Read Thado Chin Zechariah 4 Bible Online

Zechariah 4 - Thado Chin bible

Zechariah 4

¹Chuin vantil eina kihoupi chu ahungkitnin, mi khat a-ihmutna kona kisuthou bangin eisuthouvin,

²kajah-a, ipi namu em? eiti. Hichun keiman kadonbutnin, kavei, chule vetan, achungvuma sumlheng um, chule akhoma thaomei sagi nei, chuche thaomei sagi-a chu akam sagi um, sana jenga kisem meivah khom:

³ Chule akoma Olive thingphung ni, sumlheng jetlama khat chule aveilama khat um kamui, kati.

⁴Chuti chun, kadonbut nin, eina kihoupi vantil jah-a chun, ka pakai hichehohi ipi ham? katin ahi.

⁵Chuin eina kihoupi vantil chun eidonbutnin, hichehohi ipi ahi nahetlou ham? ati. Hichun keiman kahepoi ka Pakai, katin ahi.

⁶ Chuin aman eidonbutnin kahenga aseije, Hichehi Zerubbabel henga Pakai thusei ahi: thahat jeh hilou, thilboltheina jeh jong hilou, kalhagao vang jeh ahi, tin janel Pakaiyin aseije.

⁷Vo molsang lenpitah, nangma koi nahim? Zerubbabel masanga phaicham naso jeng ding ahi: chule aman a-aw puma songpi athupipen chu lungsetna, lungsetna tia sampuma ahintoldoh ding ahi.

⁸Chukal valin Pakai thu chu kahenga ahungin, aseije,

⁹Zerubbabel khutnin hiche in bul hi ana phudoh ahin, ama khut maman ajoding ahi: chutengle nanghon keimahi janel Pakaiyin naheng uva eisol ahi nahetdingu ahi.

¹⁰ Ajehchu koijin thilneocha nikho i-sah louva akoijem? ajehchu amaho kipah-un tin, Zerubbabel khutna ngentum chu hiche sagiho chutoh amuthadiu ahi; hiche sagiho chu leiset pumpi-a suhle tunga lhaile Pakai mit ahiuve.

¹¹ Chule keiman kadonbut nin, ajah-a, hiche meivah khom jetle veija olive thingphung teni hi ipi hetna ham? katin ahi.

¹²Chuin keiman kadonbut kitnin, ahenga kaseijin, sana long tenin amani le amani-a kon sana thaotwi alhitkang lhona olive thingbah teni khu ipi hetna ham? kati.

¹³Aman eidonbut nin, kajah-a, hichehohi ipi hetna ahi nahetlou ham? eiti. Chuin keiman, kahepoi ka pakai kati.

¹⁴Chuin aman aseijin, hitenihi thao kinusa, leiset pumpi Pakai koma ding teni ahi lhone ati.