Read Thado Chin Mathew 10 Bible Online

Mathew 10 - Thado Chin bible

Mathew 10

¹Chuin aman aseijui somleni chu akoma akouvin, lhagao boh nomang dingle, hivei namkim le nat namkim damsah dingin, amaho chu thuneina apen ahi.

²Hiche solchah somleni ho chu aminu hicheng hi ahi: Amasan Peter kiti Simon le anaopa Andrew, Zebedai chapa Jacob le anaopa John,

³Philip le Bartholomew, Thomas le kaidong Matthew, Alphaeus chapa Jacob le Lebbaeus aminchom Thaddaeus;

⁴Chule Canaan mi Simon le ama matsah-a pang Judas Iscariot ahi.

⁵Hicheng somleni chu asolin, thu apen, ajah uve, Chidang namdang koima lampi jot hih-un, chule Samaria ho khopi sung khatcha-a jong lut hih-un;

⁶Amavang chu sangin Israel insung mi amangsa kelngoi henga cheovin.

⁷ Chule nache pumun, Vangam anaitai, tin hillhang leuvin.

⁸Anaho damsah-unlang, athi thouvun, aphahho suthengun, chule thilha nodoh-un; manbeija nasanu ahin, manbeijin homun.

⁹Nanghon nadangka dip sunguva sana, dangka, sumsan kiken hih-un;

¹⁰ chule najinnaova dingin sakhao ahiloule sangkhol thoni, kengchot, tengol kiken hih-un; ijeh-inem itile natongan aneh ding amua lom ahi.

¹¹Chule nacheuva khopi sung hile khoneo sung hile nalut tengule, lhunna-a kilom koi umam phatechan ngaitouvin; chule chua kona napotdoh kahseuvin hikoma chun umun.

¹²Chule in khatna nalut tengule, hiche in chu phatthei boh-un.

¹³Chule hiche in chu phatthei changhoi ahile, nalungmonnau chu achungah umhen; achanghoi ahi louvangle hiche lungmonna chu naheng uva hung kile kittahen.

¹⁴ Chule koi hile nalhunsah louvule nathu seiju ngai lou chu, chuche in'a konle chuche kho-a kona napotdoh tengule, nakengphang uva leivui sanin thinglhau vin.

¹⁵ Keiman nangho jah-a tahbeh-a kasei ahi, Thupi kitan nile chuche kho umchan sanga chu Sodom le Gomorrah gam umchan thohbai joding ahi.

¹⁶ Veuvin, keiman nangho ngeihon lah-a kelngoi banga kasol nahiuve; hijeh chun nangho gul bangin lungthim themun, vakhu bangin suhset neilou hiuvin.

¹⁷ Ahivangin mihem lamah kichih theijun; ijeh-inem itile amahon nangho thutan vaihom kikhopna-a pedoh-un natin, chule akikhopnao in'a navoh dingu ahi.

¹⁸Chule amahole chidang namdangte hetsahna dinga, gamvaipote le leng teho anga keima jala hung kikai ding nahiuve.

¹⁹Ahivangin min napehdoh tengule, ipi iti nasei dingu lungkham hih-un; sei ding chan chu apettah-le nakipe dingu ahi.

²⁰Ijeh-inem itile thuseija chu nangho hilouvin, na-Pau Lhagaovin nalung sunguva asei ahibouve.

²¹ Chule asopin asopi, pan acha tha dinga ahinpehdoh ding; anu le apa douna-a chate dingdoh diu, chule athi nadiu ahin boldoh dingu ahi.

²² Chule keima min jala nangho mi jouse hotna nahung umdingu ahi; ahin akhon ni geija thohlhum keija pangdetpa bou chu huhhing-a umding ahi.

²³Hiche khopi-a min nabolset tengule, khopi dangah jam lutnun; ijeh-inem itile tahbeh-a kaseipeh nahiuve, Mihem Chapa ahung masanga, Israelte khopi jouse nachotsoh lou dingu ahi.

²⁴ Ahilpa sangin aseijui achungnung jopoi, a-pakai sangin jong asoh achungnung jopoi.

²⁵ Aseijui chu ahilpa toh, chule soh a-pakaipa toh akikotle aphaset ahi. Amahon a-inneipu pen bon Belzabul atiule, a-insung mite chu iti atida dingu ham?

²⁶ Hijeh chun nanghon amaho chu kicha hih-un; ijeh-inem itile akiphongdoh lou ding akisela imacha aumpoi, chule hetdoh lou ding imacha aki-ima aumpoi.

²⁷Keiman nangho jah-a muthima kasei chu, nanghon khovah-a seijun; nanauva najah-u chu, in chunga saptho uvin.

²⁸Chule natahsao thatna, lhagao that theilou ho chu kicha hih-un; lhagaole tahsa akopma damuna sumang theipa bou chu kichaovin.

²⁹Vasilih ni paisa khat manna kilhaji louham? Achuti vangin na-Pau thu louvin hitiho chu khatcha jong tolla lha lou ding ahi.

³⁰Nalu chunguva nasam jang jouseu jong kisim sohkeija ahi;

³¹Hijeh chun kicha hih-un; vasilih tamtah sanga nangho lujo nahiuve.

³²Hijeh chun koi hile miho anga kei eiphongdoh chan chu, keiman jong van'a ka Pa anga kaphondoh ding ahi.

³³ Amavang koi hile miho anga keima eiseileppa vang chu, keiman jong van'a ka Pa anga kaseilep ding ahi.

³⁴Leichunga chamna hinpo dinga hungin neingaito hih-un; chamna hilouvin chemjam hinpo joh-a hung kahibouve.

³⁵ Ijeh-inem itile achapa chu apa dousah ding, achanu chu anu dousah ding, amounu chu atehpi dousah dingjoh-a hung kahibouve.

³⁶Chule mihem amelma chu ama insung mitetah hi ding ahi.

³⁷Koi hile keima sanga anu le apa ngailujo-a chu keija hoi ahipoi; chule koi hile keima sanga achanu le achapa ngailujo-a chu keija hoi ahipoi.

³⁸ Chule koi hijongle athingpel kiputna kanung hinjui lou jong chu, keija hoi ahipoi.

³⁹ Koi hile ahinna mu-a chun achan ding; chule keima jala ahinna channa chun amu ding ahi.

⁴⁰ Koi hile nangho lhunsah-a chun keima eilhunsah ahin; chule koi hile keima eilhunsah-a chun eisolpa alhunsah ahi.

⁴¹Themgao mina themgao lhunsah-a chun themgao kipaman asan ding; chule michonpha tia michonpha lhunsah-a chun, michonpha kipaman asan ding ahi.

⁴²Koi hile hiche neochaho lah-a hi seijui ahi tia twi dap khon khat jengcha don dinga pechan chun, tahbeh-a kaseipeh nahiuve, iti nama jongle kipaman asan ding achan louding ahi.