Read Thado Chin Zechariah 9 Bible Online

Zechariah 9 - Thado Chin bible

Zechariah 9

¹ Israel phungho jouse banga mihemte mit ho chun Pakai lam ahin ngat tengle; Hadrach gamsunga Pakai thua pohgih, chule Damascus chu akicholdona hiding ahi.

²Chule Tyrus le Zidon chu chinglheh jongle, Hamath'in jong hichu agamgit ding ahi.

³Chule Tyrus'in ama dingin kuldet akisemin, dangka chu leivui bangin asevumin, sana thengsel jong khopi lamlena bonlhoh bangin asevume.

⁴ Veovin, Pakaiyin amanu apaidoh ding, chule athahatna chu twipia alehlut ding; chule meijin akahvam ding ahi.

⁵ Ashkelon'in hichu amua kicha ding; Gaza'n jong amua lunggim lheh ding, chule Ekron'in jong; ajehchu akinepna chu kijumso ding; lengpa chu Gaza-a kona mangthah ding, Ashkelon chu chenna lou hiding ahitai.

⁶Chule Ashdod'a chu jaocha khat cheng ding; keiman Philistine hoithona chu kasuhtan ding ahi.

⁷Chule akamsunga kon athisan kalahmanga, chule aha kah-a kona thet umtah ahina chu kalahmang ding ahi. Ahinla aumdenpa, ama tah jengjong chu i-Pathen uva ding hintin, Judah gamsunga chu vaipipo banga umding ahin, Ekron chu Jebus mite tobang hiding ahi.

⁸Galmiho jehle, ajotpa jeh le ahung kilepa jeh-a, ka-in hi kaum kimvel ding; chule misugenthei koiman ahin jotpa lou ding ahitai; ajehchu tun kamit tah-in kamutai.

⁹ Vo Zion chanu, hapan kipah-in; Jerusalem chanu, aovin: ven nalengpa nahenga ahunge: ama chondihtah ahin, chule huhhingna aneije; kineosah tah-in sangan chunga, sangan nou chunga atouvin ahi.

¹⁰ Chule keiman Ephraim'a kona sakol kangtalai kasuhmanga, Jerusalem'a kona sakol ho chu kasuh mangding, chule gal thalpi jong kisat bongding ahi. Chule aman Pathen hephalou ho jah-a chamna thu aseiding, alenggam chu twipia pat twipi gei, chule vadunga pat kolmong gei hiding ahi.

¹¹ Nangma dingin jong, nathisana kitepna vangin, twi beina kokhuh-a konin nasohchangho chu kasoldohtai.

¹²Kinepna nei sohchang nangho kuldet lama kileuvin; tuni tah-a hi ajatnia kapehdiu ahi tia kaphondoh ahi.

¹³Keiman kathalpi Judah kajebongin, Ephraim chu thalchang bangin thal'a kadipme, nachapate chu thoudoh-in, vo Zion, nachapate doudingin, vo Greek, nangma mihat ho chemjam bangin kaseme.

¹⁴Pakai chu achunguva kimuntin; athalchang ho chu kolphe banga leng ding ahi: Pakai Pathen'in sumkon mut intin, lhanglam chimpeitoh kilhonding ahi.

¹⁵Janel Pakaiyin amaho ahonbit dingu; chule amahon abahgamuva, ah songse songa ajodiu ahi, amahon adondiu, chule lengpitwi kham banga pohchei choidiu; amaho sumlheng ho banga dimuva, maicham ningho bang dimdiu ahi.

¹⁶Chule hiche nikho chule a-Pathen'un amite ganchahon banga ahuhdoh ding ahi: ajehchu amaho alua lallukhuh chunga songho bang dingu, agamsunga ponlap banga choisanga umdiu ahi.

¹⁷Ajehchu aphatna hi ichana lenna, ahoina hi ichana len hitam? changin gollhangho athanopsah ding, lengpitwi thah-in nungah ho akipasah ding ahi.