Read Thado Chin Zechariah 8 Bible Online

Zechariah 8 - Thado Chin bible

Zechariah 8

¹Janel Pakai thu kahenga ahunglhung kitnin, aseije;

²Janel Pakaiyin hitin aseije; Keima Zion din thangthipna nasatah-in kathangthipmin, amadin lunghan chungnungin kathangthipme.

³Pakaiyin hitin aseije; Keima Zion henga kahung kilekitna, Jerusalem lailunga kachen ding ahi. Chule Jerusalem chu thutah khopi kitiding, janel ho Pakai molsang chu molsang theng kitiding ahi.

⁴Janel Pakaiyin hitin aseije; Jerusalem lamlena chu tehse numei le tehse pasal cheng nalai ding ahin, chule akum tambehseh jeh-a mitinin akhutna tenggol akiphu dingu ahi.

⁵Chule khopi lamlena chu pasal chapang le numei chapang dimset ding, akhopi lamlena chu kichem dingu ahi.

⁶Janel Pakaiyin hitin aseije; hiche nikho-a hiche mite amohho mitmu-a hichu datmo aumin, chule keima mitmu-a jong datmo aumdem? tin janel Pakaiyin aseije.

⁷Janel Pakaiyin hitin aseije; veuvin, keiman kamite chu solam le lhumlam gama kona kahuhdoh ding;

⁸Chule amaho chu kahin puija, Jerusalem lailunga cheng ding ahiuve. Chule amaho kamite hiuva, thutah le chonphatna-a keima a-Pathen'u kahiding ahi.

⁹Janel Pakaiyin hitin aseije; Houin kisahdoh theina ding, janel Pakai houin bul kiphudoh nikho-a themgaoho kama thu kisei cheng, tukhanga anakola jajousen naban thau hatsah-un.

¹⁰Ajehchu tumasangin mihem kithalah manle, gancha kigoi man jong akipepoi; hesohna jeh-in alutle apotle dingin jong chamna aumpoi: ajehchu mijouse aheng akomtoh kana kidou sah-in ahi.

¹¹Ahinla tunvang, hiche miho amoh cheng henga hin, masang laija chutoh bang taponge tin janel Pakaiyin aseije.

¹²Ajehchu muchi chu pha theijin tin, lengpiguijin aga pentin, leijin aga sepdoh intin, vanhon adaitwi hou apehdingu ahi; chule keiman hiche mite amohho chu hicheho jousehi kalosah ding ahi.

¹³Chule hung hitiding ahi, Pathen helouho lah-a sapsetna nachan jeh uvin, Vo Judah le Israel insung miteho; hijeh-a chu kahuhdoh uva phatthei channa nahidiu ahi. Kicha hih-un, ahin nabantha hatsah jouvin.

¹⁴Ajehchu janel Pakaiyin hitin aseije; napateu vin eilung hansah uva, nangho engbol dinga kana gotlai bangin, kalung kaheipoi, tin janel Pakaiyin aseije.

¹⁵Chuti chun tulai nikhon vang Jerusalem le Judah insung mite chunga thipha bolding kangaito kit tai: nangho kicha hih-un.

¹⁶ Hichehi nanghon naboldiu chu ahi; mitinin aheng akom jah-a thutah jeng seijun; nakotpi phunguva thutah le chamna-in thu tanun.

¹⁷Koimachan aheng akom chunga lungse ngaito hihhen, jouva kihahselna ngailu hih-un. Ajehchu hicheho jousehi keiman kahot ahi, tin Pakaiyin aseije.

¹⁸Chule janel Pakai thu chu kahenga hungin, aseije;

¹⁹Janel Pakaiyin hitin aseije; lha lina an ngol, lha ngana an ngol, lha sagina an ngol, chule lhasom na-an ngol chu Judah insung mite dinga akipanale thanopna, chule nopsahna kut hiding ahi; hijeh chun thutah le chamna ngailuvin.

²⁰Janel Pakaiyin hitin aseije; hung hiti ding ahi, mipi ho, khopi tamtah-a chengho chu hungding ahiuve.

²¹Khopi khatna chenga miho chu achom khatna cheovintin, ajah uva, Pakai henga tao dingle, janel Pakai holdingin cheloiju hite: keijong kache ding ahi, ati dingu ahi.

²²Henge, mi tamtah le nam hat ho chu Jerusalem'a janel Pakai holding le Pakai henga taodinga hung diu ahi.

²³Janel Pakaiyin hitin aseije; hiche nikho chule hung hitiding ahi, namtinle paotin jouse-a kona misomin Judah mi khat pon atuh uva, keiho jong nangtoh kilhona kachediu ahi; ajehchu Pathen'in na-umpiuve ti kajauve, atidingu ahi ati.