Read Thado Chin Zechariah 2 Bible Online

Zechariah 2 - Thado Chin bible

Zechariah 2

¹Keima kakhodah kitnin, kaven, chule akhutna tena khao kichoi khat kamun ahi.

²Chuin kenjong, hoija che nahim? kati. Hichun aman kahenga, Jerusalem avai ite hija, adung ite ahi hetna dinga ate dinga che kahi, ati.

³Chuin veuvin, eikihoupi vantil chu achedoh-in, chule vantil chom khat ama kimupi dingin apotdoh-in,

⁴Chule ahenga hitin aseije, lhaijin, hiche gollhangpa henga khun, Jerusalem chu asunga mihemle gancha atamval jeh-a kulbang neilou khopiho banga chenna hiding ahi, tin gaseijin.

⁵Ajehchu keima ama dinga akimvela mei kulbang banga kauma, chule asunga loupina kahi ding ahi, tin Pakaiyin aseije.

⁶Hei, hung doh-un, chule sahlam gama konin jamdoh uvin tin Pakaiyin aseije. Ajehchu kol ningli-a hui bangin kathejao taove tin Pakaiyin aseije.

⁷Babylon chanutoh chengkhom Vo Zion, nangma kihuh doh-in.

⁸Ajehchu, janel Pakaiyin hitin aseije; loupina jou chun, nachom gamuva namho henga chun keima eisolin ahi. Ajehchu nangho tongkha-a chun amit laivom atohkhah ahi.

⁹Ajehchu veuvin, keiman achunguva kakhut kathin ding, chule amaho asohteu dinga galthil kichom hidiu ahi: chutengle nanghon keimahi janel Pakai hinsol kahi nahetna dingu ahi.

¹⁰Vo Zion chanute, la saovin lang kipah-un: ajehchu veuvin, kahunge, chule nalah uva kachen ding ahi, tin Pakaiyin aseije.

¹¹Hiche ni chule nam tamtah-in Pakai chu jop untin, kamite hidiu: chule keima nalah uva kachen ding, chutengle keimahi janel Pakaiyin naheng uva eihinsol ahi nahet dingu ahi.

¹²Chule Pakaiyin gamtheng sunga achanvou dinga Juda chu alo ding, chule Jerusalem adeilhen kitding ahi.

¹³Vo tahsa hing jouse, Pakai anga thipchetnun: ajehchu ama amunthenga konin akithou doh-in ahi.