Read Thado Chin Malachi 3 Bible Online

Malachi 3 - Thado Chin bible

Malachi 3

¹ Veovin, keiman kasottol soling ting, aman kamasanga kalampi asem ding; nanghon naholu Pakai, achunga nakipanao kitepna thupole pa ngei chu, photlot louva a-houin'a hung ding ahi. Veovin, hungding ahi, tin janel Pakaiyin aseije.

² Ahivangin ahung ni chu koiham athohjou ding, ahungkilah teng koiham adingthei dinga? ama chu suhthengna meile sopthengna savon tobang ahi.

³Ama dangka lhahtheng le suthengpa banga touding; Levi chate chun chonphatna-a Pakai henga thilto atotheina diuva asuhthenga, sana dangka banga alhahtheng dingu ahi.

⁴Chuteng khangluilai le kum masaho banga, Judah le Jerusalem ganlhaina chu Pakai dinga lunglhaina hikit ding ahitai.

⁵Chule keiman thutan dinga naheng kahin naiding: doichoiho, jon panho, jouva kihahsel ho, sum thalo ho le meithaiho chule pabeiho bolgimho, maljinho kiheimang khumho, chule keima eiging louho douna-a hettohsah gangtah kahi ding ahi, tin janel Pakaiyin aseije.

⁶Ajehchu keima kikhel lou Pathen kahin; vo Jacob chateho, hijeh-a chu nangho suhmanga umlou nahiuve.

⁷Napu napateu nikholaija patnin kahoudan thupeh ho-a konin nache mangun, hicheho chu nitjong nanitpouvin ahi, kahenga hung kileovin, keima jong naheng uva hungkilenge, tin janel Pakaiyin aseije. Ahinla nanghon iti kahungkile diuham? nati uve.

⁸Mihem'in Pathen achom ngaijem? Ahin nanghon keima neichom uve. Ahinla nanghon hoija nang kachomun? nati uve. Hopsom le thilto-a neichomun ahi.

⁹Nanghon neichom jeh-u leh, hiche nam pumpi jeng jonghin eichom jeh uva, gaosapna-a gaosap chang nahitaove.

¹⁰ Ka-in'a nehle chah aumna dingin, hopsom jouse thilkholna insung hinlhutnun, van kot ho kahona asunga akoina ding indan aumlou geija phattheina kahin buhlhah hih-em, tun hiche-a hin neipatep untin, janel Pakaiyin aseije.

¹¹Chule nangho khohsahna jala bahgampa chu kaphosal ding, aman naleisetna gahou chu asuhmang tahlou ding; loulaija lengpiga injong aphat masanga aga apulsah louding ahi, tin janel Pakaiyin aseije.

¹²Chule nangma kipa umtah gam nahitah ding jeh-a, nam jousen anunnom nati diu ahi, tin janel Pakaiyin aseije.

¹³Nathu houchu kachunga akhouthei lheh-e, tin Pakaiyin aseije. Ahin nanghon nangma douna-a chutiloma ipi kaseibeh uvem? nati uvin ahi.

¹⁴Nanghon, Pathen kinbol hi pannabei ahi: eihon ahoudan thupeh initnuva, chule lunghem tah-a janel Pakai anga ivaleova ipi phachomam? nati uve.

¹⁵Chule tun nanghon mikiletsah ho chu akipah-e natiuvin; henge, khangilou tah-a lamlha ho chu choisangin aumin; Pathen lhem patep ho jengjong ahoidoh-un ahi.

¹⁶Chuin Pakai gingho chu khatle khat akihouvun; Pakaiyin angaijin ajatan; Pakai ginga, amin geldoh jingho dingin, a-angsunga geldoh jingna lekhabu khat akisunin ahi.

¹⁷Kasongmantam ho kasemdoh nikho leh, amaho keima-a hidiu ahi tin janel Pakaiyin aseije; chuteng mipa khatnin alhacha-a pang achapa akhendoh banga, keiman jong amaho chu kakhendoh ding ahi.

¹⁸Chutengleh hungkile heijun natin, michonpha le mikhangilou nahet khendiu, Pathen jen le ajenlouho nahekhen diu ahitai.