Read Thado Chin Malachi 1 Bible Online

Malachi 1 - Thado Chin bible

Malachi 1

¹Israelte henga Malachi'a kona kiseidoh Pakai thu pohgih.

² Keiman nangho kangailui tin Pakaiyin aseije, ahin nanghon iti neingailut nuham? nati uve. Esau chu Jacob sopi hilouham? tin Pakaiyin aseije. Ahinla keiman Jacob kangailun,

³Esau vang kahon, amolsangho le agou chanho chu kasusen gamthipma dragonho dingin kakoitai.

⁴Edom chun, keiho suhmangin umjong leuveng, kahung kilekit uva, agemsaho chu kasahphat kit diu ahi ati; ahinla janel Pakai chun hitin ati, amahon saovintin, hijongle keiman kasuhchim ding; mihon amaho chu khangitlouna gamgi, tonsotna Pakai lung hanna miteho atidiu ahi.

⁵ Chule namit tah-un mu uvin natin, Israel gamgi-a kona Pakai chu choi-atna umding ahi, natidiu ahi.

⁶Chapan apa ajaboljin, chule soh-in a pakai ajaboljin ahi. Chutia chu keijong pa kahia ahile, eiki jabolna hoiba ham? Chule Pakai kahile eikiginna hoibaham? tin Janel Pakaiyin nangho jah-a aseije, Vo kamin nahsahlou thempuho. Ahinla nanghon hoija chu kanahsah mouvem? nati uve.

⁷Ka-maicham chunga changlhah thenglou natoh-un, ahinla nanghon, hoilaija nangma kasuhboh uvem? nati uve. Pakai dokhang chu nahsahmo-a bolthei ahi tia nasei naova chu nasuh boh-u ahi.

⁸ Nanghon ganlhaina dinga amitcho natoule, hichu ase hilouham? chule nanghon a-elbai le adamlou natoule, hichu ase hilou ham? tun nagam vaipopao chu hichu gapeuvin, nachunga alung lhaidem, ahiloule nangma nanasang nadem? tin janel Pakaiyin aseije.

⁹Eilungset theina diuvin, tun Pathen henga taovun tia kangeh nahiuve. Hichehi nangho themo ahin, aman nangma nana khohsah nadem? tin janelho Pakaiyin aseije.

¹⁰Ka maichama moh jenseh-a mei natilou nadinguva, nangho lah ngeija moh jenseh-a kot khah ding koi nahiuvem? Nangho-a lunglhaina kaneipon, nakhut uva nathil peh-u jong laponge tin janel Pakaiyin aseije.

¹¹Ajehchu nisa sona-a kipatna alhumna changeija, chidang namdangte lah-a kamin kithang ding ahin, amun tina gimnamtui le thilpeh theng kamina kitoh ding ahi. Ijeh inem itile Pathen heloute lah-a kamin kithang ding ahi, tin janel Pakaiyin aseije.

¹²Ahin nanghon hichu nasuboh-un, hia chun nanghon, Pakai dokhang chu suhboh ahitai; chukoma aga hole asaho sanin nahsahmon aumtai, tin naseijuve.

¹³Chujongle nanghon, veuvin, iti ningkitel um hitam! nati uvin, nanah nakhon khumuve, tin janel Pakaiyin aseije; chule nanghon akibot telsa, elbai, chule adamlou chu thilto dingin nahin choijiuve; hichehi nakhut uva kona kasan dingham? tin Pakaiyin aseije.

¹⁴Ahinla aganhon lah-a achal umjena, chule kihahsela, Pakaiya dinga nol-um toh-a chu gaosap changhen! ajehchu keima leng lentah kahin, chule kaminhi Pathen helouho lah-a kichat umtah ahi, tin janel Pakaiyin aseije.