi Pakai kihetna nikho khat chu hiding, sunjong hilou janjong hilouding ahi: ahinla hunghiti ding ahi, nilhah phatle vah umding ahi.

⁸ Chule hiche nikho chule hiti ding ahi, Jerusalem'a konin hintwi longdoh ding; akeh khat chu solam twipi lama longa, akeh khat lhumlam twipi lama longding, hichu chuhle khala long ding ahi.

⁹Chule leiset pumpi chunga Pakai chu leng chang ding ahi. Hiche nikho chule Pakai khat hintin, amin chu khat hiding ahi.

¹⁰Gam jouse Geba'a pat Jerusalem lhanglam Rimmon gei chu phaicham tobang hungsoh ding ahi. Jerusalem chu kidom sanga, Benjamin kotpi-a pat kotpi masagei le kotpi ningchong gei; chule Hananeel insanga pat lengpa lengpitwi chilna geija chenna hiding ahi.

¹¹ Chule asunga chu miho chenga; avela suhmang hela umkit talou ding, Jerusalem chu bitkeija chenna joh hiding ahitai.

¹²Chule hichehi Jerusalem douna-a gal hinbol mipi jouse chunga Pakaiyin hise alansah chu hiding ahi; Akenga adin laijule apheu junmang ding, amitko sunguva amitnu junmang ding, chule aleiju akam sunguva junmang ding ahi.

¹³Chule hiche nikho chule hung hitiding ahi, Pakaiya kona thunoh lentah alah uva umding; amaho mitinin aheng akom khut amatna, chule akhut chu aheng akom khut douna alap ding ahi.

¹⁴Chule Judah ten jong Jerusalem asatdiu; chule akimveluva Pathen helouho haona sana, dangka, chule ponsil nengtah-a kichom khom ding ahi.

¹⁵Chule chutobang ma chu sakol natna hise, sangan hise, sangongsang hise, sanganchal hise, chule ponbuh ho sunga ganchaho jouse chunga, hitobanga chu natna hise umding ahi.

¹⁶ Chule hung hiti ding ahi, nam jouse Jerusalem doudinga hungho lah-a panglouse chu, kumseh-a lengpa, janel Pakai houdinga cheova, chule houbuh kut mang dinga chejidiu ahi.

¹⁷Chule hitiding ahi, leiset chunga inko jouse, lengpa Janel Pakai hou dinga Jerusalem'a hungtou lou chan chunga chu go julou ding ahi.

¹⁸Chule Egypt gam inko achetou lou uva, ahung daoleh, amahon go amu loudingu; houbuh kut mang dinga chetoulou Pathen houlou ho kijepna ding hise chu chang dingu ahi.

¹⁹Hichu Egypt mite engbolnale, houbuh kut manga hunglou nam jouse engbolna hiding ahi.

²⁰Hiche nikho chule sakol ho ki-o long chunga chu PAKAIYA DINGA ATHENG tia kijih ding; chule Pakai houin sunga bel ho jong maicham angsunga um sumlheng ho tobang hidiu ahi.

²¹Henge, Jerusalem le Judah gama bel ho jouse chu janel Pakai dinga atheng hiding ahitai. Chule ganlhaina neijouse chun hung laovintin, an hona-a aman diu ahi. Chule hicheni chule janel Pakai in'a chu Canaan mi himhim umtalou ding ahi.