Read Thado Chin Zechariah 3 Bible Online

Zechariah 3 - Thado Chin bible

Zechariah 3

¹ Chuin aman, Pakai vantil anga ding thempu chungnung Joshua chule ama doudal ding go-a ajetlama Satan adin chu eivetsah-e.

² Chuin Pakaiyin Satan henga, Vo Satan, Pakaiyin naphoh-e; Pakai Jerusalem kilhenpa tahchun naphoh-e: hichehi meija kona meikho kiloidoh hilou ham? atin ahi.

³Tun Joshua chu ponsil nentah kivonin, vantil anga chun adinge.

⁴Aman amasanga dingho chu adonbutnin, ajah uva chun, ponsil nen chu ama-a konin ladoh-un, tin aseije. Chule ama jah-a chun, ven, nakhan gitlouna nanga kona kabeisah tan, chule keiman ponsil hoitah kavonpeh ding nahi, ati.

⁵Chuin keiman, aluchunga lukhuh hoitah khuhpeh uhen, kati. Chutichun alua lukhuh hoitah akhuh peh-un, ponsil avonpeh taove. Chule Pakai vantil chu akoma adinge.

⁶Chuin Pakai vantil chun Joshua henga aphongdoh-in, aseije.

⁷Janel Pakaiyin hitin aseije; kalampi najotna, kathupeh nanit leh, ka-in sunga vai nahom ding, kahong sung jong navetsui ding, chule hikoma dingho lah-a hi vahle theina mun kapeh ding nahi.

⁸ Vo Joshua thempu chungnung, nangma le na-anga touhon, tun ngaijun; ajehchu amaho datmo umtah miho ahiuve: ajehchu veuvin, keiman kalhacha ABAH chu kahin puidoh ding ahi.

⁹Ajehchu Joshua masanga kasong set chu veuvin, song khat chunga mit sagi umding ahi: veuvin, keiman hia chu thucheng kajih ding ahi, tin janel Pakaiyin aseije, chule keiman nikhat tengle chuche gam khangitlouna chu katolmang ding ahi.

¹⁰ Hiche nikho chule mitinin alengpigui le atheichang phung noija, aheng akomcheh akou dingu ahi.