Read Thado Chin Zechariah 6 Bible Online

Zechariah 6 - Thado Chin bible

Zechariah 6

¹Chule keima kakiheijin, kakhodah-in, kaven ahileh, veuvin, molsang ni kikah-a sakol kangtalai li ahungdoh-in; chule hiche molsang teni chu sum-eng molsang ahi.

² Sakol kangtalai masa-a sakol ho chu asan ahin, sakol kangtalai nina-a sakol ho chu avom ahi;

³ Chule sakol kangtalai thum na-a sakol ho chu akangin, chule sakol kangtalai lina-a sakol ho chu abongpol jeng ahiuve.

⁴Chujouvin keiman kadonbut nin eihoupi-a vantil jah-a chun, ka pakai, hichehohi ipiham? kati.

⁵Chuin vantil chun kajah-a, hichehohi van lhagao liho, leiset pumpi Pakai anga adin naova kona chedohho ahiuve.

⁶Chua um sakol vomho chu sahlam gama akitolun; akangho chun amaho chu ajuijun; abongpol ho chu lhang lam gama akitolui.

⁷Asan pengho jong apotdoh-un, leiset pumpi-a suhle tunga vale ding agouvin ahi: chuin aman ajah uva, nangho hia konin cheovinlang, leipumpi suhle tungin gakhol taovin, ati. Hitichun amaho leiset pumpi-a suhle tunga avahle taove.

⁸Chujouvin aman kachunga apeng jah-in, chule kahenga aseije, ven, hiche sahlang gama cheho khun sahlang gama kalhagao acholdo sah uve, ati.

⁹Chuin Pakai thu chu kahenga ahung lhungin, aseije;

¹⁰Sohchang Babylon'a kona hungho lah-a, Heldai, Tobijah, chule Jedaiah'a kon thilpeh chu la inlang, chuche ni mama chule hungin lang, Zephaniah chapa Josiah ina chun lutnin;

¹¹Chujouteng dangkale sana lanlang lallukhuh khat semin, chule hichu thempu chungnung Josedech chapa Joshua luchunga khuhpeh-in;

¹² Chule ajah-a hitin seijin, Janel Pakaiyin aseijin, hitin aseije, ven Mi amin ABAH kitipa chu: Ama aumna mun'a konin khangtouvin tin, chule aman Pakai houin asahdoh ding ahi.

¹³Aman Pakai houin geija asahdoh-a, loupina chu chang ding, chule ama touva alaltouna chunga vai ahomding; alaltouna chunga chu thempu'a pang ding ahi: chule chamna thumopna chu akikah lhona umding ahi.

¹⁴Chule lallukhuh ho chu Helem, Tobijah, Jedaiah, chule Zephaniah chapa hetna dinga Pakai houin sunga umding ahi.

¹⁵Chule gamlatah-a umho hunguva Pakai houin chu asahdiu, chutengle nanghon keimahi janel Pakaiyin naheng uva eisol ahichu nahetdiu ahi. Hichehi nanghon genngai tah-a Pakai na Pathen'u aw chu nangai ule bou hung guilhung ding ahi.