Read Thado Chin Zechariah 5 Bible Online

Zechariah 5 - Thado Chin bible

Zechariah 5

¹Chujouvin kakiheijin, kakhodah-in, chule kaven ahile, lekhajol leng lele khat kamun ahi.

²Chule aman kahenga, ipi namu em? eiti. Chuin keiman, lekhajol khat kamun, adung chu tong somni ahin, chule avai chu tong som ahi, tin kadonbutne.

³Chuin aman kajah-a, hichehi leiset pumpi chunga dinga potdoh-a gaosapna chu ahi: ajehchu gucha tapou chu lekhajol hiche lampang dungjuija kisumanga, chule akihahsel tapou chu lekhajol khuche lampang dungjuija kisumang ding ahi, ati.

⁴Keiman kahin puidoh ding ahi tin Janel Pakaiyin aseije, chule hiche guchapa insung le jouva kamina kihahselpa insunga chu lutding; hichu a-insunga chu umdena, chua uma thingpeh le songho puma chu asuhmanghel ding ahi.

⁵Chujouvin keima eina houpi vantil chu ahung potdoh-in, kajah-a, tun khodah inlang apotdoh khu ipiham vetemin, ati.

⁶Chuin keiman, ipiham? kati. Chuin aman aseijin, hiche hi apotdoh-a ephah chu ahi. Aman aseibe kitnin, hiche hi leiset pumpi-a akhan gitlounao chu ahi, ati.

⁷Chuin veuvin, ngen talen khat akidom sangin; chule hichehi numei khat ephah sunga tou chu ahi.

⁸Chuin aman aseijin, hichehi khan gitlouna ahi. Chuin aman ephah sunga aseplutnin, chule aman ngen gih-a chun chuche kam chu asingtan ahi, ati.

⁹Chujouvin keiman kakhodah-in, kaven ahileh, veuvin, numei ni ahungdoh in, alhaving hona chun hui aumin ahi; ajehchu amanin twilungva bangin lhaving aneilhonin ahi. Chuin amanin ephah chu leile van kikah-a adomsang lhonin ahi.

¹⁰Chujouvin keiman einaki houpi-a vantil jah-a chun, hiche ephah hi hoilama adoplhon dingham kati?

¹¹Chuin aman kahenga, Shinar gama a-in sahpeh nading lama: chule hichu kisadoh intin, amanu mun ngeija kitungdoh ding ahi, ati.